ഭക്ഷ്യ ഭദ്രത നിയമപ്രകാരം സൗജന്യ റേഷന് അര്‍ഹതയില്ലെന്ന് കണ്ടെത്തിയ 3.16 ലക്ഷം പേരെ പൊതു വിതരണ വകുപ്പ് അന്ത്യോദയ, മുന്‍ഗണന വിഭാഗത്തില്‍ നിന്ന് ഒഴിവാക്കി. കഴിഞ്ഞ വര്‍ഷം 2,86,677 പേര്‍ക്കും തുടര്‍ന്ന് 30,000 പേര്‍ക്കുമാണ് സൗജന്യ റേഷന് അര്‍ഹരല്ലെന്ന് കണ്ടെത്തി മുന്‍ഗണനേതര കാര്‍ഡുകള്‍ നല്‍കിയത്. ഇക്കൂട്ടത്തില്‍ സര്‍ക്കാര്‍ ഉദ്യോഗസ്ഥര്‍ വരെ ഉണ്ട്. ഭക്ഷ്യ ഭദ്രത നിയമത്തില്‍ നാല് മാനദണ്ഡങ്ങള്‍ക്ക് അനുസരിച്ച് നാഷനല്‍ ഇന്‍ഫര്‍മാറ്റിക് സെന്റര്‍ (എന്‍.ഐ.സി) സോഫ്റ്റ്‌വെയര്‍ ഉപയോഗിച്ചാണ് ഇത്തരക്കാരെ കണ്ടെത്തിയത്

എന്നാല്‍ റേഷന്‍ അല്ലാത്ത ഇതര ആനുകൂല്യങ്ങള്‍ക്കായി ലക്ഷക്കണക്കിന് അനര്‍ഹര്‍ കാര്‍ഡ് മാറ്റുന്നതിന് തയ്യാറായില്ല. പട്ടികയില്‍ നിന്നും പുറത്തായ അര്‍ഹര്‍ സര്‍ക്കാറിനും വകുപ്പിനും പ്രത്യേകിച്ച് ജനപ്രതിനിധികള്‍ക്കും തലവേദനയായി. ഇതിന്റെ അടിസ്ഥാനത്തില്‍ ഇത്തരക്കാരില്‍ നിന്നും സര്‍ക്കാര്‍ അപേക്ഷ ക്ഷണിച്ചു. 7,66,547 അപേക്ഷകളാണ് സര്‍ക്കാറിന് ലഭിച്ചത്.
വിവിധ വകുപ്പുകളെ ഏകോപിപ്പിച്ച് നടത്തിയ പരിശോധനയില്‍ 3,71,953 അപേക്ഷകര്‍ അര്‍ഹരാണെന്ന് കണ്ടെത്തി. അനര്‍ഹരെ പുറത്താക്കാതെ അര്‍ഹരെ ഉള്‍പ്പെടുത്താനാത്ത സാഹചര്യമുണ്ടായി. നഗരങ്ങളില്‍ 39.05 ശതമാനവും ഗ്രാമങ്ങളില്‍ 52.08 ശതമാനവും ഗുണഭോക്താക്കള്‍ക്കാണ് കേന്ദ്രം സബ്‌സിഡി ഭക്ഷ്യധാന്യം നല്‍കുന്നത്. ഇതോടെയാണ് അനര്‍ഹരെ പുറത്താക്കുന്നതിന് കര്‍ശന നടപടികളുമായി തുനിഞ്ഞിറങ്ങിയത്. നേരത്തെ അര്‍ഹരായിട്ടും പുറത്തുണ്ടായിരുന്ന 3,16,677 പേരെ മുന്‍ഗണന പട്ടികയില്‍ ഉള്‍പ്പെടുത്താനായി. എന്നാല്‍ 71,000 അര്‍ഹരായ കാര്‍ഡ് ഉടമകളെ ഇനിയും മുന്‍ഗണന പട്ടികയില്‍ ഉള്‍പ്പെടുത്താനുണ്ട്.