ശബരിമല യുവതീപ്രവേശന വിധിയെ എതിര്‍ക്കുന്ന തന്ത്രി കണ്ഠരര് രാജീവരര് മുമ്പ് പണം വാങ്ങി പല യുവതികളെയും പതിനെട്ടാംപടി കയറ്റി ദര്‍ശനം നടത്തിച്ചിട്ടുണ്ടെന്ന് മന്ത്രി ജി.സുധാകരന്‍ വെളിപ്പെടുത്തി. യുവതീപ്രവേശനത്തില്‍ സി.പി.എം സ്വീകരിച്ച നിലപാണ് ശരിയാണ്. കമ്മ്യൂണിസ്റ്റുകാരെല്ലാം അവിശ്വാസികളല്ല. ക്ഷേത്രത്തില്‍ പോകുന്നവര്‍ മാത്രമല്ല വിശ്വാസികള്‍. ശ്രീനാരായണ ഗുരുദേവന്‍ ഒരു ക്ഷേത്രത്തിലും പോയിട്ടില്ല. ഗാന്ധിയും ടഗോറും തൊഴാന്‍ പോയിട്ടില്ല. അവിശ്വാസികള്‍ എന്നൊരു വിഭാഗമില്ല. യുവതീപ്രവേശത്തെ അനുകൂലിച്ച ശേഷം സ്ഥാപിത താല്‍പര്യങ്ങള്‍ക്കായി ബിജെപി നടത്തിയ സമരങ്ങളെല്ലാം ചീറ്റിപ്പോയി. ശബരിമല സംഘര്‍ഷഭൂമിയാക്കേണ്ടത് ബിജെപിയുടെ ആവശ്യമാണ്. അതു പൊളിഞ്ഞെന്നും മന്ത്രി ആരോപിച്ചു.

തന്ത്രിക്കെതിരെ ഇത് ആദ്യമായല്ല മന്ത്രി ജി.സുധാകരന്‍ വ്യക്തിപരമായ ആരോപണങ്ങള്‍ ഉന്നയിക്കുന്നത്. യുവതികളെത്തിയാല്‍ നടയടച്ച് താക്കോല്‍ കൈമാറുമെന്ന് തന്ത്രി പറഞ്ഞപ്പോള്‍ വിമര്‍ശനവുമായി അദ്ദേഹം രംഗത്തെത്തിയിരുന്നു. ഹര്‍ത്താലിന് കടയടച്ച് പോകുന്ന ലാഘവത്തോടെയാണ് തന്ത്രി നട അടയ്ക്കുന്ന കാര്യം പറഞ്ഞത്. ഞങ്ങള്‍ ഒന്നും പറയുന്നില്ല, വിശ്വാസികള്‍ ഇക്കാര്യം ചര്‍ച്ച ചെയ്യണം. ശബരിമലയില്‍ പൗരോഹിത്വത്തിന്റെ തകര്‍ച്ചയുടെ മണിമുഴക്കമാണ് കേള്‍ക്കുന്നതെന്നും പറഞ്ഞു. കനകദുര്‍ഗയും ബിന്ദുവും ദര്‍ശനം നടത്തിയതിന് പിന്നാലെ തന്ത്രി നടയടച്ച് ശുദ്ധിക്രീയ നടത്തിയപ്പോള്‍ അതിരൂക്ഷവിമര്‍ശനമാണ് ജി.സുധാകരന്‍ നടത്തിയത്.

തന്ത്രിയല്ല ബ്രാഹ്മണരാക്ഷസാണ്, മനുഷ്യരായ ആരെങ്കിലും ചെയ്യുന്ന നടപടിയാണോ അദ്ദേഹം ചെയ്തത്. കോടതി വിധി നടപ്പാക്കാനാകുന്നില്ലെങ്കില്‍ പറത്ത് പോകണം. ഞങ്ങളാരെയും പുറത്താക്കാന്‍ ഉദ്ദേശിക്കുന്നില്ല. ശബരിമലയിലെ കാര്യങ്ങള്‍ ഭംഗിയായി നടത്താനാണ് അദ്ദേഹത്തെ നിയമിച്ചിരിക്കുന്നത്. തന്ത്രി സ്ഥാനവും വേണം കോടതിവിധി നടപ്പാക്കാനും പറ്റില്ലെന്ന നിലപാട് ശരിയല്ലെന്നും ജി.സുധാകരന്‍ ചൂണ്ടിക്കാട്ടിയിരുന്നു.

