അസ്വസ്ഥരായി കോണ്ഗ്രസ് നേതാക്കള്; എ.കെ.ആന്റണിയുടെ മകനു കോണ്ഗ്രസിന്റെ കേരളത്തിലെ സമൂഹമാധ്യമ ചുമതല നല്കിയതിനെ ചോദ്യം ചെയ്തു പ്രമേയം പാസാക്കിയ എറണാകുളം ജില്ലാ കമ്മിറ്റിയോടു വിശദീകരണം ചോദിച്ച് കെഎസ്യു സംസ്ഥാന നേതൃത്വം
കെ.എസ്.യുവില് തമ്മിലടിയോ. നേതാക്കളെ വിമര്ശിച്ച് എറണാകുളം പ്രമേയം. വിശദീകരണം ചോദിച്ച് കെഎസ്യു. എ.കെ.ആന്റണിയുടെ മകനു കോണ്ഗ്രസിന്റെ കേരളത്തിലെ സമൂഹമാധ്യമ ചുമതല നല്കിയതിനെ ചോദ്യം ചെയ്തു പ്രമേയം പാസാക്കിയ എറണാകുളം ജില്ലാ കമ്മിറ്റിയോടു വിശദീകരണം ചോദിച്ച് കെഎസ്യു സംസ്ഥാന നേതൃത്വം. 2 ദിവസത്തിനുള്ളില് മറുപടി നല്കാന് ജില്ലാ പ്രസിഡന്റിനോട് ആവശ്യപ്പെട്ടിട്ടുണ്ടെന്നു കെഎസ്യു സംസ്ഥാന പ്രസിഡന്റ് കെ.എം.അഭിജിത് പറഞ്ഞു. സംഘടനയെ പ്രതിക്കൂട്ടിലാക്കിക്കൊണ്ടുള്ള വിമര്ശനങ്ങള് പാടില്ലെന്നു ജില്ലാഘടകങ്ങള്ക്കു നിര്ദേശം നല്കി. കാര്യം അറിയാതെയുള്ള വിമര്ശനം പാടില്ല. ഗുജറാത്ത് നിയമസഭാ തിരഞ്ഞെടുപ്പിലെ മികച്ച പ്രകടനത്തിന്റെ അടിസ്ഥാനത്തിലാണ് ആന്റണിയുടെ മകനു കേരളത്തിന്റെ ചുമതല നല്കിയത്. അദ്ദേഹത്തിന്റെ കഴിവും മികവും കണ്ടാണ് എഐസിസി നിയമനം കൊടുത്തത്. പാര്ട്ടി തെറ്റ് ചെയ്താല് ചൂണ്ടിക്കാണിക്കും. ഒരു നേതാവും വിമര്ശനത്തിന് അതീതനല്ല. പക്ഷേ, അടിസ്ഥാനരഹിതമായ ആരോപണങ്ങള് ഉന്നയിക്കില്ല. മകന് അനിലിന്റെ നിയമനവുമായി ബന്ധപ്പെട്ട് എ.കെ.ആന്റണിയുടെ പേരു വലിച്ചിഴച്ചതു ശരിയായില്ല. മാതാവും പിതാവും കോണ്ഗ്രസ് പ്രവര്ത്തകരായതുകൊണ്ട് മക്കള്ക്കു വിലക്കേര്പ്പെടുത്തുന്നതിനോടു യോജിപ്പില്ല. പക്ഷേ, അവര് പോഷകസംഘടനകളിലൂടെ വളര്ന്നു വന്നവരായിരിക്കണമെന്നു മാത്രം. യുവാക്കളെ സ്ഥാനാര്ഥിയാക്കണമെന്നു കെഎസ്യു പറഞ്ഞിട്ടില്ല.
തിരഞ്ഞെടുപ്പില് വിജയമാണു പ്രധാനം. പ്രായമല്ല. മലബാറില്നിന്നു സ്ഥാനാര്ഥികള് ഉണ്ടാവണമെന്ന നിര്ദേശം വച്ചിട്ടുണ്ട്. എ.കെ.ആന്റണിക്കെതിരായ കെ എസ് യു പ്രമേയത്തില് അസ്വസ്ഥരായി സംസ്ഥാനത്തെ കോണ്ഗ്രസ് നേതാക്കള്. പരസ്യമായ വിഴുപ്പലക്കലിനെ ഗൗരവമായി കാണുമെന്ന് എ ഐ സി സി ജനറല് സെക്രട്ടറി കെ.സി.വേണുഗോപാല് പ്രതികരിച്ചു. ആന്റണിയെ ആക്ഷേപിക്കാന് തുമ്പിയെക്കൊണ്ട് കല്ലെടുപ്പിക്കുന്നവരെ കാലം തിരിച്ചറിയുമെന്നായിരുന്നു മുന് മന്ത്രി കെ.ബാബുവിന്റെ പ്രതികരണം. കെപിസിസി ഡിജിറ്റല് മീഡിയ വിഭാഗം തലവനായി എ.കെ.ആന്റണിയുടെ മകന് അനില് ആന്റണിയെത്തിയതിനെ പരോക്ഷമായി വിമര്ശിച്ച് കെ എസ് യു എറണാകുളം ജില്ലാ സമ്മേളനത്തില് അവതരിപ്പിക്കപ്പെട്ട പ്രമേയമാണ് ആന്റണിയോട് അടുത്തു നില്ക്കുന്ന കോണ്ഗ്രസ് നേതാക്കളെ ചൊടിപ്പിച്ചത്. മുന് കെ എസ് യു പ്രസിഡന്റും എ ഐ സി സി ജനറല് സെക്രട്ടറിയുമായ കെ.സി.വേണുഗോപാലാണ് എ.കെ.ആന്റണിയ്ക്ക് പിന്തുണയുമായി ആദ്യമെത്തിയത്. മകനെ രാഷ്ട്രീയത്തില് ഇറക്കിയതില് ആന്റണിക്ക് പങ്കില്ലെന്ന വിശദീകരണമാണ് കെ.ബാബു ഫെയ്സ് ബുക്കില് കുറിച്ചത്. ഐ ടി വിദഗ്ധനായ അനിലിനെ കെ പി സി സി പ്രസിഡന്റ് നേരിട്ടാണ് ഡിജിറ്റല് മീഡിയ തലവനാക്കിയതെന്നും ബാബു വിശദീകരിക്കുന്നു. അതേ സമയം, പ്രമേയം അവതരിപ്പിച്ച കെ എസ് യു നേതാക്കള്ക്കെതിരെ നടപടിയാവശ്യപ്പെട്ട് പല മുതിര്ന്ന കോണ്ഗ്രസ് നേതാക്കളും എറണാകുളം ഡി സി സി നേതൃത്വത്തിനു മേല് സമ്മര്ദ്ദം ശക്തമാക്കിയിട്ടുണ്ട്. എന്നാല് ഒരു നേതാവിന്റെ പോലും പേരെടുത്ത് വിമര്ശിക്കാത്ത പ്രമേയത്തിന്റെ പേരില് അച്ചടക്ക നടപടി സാധ്യമല്ലെന്ന നിലപാടിലാണ് ഡി സി സി നേതൃത്വം.
https://www.facebook.com/Malayalivartha
