തിരുവനന്തപുരം: പിതൃക്കളെ മനസാ ധ്യാനിച്ച് എള്ളും പൂവും ചന്ദനവും വെള്ളം തൊട്ട് സമര്‍പ്പയാമി എന്ന് പരികര്‍മ്മികള്‍ പറയുമ്പോള്‍ സമര്‍പ്പിക്കാന്‍ വെള്ളം അന്വേഷിച്ച് നടക്കേണ്ട ഗതികേടിലേക്ക് ബലിയിടാന്‍ എത്തുന്നവരെ തള്ളിയിട്ട കിണ്ടിക്കള്ളനെ രക്ഷിക്കാന്‍ അന്വേഷണ റിപ്പോര്‍ട്ട് പൂഴ്ത്തി തിരുവിതാംകൂര്‍ ദേവസ്വം ബോര്‍ഡ്. കേരളത്തിലെ ഏക പരശുരാമ ക്ഷേത്രമായ തിരുവനന്തപുരം തിരുവല്ലം പരശുരാമ ക്ഷേത്രത്തില്‍ ബലികര്‍മ്മങ്ങള്‍ക്കും മറ്റുമായി നിലവാരം കുറഞ്ഞ കിണ്ടികള്‍ വാരിക്കൂട്ടിയ സംഭവത്തിലെ കുറ്റക്കാരെ രക്ഷിക്കാനാണ് ഇവര്‍ക്ക് എതിരെയുള്ള അന്വേഷണ റിപ്പോര്‍ട്ട് ബോര്‍ഡ് ഉന്നതര്‍ പൂട്ടിയത്.

ദേവസ്വം ബോര്‍ഡിന് ആവശ്യമായ സാധനങ്ങള്‍ വാങ്ങേണ്ട ചുമതല ആറിന്‍മുളയിലെ തിരുവാഭരണ കമ്മീഷണര്‍ ഓഫീസിനാണ്. ക്ഷേത്രങ്ങളിലേക്ക് ആവശ്യമുള്ള സാധനങ്ങള്‍ ക്ഷേത്രാധികാരിയുടെ അപേക്ഷയില്‍ അനേവഷണം നടത്തി ആവശ്യമെങ്കില്‍ വാങ്ങാനുള്ള അനുമതി നല്‍കുന്നത് തിരുവാഭരണ കമ്മീഷണറാണ്. ഇവിടെ സ്‌റ്റോക്കുള്ള സാധനങ്ങള്‍ ഇവിടെ നിന്ന് നല്‍കുകയാണ് സാധാരണ ശതിയില്‍ ചെയ്യുന്നത്. സ്‌റ്റോക്ക് ഇല്ലാത്തവ ആവശ്യാനുസരണം വാങ്ങാന്‍ കമ്മീഷണറ അനുമതി നല്‍കാറുമുണ്ട്. ഇതിനാകട്ടെ ക്വട്ടേഷന്‍ ക്ഷണിച്ച് ഏറ്റവും കുറഞ്ഞ ക്വട്ടേഷന്‍ അനുവദിച്ചു നല്‍കുകയാണ് പതിവ്.

തിരുവല്ലത്ത് കിണ്ടി ഉള്‍പ്പെടെയുള്ളവ സാധാരണ ഗതിയില്‍ വാങ്ങിയിരുന്നത് ആറ്റിങ്ങലിലെ ഒരു കടയില്‍ നിന്നായിരുന്നു. എന്നാല്‍ ക്വട്ടേഷന്‍ കുറച്ചു കാണിച്ച മറ്റൊരു കടയില്‍ നിന്ന് വാങ്ങിക്കൂട്ടിയ കിണ്ടികളാണ് ഉപയോഗയേഗ്യമല്ലാതായത്. നിലവാരം കുറഞ്ഞ സാധനങ്ജളാണ് വാങ്ങുന്നതെന്ന മുന്നറിയിപ്പ് അവഗണിച്ചാണ് ക്ഷേത്രത്തിന്റെ ചുമതലയുള്ള ഉദ്യോഗസ്ഥന്‍ ആവശ്യത്തിലുമധികം വാങ്ങിക്കൂട്ടിയത്. ഇങ്ങനെ വാങ്ങിച്ച കിണ്ടികള്‍ക്ക് ചോര്‍ച്ച ഉള്ളതുമൂലം ബലികര്‍മ്മങ്ങള്‍ക്ക് ഉപയോഗിക്കാനുമായില്ല. ബലി ചെയ്യാനിരിക്കുന്നവര്‍ കിണ്ടിയില്‍ നിന്ന് വെള്ളം ചോര്‍ന്നുപോയതുമായി ബന്ധപ്പെട്ട് പരികര്‍മ്മികളുമായി വാക്കേറ്റം ഉണ്ടായി.

ഇതുസംബന്ധിച്ച് ആളുകള്‍ അന്നത്തെ ദേവസ്വം കമ്മീഷണറായിരുന്ന രാമരാജ പ്രേമപസാദിന് പരാതി നല്‍കിയതിന്റെ അടിസ്ഥാനത്തില്‍ അദ്ദേഹം അന്വേഷണം നടത്തി സംഭവത്തിലെ അഴിമതി കണ്ടെത്തുകയും കുറ്റക്കാര്‍ക്കെതിരെ നടപടിക്ക് ബോര്‍ഡിന് ശിപാര്‍ശയും നല്‍കിയിരുന്നു. ഈ റിപ്പോര്‍ട്ടാണ് ദേവസ്വം ബോര്‍ഡിലെ ഉന്നതര്‍ ഇപ്പോള്‍ പൂഴ്ത്തിയിരിക്കുന്നത്. കുറ്റക്കാരുമായി മുന്‍ ദേവന്വം ബോര്‍ഡ് മെമ്പര്‍ കെ.രാഘവന്‍ വാക്കേറ്റം ഉണ്ടായതും മറച്ചുവെച്ചാണ് ഇപ്പോള്‍ കുറ്റക്കാരെ ബോര്‍ഡ് സംരക്ഷിക്കുന്നത്.