ജമ്മുകാശ്മീരില്‍ നടന്ന ഭീകരാക്രമണത്തില്‍ വീരമൃത്യുവരിച്ച ജവാന്മാരുടെ കുടുംബത്തിനായി വിവിധ സര്‍ക്കാരുകള്‍ ധനസഹായങ്ങള്‍ പ്രഖ്യാപിച്ചു.വീരമൃത്യുവരിച്ച മലയാളി ജവാനായ വി.വി വസന്തകുമാറിന്റെ കുടുംബത്തിനുവേണ്ടി കേരള സര്‍ക്കാര്‍ എന്ത് സഹായമാണ് പ്രഖ്യാപിച്ചത്.
തമിഴ്‌നാട്ടില്‍ നിന്നുള്ള ജവാന്മാരുടെ കുടുംബത്തിന് ധനസഹായമായി 20 ലക്ഷം രൂപ വീതം നല്‍കുമെന്ന് തമിഴ്‌നാട് മുഖ്യമന്ത്രി എടപ്പാടി കെ പളനി സ്വാമി പ്രഖ്യാപിച്ചിരുന്നു.ജമ്മുകാശ്മീരില്‍ നടന്ന ആക്രമണത്തില്‍ തമിഴ്‌നാട്ടില്‍ നിന്നുള്ള രണ്ട് ഉദ്യോഗസ്ഥരാണ് കൊല്ലപ്പെട്ടത്.

ഉത്തരാഖണ്ഡ് സ്വദേശികളായ ജവാന്മാരുടെ കുടുംബത്തിന് ധനസഹായവും സര്‍ക്കാര്‍ ജോലിയും നല്‍കുമെന്ന് മുഖ്യമന്ത്രി ത്രിവേദ സിംഗ് പറഞ്ഞു. മരിച്ച ജവാന്മാരുടെ കുടുംബത്തിന് 25 ലക്ഷം രൂപ വീതം നല്‍കുമെന്നാണ് അറിയിച്ചിരിക്കുന്നത്. കൊല്ലപ്പെട്ട ജവാന്റെ കുടുംബത്തിലെ ഒരാള്‍ക്ക് സര്‍ക്കാര്‍ ജോലി നല്‍കുമെന്നും മുഖ്യമന്ത്രി ത്രിവേദ സിംഗ് അറിയിച്ചു. ത്രിപുര സര്‍ക്കാര്‍ 2 ലക്ഷവുമാണ് പ്രഖ്യാപിച്ചത്. ഭീകരാക്രമണത്തില്‍ കൊല്ലപ്പെട്ടവരില്‍ ഒരു മലയാളിയും ഉണ്ടായിരുന്നു.വയനാട് ലക്കിടി സ്വദേശി വിവി വസന്തകുമാറാണ് കൊല്ലപ്പെട്ട മലയാളി.

പതിനെട്ട് വര്‍ഷത്തെ രാജ്യസേവനത്തിന് ശേഷമാണ് വി.വി വസന്തകുമാര്‍ വീരമൃത്യു വരിക്കുന്നത്. രണ്ട് വര്‍ഷത്തെ സേവനം കൂടി പൂര്‍ത്തിയാക്കി നാട്ടിലേക്ക് മടങ്ങാനിരിക്കുകയായിരുന്നു. ഇതിനിടെ നാട്ടില്‍ അവധിക്ക് വന്ന് കഴിഞ്ഞ ഒമ്ബതാം തീയതിയാണ് ബറ്റാലിയന്‍ മാറ്റം കിട്ടി വസന്തകുമാര്‍ കശ്മീരിലേക്ക് മടങ്ങിയത്. വീരമൃത്യുവരിച്ച ജവാന്റെ കുടുംബത്തിന് കേരള സര്‍ക്കാര്‍ എന്തെങ്കിലും ധനസഹായം പ്രഖ്യാപിക്കുമോ എന്നാണ് കേരളജനത ചോദിക്കുന്നത്.