ഹര്ത്താലിനെതിരെ വ്യാപാരികള്ക്ക് പിന്നാലെ വ്യവസായികളും നിലപാട് കടുപ്പിക്കുന്നു... അടിക്കടിയുണ്ടാകുന്ന ഹര്ത്താലുകള് കാരണം കോടിക്കണക്കിന് രൂപയുടെ നഷ്ടം വരുന്ന സാഹചര്യത്തിലാണ് പുതിയ നിലപാട്
ഹര്ത്താലിനെതിരെ വ്യാപാരികള്ക്ക് പിന്നാലെ വ്യവസായികളും നിലപാട് കടുപ്പിക്കുന്നു... അടിക്കടിയുണ്ടാകുന്ന ഹര്ത്താലുകള് കാരണം കോടിക്കണക്കിന് രൂപയുടെ നഷ്ടം വരുന്ന സാഹചര്യത്തിലാണ് കടുത്ത നിലപാടിലേക്ക് കടക്കുന്നത്. ഹര്ത്താലിനെതിരെ ശക്തമായ നടപടി സ്വീകരിക്കാത്ത രാഷ്ട്രീയ പാര്ട്ടികള്ക്കും സംഘടനകള്ക്കും സംഭാവന നല്കേണ്ടതില്ലെന്നാണ് തീരുമാനം.
കൊച്ചിയില് ചേര്ന്ന വാണിജ്യ, വ്യവസായ സംഘടനകളുടെ യോഗത്തിലാണ് പുതിയ തീരുമാനം എടുത്തത്. മുഖ്യമന്ത്രി പിണറായി വിജയനേനും എല്ലാ രാഷ്ട്രീയ പാര്ട്ടികളുടെയും നേതാക്കളെയും നേരില്ക്കണ്ട് ഇക്കാര്യം അറിയിക്കും. മുഖ്യമന്ത്രിയും മന്ത്രി കടകംപള്ളി സുരേന്ദ്രനും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും ഹര്ത്താലുകള്ക്കെതിരായ നിലപാട് സ്വീകരിച്ചിട്ടുണ്ട്. ടൂറിസം മേഖലയെ ഹര്ത്താലില് നിന്ന് ഒഴിവാക്കണമെന്ന് കോടിയേരി ടൂറിസം മന്ത്രിയായിരുന്ന കാലത്ത് ആവശ്യപ്പെട്ടതാണ്. കോണ്ഗ്രസ് ഉള്പ്പെടെയുള്ള പാര്ട്ടികള് അതിനെ എതിര്ത്തിരുന്നു.
എല്ലാ രാഷ്ട്രീയ പാര്ട്ടികളുടെയും തെരഞ്ഞെടുപ്പ് പ്രവര്ത്തനങ്ങള്ക്കും സമ്മേളനങ്ങള്ക്കും അടക്കം വ്യവസായികള് വലിയ തുക സംഭാവന നല്കുന്നുണ്ട്. അതിനാല് തങ്ങളുടെ നിലപാടുമായി സഹകരിക്കുന്നവര്ക്ക് മാത്രം എല്ലാവിധ പിന്തുണയും നല്കും. ലോക്സഭാ തെരഞ്ഞെടുപ്പ് അടുത്തിരിക്കുന്ന സാഹചര്യത്തില് രാഷ്ട്രീയ പാര്ട്ടികളെ പ്രതിരോധത്തിലാക്കുന്നതാണ് ഈ തീരുമാനം. തങ്ങളുടെ പക്കല് നിന്ന് നല്ല തുക സംഭാവന സ്വീകരിക്കുകയും ബിസിനസിനെ ബാധിക്കുന്ന ഹര്ത്താലുകള്ക്ക് പിന്തുണ നല്കുകയും ചെയ്യുന്നത് ഇരട്ടത്താപ്പാണെന്ന് വ്യവസായികള് ആരോപിക്കുന്നു. ഹര്ത്താലിന്റെ മറവില് നടക്കുന്ന അക്രമങ്ങളില് വ്യവസായ, വാണിജ്യ മേഖലയ്ക്ക്് വലിയ നഷ്ടമാണ് സംഭവിക്കുന്നതെന്ന് സംഘടനാ പ്രതിനിധികള് ചൂണ്ടിക്കാട്ടുന്നു. ഇതിനെതിരെ നിയമം നടപ്പാക്കാനുള്ള സര്ക്കാര് തീരുമാനം സ്വാഗതാര്ഹമാണെന്നും അവര് പറഞ്ഞു.
ഹര്ത്താല് നിമിത്തം സംഭവിക്കുന്ന നഷ്ടങ്ങളെ കുറിച്ചും മറ്റ് വിഷമതകളെ കുറിച്ചും ജനങ്ങളെ ബോധവല്ക്കരിക്കാന് പ്രചരണങ്ങള് നടത്താനും യോഗം തീരുമാനിച്ചു. അതോടൊപ്പം ഹര്ത്താല് നിരോധിക്കണമെന്ന് ആവശ്യപ്പെട്ട് നിയമനടപടികള് സ്വീകരിക്കും. സ്ഥാപനങ്ങള്ക്ക് നേരെയുണ്ടാകുന്ന അക്രമങ്ങള് സംഘടന ഒറ്റയ്ക്ക് നേരിടും.ഇതിനുള്ള കര്മ്മ പദ്ധതി തയ്യാറാക്കാന് ഒന്പതംഗ സബ് കമ്മറ്റിയെ യോഗം തെരഞ്ഞെടുത്തു. ഫെഡറേഷന് ഓഫ് ഇന്ത്യന് ചേന്പര് ഓഫ് കൊമേഴ്സ് ആന്റ് ഇന്ഡസ്ട്രീസ് ആണ് വിവിധ ജില്ലകളില് നിന്നുള്ള വാണിജ്യ വ്യവസായ സംഘടനാ പ്രതിനിധികളെ പങ്കെടുപ്പിച്ച് വാണിജ്യ തലസ്ഥാനമായ കൊച്ചിയില് യോഗം സംഘടിപ്പിത്.
ശബരിമല യുവതീപ്രവേശനത്തോട് അനുബന്ധിച്ച് ബി.ജെ.പിയും സംഘപരിവാര് സംഘടനകളും മൂന്ന് മാസത്തിനിടെ നിരവധി ഹര്ത്താലുകള് നടത്തിയതിലൂടെ വലിയ നഷ്ടമാണ് വ്യാപികള്ക്കും വ്യവസായികള്ക്കും സംഭവിച്ചത്. ഹര്ത്താലിനിടെ കടകള്ക്കും സ്ഥാപനങ്ങള്ക്കും നേരെ വ്യാപക അക്രമമാണ് നടന്നത്. കുറേനാള് മുമ്പ് സമൂഹമാധ്യമങ്ങളിലൂടെ പെട്ടെന്ന് ഹര്ത്താല് പ്രഖ്യാപിച്ച് കടകളും വാണിജ്യസ്ഥാപനങ്ങളും അടപ്പിക്കുകയും തയ്യാറാകാത്തവര്ക്ക് നേരെ കയ്യേറ്റവും നടന്നിരുന്നു. ഇത്തരം സംഭവങ്ങള് പ്രാദേശികമായി ഉള്പ്പെടെ വര്ദ്ധിച്ചുവരുന്ന സാഹചര്യത്തിലാണ് വ്യവസായ, വാണിജ്യ പ്രതിനിധികളുടെ സംഘടനയുടെ പുതിയ തീരുമാനം.
https://www.facebook.com/Malayalivartha
