കുംഭമാസപൂജകൾക്കായി ഇന്നലെ ശബരിമല നട തുറന്നതിനു പിന്നാലെ ശബരിമലയിൽ ആചാരാനുഷ്ഠാനങ്ങൾ സംരക്ഷിക്കണമെന്നാവശ്യപ്പെട്ട് ജില്ലാ കേന്ദ്രങ്ങളിൽ ബിജെപി ഇന്ന് സത്യഗ്രഹം സംഘടിപ്പിക്കുന്നു. തിരുവനന്തപുരത്ത്, ഒ രാജഗോപാൽ സെക്രട്ടറിയേറ്റിന് മുന്നിൽ സത്യഗ്രഹം ഉദ്ഘാടനം ചെയ്യും.

തൃശ്ശൂരിൽ സംസ്ഥാന അധ്യക്ഷൻ അഡ്വ. പി എസ്‌ ശ്രീധരൻ പിള്ളയാണ് ഉദ്ഘാടനം നിർവഹിക്കുക. കോട്ടയത്ത് എ എൻ രാധാകൃഷ്ണനും എറണാകുളത്ത് പി കെ കൃഷ്ണദാസും പാലക്കാട് ശോഭ സുരേന്ദ്രനും കാസർകോട് കെ സുരേന്ദ്രനും സമരപരിപാടി ഉദ്ഘാടനം ചെയ്യും. കുംഭമാസ പൂജകൾക്ക് ശേഷം ഞായറാഴ്ച രാത്രി 10ന് നടയടയ്ക്കും. സ്ത്രീ പ്രവേശന വിധിയെ തുടർന്ന് മണ്ഡല-മകരവിളക്ക് സീസണിൽ ഉണ്ടായ സംഘർഷങ്ങൾ കണക്കിലെടുത്ത് കർശന സുരക്ഷയാണ് ശബരിമലയിൽ ഏർപ്പെടുത്തിയിരിക്കുന്നത്.