എം.എസ്.എഫ് പ്രവര്‍ത്തകനായ അരിയില്‍ ഷൂക്കൂര്‍ വധക്കേസില്‍ സി.പി.എം കണ്ണൂര്‍ ജില്ലാ സെക്രട്ടറി പി.ജയരാജനും കല്യാശേരി എം.എല്‍.എ ടി.വി രാജേഷിനും എതിരെ സി.ബി.ഐ കൊലക്കുറ്റം ചുമത്തി. ഇത് സംബന്ധിച്ച കുറ്റകത്രം കോടതിയില്‍ സമര്‍പ്പിച്ചു. ക്രിമിനല്‍ ഗൂഢാലോചന നടത്തിയതിന് 120 ബി, 302 വകുപ്പുകള്‍ ചുമത്തിയാണ് തലശേരി കോടതിയില്‍ കുറ്റപത്രം നല്‍കിയത്. നേരത്തെ കൊലപാതകം നടക്കുമെന്ന് അറിഞ്ഞിട്ടും അത് തടയാന്‍ ശ്രമിച്ചില്ലെന്ന വകുപ്പ് ചുമത്തിയാണ് കേസ് എടുത്തിരുന്നത്. 2012 ഫെബ്രുവരി 20നാണ് സംഭവം നടന്നത്. കുറ്റപത്രത്തില്‍ ടി.വി രാജേഷ് എം.എല്‍.എയ്‌ക്കെതിരെയും ഗൂഢാലോചന കുറ്റം ചുമത്തിയിട്ടുണ്ട്.

പി. ജയരാജന്റെ വാഹനത്തിന് നേരെ കല്ലെറിഞ്ഞെന്ന് ആരോപിച്ചാണ് കണ്ണൂരിലെ തളിപ്പറമ്പ് പട്ടുവത്തെ അരിയില്‍ സ്വദേശിയും എം.എസ്.എഫ് പ്രാദേശിക നേതാവുമായ അരിയില്‍ അബ്ദുല്‍ ഷുക്കൂറിനെ കണ്ണപുരം കീഴറയിലെ വള്ളുവന്‍ കടവിനടുത്ത് വെച്ച് കൊലപ്പെടുത്തിയത്. . സംഭവ ദിവസം പട്ടുവത്ത് വെച്ച് സി.പി.എം കണ്ണൂര്‍ ജില്ലാ സെക്രട്ടറി പി. ജയരാജന്‍, കല്ല്യാശ്ശേരി എം.എല്‍.എ ടി.വി.രാജേഷ് എന്നിവര്‍ സഞ്ചരിച്ച വാഹനത്തിനു നേരെ ആക്രമണം ഉണ്ടായതിനു പ്രതികാരമായിട്ടാണ് ഷുക്കൂര്‍ വധിക്കപ്പെട്ടത് എന്ന് പോലീസ് ആരോപിക്കുന്നു. രണ്ടര മണിക്കൂര്‍ ബന്ദിയാക്കി വിചാരണ ചെയ്ത ശേഷമാണ് ക്രൂരമായ കൊലപാതകം നടത്തിയത്. ലോക്‌സഭ തെരഞ്ഞെടുപ്പ് അടുത്തിരിക്കുന്ന വേളയില്‍ സി.പി.എമ്മിന് കനത്ത തിരിച്ചടിയായിരിക്കുകയാണ് സി.ബി.ഐ നടപടി. അതേസമയം സി.ബി.ഐയെ ഉപയോഗിച്ച് കേന്ദ്രസര്‍ക്കാര്‍ രാഷ്ട്രീയം കളിക്കുകയാണെന്ന് സി.പി.എം ആരോപിക്കുന്നു. കണ്ണൂരില്‍ നിന്നോ, വടകര നിന്നോ ലോക്‌സഭാ തെരഞ്ഞെടുപ്പില്‍ പി.ജയരാജന്‍ മത്സരിക്കാന്‍ സാധ്യതയുണ്ട്. സ്ഥാനാര്‍ത്ഥി സാധ്യാതാ പട്ടികയില്‍ അദ്ദേഹം ഉണ്ട്.

