അക്ഷര പുരയ്ക്ക് താഴും പൂട്ടുമിടാതെ അറിവിന്റെ കവാടം തുറന്നിട്ട് മാതൃക ആവുകയാണ് ഈ വിദ്യാലയം. ഇവിടെ വിദ്യാര്‍ഥികള്‍ക്ക് ആരുടേയും അനുവാദം ഇല്ലാതെ പുസ്തകം എടുത്തു വായിക്കാം, തിരിച്ചു വെക്കാം. കൊട്ടാരക്കര നെടുവത്തൂര്‍ ഈശ്വര വിലാസം ഹയര്‍ സെക്കന്‍ഡറി സ്‌കുളിലെ നാഷണല്‍ സര്‍വീസ് സ്‌കീമിന്റെ ആഭിമുഖ്യത്തിലാണ് സ്‌കൂളില്‍ ഇത്തരത്തില്‍ ഒരു തുറന്ന വായനശാല ആരംഭിച്ചത്.

ഹയര്‍ സെക്കന്‍ഡറി വിഭാഗത്തിലെ നാഷണല്‍ സര്‍വീസ് സ്‌കീമിലെ കുട്ടികളാണ് തുറന്ന വായനാശാലയിലേക്ക് പുസ്തകങ്ങള്‍ ശേഖരിച്ചത്. എന്‍ എസ് എസ് സപ്തദിന ക്യാമ്പിനോടനുബന്ധിച്ച് കുട്ടികള്‍ പലയിടങ്ങളില്‍ നിന്നും വായനശാലയിലേക്ക് പുസ്തകങ്ങള്‍ ശേഖരിച്ചു. കഥ, കവിത, നോവല്‍, ബാലസാഹിത്യം, നാടകം, ജീവചരിത്രം, പഠന പ്രവര്‍ത്തനങ്ങളുമായി ബന്ധപ്പെട്ട പുസ്തകങ്ങള്‍ എന്നിങ്ങനെ തരം തിരിച്ച് സ്‌കൂളില്‍ ഏല്‍പ്പിച്ചു.

കുട്ടികള്‍ തന്നെ സ്‌കൂളിന്റെ വരാന്തയില്‍ വായനാശാല ഒരുക്കി. കുട്ടികള്‍ക്കും സ്‌കൂളില്‍ എത്തുന്ന രക്ഷിതാക്കള്‍ക്കും ഇവിടെ എത്തി ഇഷ്ടമുള്ള പുസ്തകങ്ങള്‍ എടുത്തു വായിക്കാം. ആവശ്യമായ പുസ്തകങ്ങള്‍ വീടുകളില്‍ കൊണ്ടു പോയി വായിക്കണമെങ്കില്‍ അവര്‍ക്ക് നാഷണല്‍ സര്‍വീസ് സ്‌കീമിലെ വയനാശാലയുടെ ചുമതലയുള്ള ലീഡറെ സമീപിക്കാവുന്നതാണ്.

ഈ വായനാശാലയിലേക്ക് വിജ്ഞാന പ്രദമായ പുസ്തകങ്ങള്‍ കുട്ടികള്‍ക്കും മുതിര്‍ന്നവര്‍ക്കും നല്‍കാവുന്നതാണ്. നല്‍കുന്നവരുടെ പേര് പുസ്തകത്തില്‍ എഴുതി സൂക്ഷിക്കും. ചുരുങ്ങിയ ദിവസത്തിനുള്ളില്‍ ഇരുനൂറിലധികം വിവിധ വിഭാഗങ്ങളിലെ പുസ്തകങ്ങള്‍ എന്‍എസ്എസ് യൂണിറ്റിലെ അംഗങ്ങള്‍ തുറന്ന വയനാശാലയില്‍ എത്തിച്ചിട്ടുണ്ട്.

എല്ലാ സ്‌കൂളിലും ലൈബ്രറിയും ലൈബ്രറിക്ക് ചുമതലപ്പെട്ട അധ്യപകരും ഉണ്ടാകും. എന്നാല്‍ കുട്ടികള്‍ കുട്ടികള്‍ക്കായി പുസ്തക വിതരണം നടത്തുന്ന തുറന്ന വായനാശാലയെ ആരും പിന്തുണച്ചു കണ്ടിട്ടില്ല. ഇതില്‍ നിന്നും വ്യത്യസ്തമായാണ് ഇവിടെ ഇത്തരം സംരംഭം തുടങ്ങിയിട്ടുള്ളത്. തുറന്ന വായനാശാല റിട്ട. അധ്യാപകനും എഴുത്തുകാരനുമായ നീലേശ്വരം സദാശിവനാണ് ഉദ്ഘാടനം ചെയ്തത്.

പി ടി എ പ്രസിഡന്റ് ഗോപകുമാര്‍ വി അധ്യക്ഷത വഹിച്ചു. സ്‌കൂള്‍ പ്രിന്‍സിപ്പല്‍ ജിജി വിദ്യാധരന്‍, സ്‌കൂള്‍ മാനേജര്‍ കെ. സുരേഷ് കുമാര്‍, എന്‍ എസ് എസ് പ്രോഗ്രാം ഓഫീസര്‍ ലേഖ ജെ നായര്‍, അധ്യാപകരായ ഉണ്ണികൃഷ്ണന്‍ ഉണ്ണിത്താന്‍, എം എസ് ഹരികുമാര്‍, പി ടിഎ എക്‌സിക്യൂട്ടീവ് അംഗം ശ്രീകുമാര്‍, എന്‍എസ് എസ് പ്രതിനിധികളായ സുബിന്‍, അഖില എന്നിവര്‍ പ്രസംഗിച്ചു.