കോട്ടയം മെഡിക്കല്‍ കോളജ് ആശുപത്രിയിലെ ഒപി ടിക്കറ്റ് കൊടുക്കുന്ന സമയം രാവിലെ 7.30-ല്‍നിന്ന് എട്ട് മണിയാക്കി മാറ്റണമെന്നാവശ്യം ശക്തമാകുന്നു. 8.30-മുതലാണ് ഡോക്ടര്‍മാരും ജീവനക്കാരും ഒപി വിഭാഗത്തില്‍ എത്തിച്ചേരുന്നത്.ചില വിഭാഗങ്ങളില്‍ 10.30-ഉം 11-ഉം ആണ്.

7.30 മുതല്‍ ഒപി ടിക്കറ്റ് എടുത്ത് ബന്ധപ്പെട്ട ഡോക്ടര്‍മാരുടെ മുറിയുടെ മുന്നില്‍ പോയി നില്‍ക്കുന്നിടത്ത് എപ്പോഴും വാക്ക് തര്‍ക്കവും ബഹളവുമാണ്. ഇതു ചിലപ്പോഴൊക്കെ സംഘര്‍ഷത്തിലേക്ക് എത്താറുണ്ട്.

മണിക്കൂറുകള്‍ കാത്തുനിന്ന് കഴിയുമ്പോഴാണ് ചില ഒപികളില്‍ ഡോക്ടര്‍മാര്‍ എത്തുന്നത്.ഇവരുടെ ഒപി സമയം 10.30, 11 ആയതിനാല്‍ രോഗികള്‍ 7.30 മുതല്‍ കാത്തുനില്‍ക്കേണ്ടി വരുന്നു. എട്ട് ആക്കിയാല്‍ അതനുസരിച്ച് എല്ലായിടത്തും വ്യത്യാസം വരുത്തുവാന്‍ കഴിയുമെന്ന് ജീവനക്കാരും പറയുന്നു.

കേരളത്തില്‍ കോട്ടയം മെഡിക്കല്‍ കോളജ് ആശുപത്രിയില്‍ മാത്രമാണ് ഒപി ടിക്കറ്റ് 7.30-ന് നല്‍കുന്നതെന്നും മറ്റു മെഡിക്കല്‍ കോളജുകളിലെപ്പോലെ എട്ടിനു നല്‍കിയാല്‍ രാവിലെ വന്ന് ഡോക്ടര്‍മാരുടെ മുറിയുടെ മുമ്പില്‍ നില്‍ക്കുന്ന വലിയ ക്യൂവും ബഹളവും ഒഴിവാക്കുവാന്‍ കഴിയുമെന്നാണ് ജീവനക്കാര്‍ പറയുന്നത്.