പി.ജയരാജനെയും, ടി.വി. രാജേഷിനെയും പ്രതി ചേര്‍ത്ത് എറണാകുളം സി.ജെ.എം കോടതിയില്‍, സി.ബി.ഐ 2016 ഏപ്രില്‍ 22ന് കുറ്റപത്രം സമര്‍പ്പിച്ചിരുന്നു. ആ കുറ്റപത്രത്തില്‍ കൊലക്കുറ്റം ആരോപിച്ചിട്ടില്ലായിരുന്നു. പി ജയരാജന്‍ കേസില്‍ മുപ്പത്തിരണ്ടാം പ്രതിയും, ടി.വി രാജേഷ് മുപ്പത്തിമൂന്നാം പ്രതിയുമാണ്. പൊലീസിന്റെ കുറ്റപത്രത്തിലും ഇവര്‍ രണ്ടു പേരും പ്രതികളായിരുന്നു. 2012 മാര്‍ച്ച് 22 സി.പി.എം നേതാവ് എം.വി. ഗോവിന്ദന്റെ മകന്‍ ശ്യാംജിത്ത് , തളിപ്പറമ്പ് നഗരസഭ മുന്‍ ചെയര്‍മാനും ഏരിയ കമ്മിറ്റി അംഗവുമായ വാടി രവിയുടെ മകന്‍ ബിജുമോന്‍ എന്നിവരുള്‍പ്പെടെ 18 പേരുടെ ആദ്യ പ്രതിപ്പട്ടിക അന്വേഷണ സംഘം കോടതിയില്‍ സമര്‍പ്പിച്ചു. ഇവരില്‍ നിന്നാണ് കൊലപാതകത്തിന്റെ ചുരുളഴിഞ്ഞത്.

2012 ആഗസ്റ്റ് ഒന്നിന് സി.പി.എം കണ്ണൂര്‍ ജില്ലാ സെക്രട്ടറി പി. ജയരാജനെ സി.ബി.ഐ അറസ്റ്റ് ചെയ്തു . അറസ്റ്റില്‍ പ്രതിഷേധിച്ചു വ്യാപക അക്രമങ്ങള്‍നടന്നു. പി. ജയരാജന്‍ നല്‍കിയ ജാമ്യാപേക്ഷയും ടി.വി. രാജേഷ് എംഎല്‍എ നല്‍കിയ മുന്‍കൂര്‍ ജാമ്യാപേക്ഷയും ഹൈക്കോടതി ആഗസ്റ്റ് ഏഴിന് തള്ളി. ടി.വി. രാജേഷ് എംഎല്‍എ കണ്ണൂര്‍ കോടതിയില്‍ കീഴടങ്ങി. ആഗസ്റ്റ് 27ന് 25,000 രൂപയുടെ സ്വന്തം ജാമ്യവും തുല്യതുകയ്ക്കുള്ള രണ്ട് ആള്‍ ജാമ്യവും എന്ന ഉപാധിയില്‍ പി. ജയരാജന് ഹൈക്കോടതി ജാമ്യം അനുവദിച്ചു. സി.പി.എമ്മും ബി.ജെ.പിയും ചേര്‍ന്ന് കേസ് അട്ടിമറിക്കാന്‍ ശ്രമിച്ചെന്ന് മുസ്്‌ലിംലീഗ് പലപ്പോഴും ആരോപിച്ചിരുന്നു. അത് തെറ്റാണെന്ന് തെളിയിക്കുന്നതാണ് കൊല നടന്ന് ഏഴ് വര്‍ഷത്തിന് ശേഷമുള്ള സി.ബി.ഐയുടെ രണ്ടാമത്തെ കുറ്റപത്രം.