ശുദ്ധിക്രീയ നടത്തിയ തന്ത്രിയോട് ദേവസ്വംബോര്‍ഡ് വിശദീകരണം തേടുകയും വിധി നടപ്പാക്കാനാവുന്നില്ലെങ്കില്‍ തന്ത്രി സ്വയം സ്ഥാനം ഒഴിയണമെന്നും മുഖ്യമന്ത്രി പറയുകയും ചെയ്തതിന് പിന്നാലെ ജി. സുധാകരനും രംഗത്തെത്തിയിരുന്നു. തന്ത്രിയെ മാറ്റാനാവില്ലെന്ന് താഴമണ്‍കുടുംബത്തിലുള്ളവര്‍ അടക്കം പറയുന്നത് ശരിയല്ല, ഞാന്‍ തന്ത്രിയെ മാറ്റിയിട്ടുണ്ടെന്ന് ജി.സുധാകരന്‍ പറഞ്ഞു. താന്‍ ദേവസ്വം മന്ത്രിയായിരിക്കുമ്പോഴാണ് തന്ത്രി കണ്ഠരര് മോഹനരെ മാറ്റിയത്. മാറ്റരുതെന്ന് അദ്ദേഹത്തിന്റെ പിതാവ് മഹേശ്വരര് തന്നെ വന്ന് കണ്ട് പറഞ്ഞിരുന്നു. പറ്റില്ലെന്ന് അറിയിച്ചു. അതുകൊണ്ട് തന്ത്രിയെ മാറ്റാനാവില്ലെന്ന് പറയുന്നതില്‍ കഴമ്പില്ലെന്നും ജി.സുധാകരന്‍ വ്യക്തമാക്കിയിരുന്നു. തന്ത്രി പണം വാങ്ങി യുവതികളെ ശബരിമലയില്‍ കയറ്റിയിട്ടുണ്ടെന്ന് മുമ്പും ആരോപണം ഉയര്‍ന്നിട്ടുണ്ട്.

തന്ത്രി കണ്ഠരര് രാജീവര്‍ക്ക് അയ്യായിരം രൂപ നല്‍കി വര്‍ഷങ്ങള്‍ക്ക് മുമ്പ് താന്‍ പതിനെട്ടാംപടി ചവുട്ടി മലയറി ദര്‍ശനം നടത്തിയെന്നും അതിന് ശേഷമാണ് മകന്‍ ജനിച്ചതെന്നും ലക്ഷ്മി രാജീവ് വെളിപ്പെടുത്തിയിരുന്നു. ഇക്കാര്യം നിഷേധിക്കാന്‍ തന്ത്രി ഇതുവരെ തയ്യാറായിട്ടില്ല. കേരളത്തിലെ ക്ഷേത്രങ്ങളെ കുറിച്ച് ആധികാരികമായി പഠനം നടത്തുകയും പുസ്തകം എഴുതുകയും ചെയ്യുന്നയാളാണ് ലക്ഷ്മി രാജീവ്. തന്ത്രി രാജീവരര് അന്ന് ചെന്നൈയിലെ ഒരു ക്ഷേത്രത്തില്‍ ജോലി ചെയ്യുകയായിരുന്നു. അദ്ദേത്തിന്റെ ഒരു ഏജന്റ് വഴിയാണ് കണ്ടത്. പണം നല്‍കിയ ശേഷമേ രാജീവരരെ കാണാന്‍ അനുമതി ലഭിച്ചുള്ളൂ. കണ്ടപ്പോള്‍ ശബരിമല ദര്‍ശനം നടത്താന്‍ തയ്യാറായിക്കൊള്ളൂ എന്നാണ് രാജീവരര് ഉറപ്പ് നല്‍കിയതെന്നും ലക്ഷ്മി രാജീവ് വെളിപ്പെടുത്തിയിരുന്നു.