കാസര്‍കോട്ടെ യൂത്ത് കോണ്‍ഗ്രസ് പ്രവര്‍ത്തകരുടെ  കൊലപാതകം ആസൂത്രണം. പ്രതികളെല്ലാം വക്കീലന്‍മാര്‍ പറഞ്ഞ് പഠിപ്പിച്ച, ഒരേ രീതിയിലുള്ള മൊഴികളാണ് നല്‍കിയത്. ഇത് അന്വേഷണ സംഘത്തെ കുഴയ്ക്കുന്നു. തങ്ങള്‍ കഞ്ചാവിന്റെ ലഹരിയിലാണ് കൊലപാതകം നടത്തിയതെന്ന് പറഞ്ഞത് തന്നെ കേസ് വഴിതിരിച്ച് വിടുന്നതിനാണെന്ന് പൊലീസ് സംശയിക്കുന്നു.

ഇതിനെല്ലാം പുറമേ പൊലീസിന് മേല്‍ രാഷ്ട്രീയ സമ്മര്‍ദ്ദവുമുണ്ട്. സംഭവം വിവാദമായതോടെ പ്രധാനപ്രതി പീതാംബരന്‍ പാര്‍ട്ടി നിര്‍ദ്ദേശപ്രകാരം കീഴടങ്ങിയതാണെന്ന് അറിയുന്നു. അല്ലാതെ പൊലീസ് പറയും പോലെ പിടികൂടിയതല്ലെന്നും ആക്ഷേപം ഉയര്‍ന്നിട്ടുണ്ട്. ചോദ്യം ചെയ്യുമ്പോള്‍ എങ്ങനെ മറുപടി നല്‍കണമെന്ന് പ്രതികള്‍ക്ക് വദഗ്ധ ഉപദേശം ലഭിച്ചിട്ടുണ്ടെന്ന് കരുതുന്നു.

പൊലീസ് പ്രതിയായ പീതാംബരനെയും കൊണ്ട് തെളിവെടുപ്പ് നടത്തി. കിണറ്റില്‍ നിന്ന് വാളും നാല് ഇരുമ്പ് ദണ്ഡും കണ്ടെത്തി. കൃത്യം താനാണ് നടത്തിയതെന്ന് പീതാംബരന്‍ ആദ്യം മൊഴി നല്‍കിയിരുന്നു. എന്നാല്‍ തെളിവെടുപ്പ് സമയത്ത് താന്‍ ഇരുമ്പ് ദണ്ഡ് മാത്രമാണ് ഉപയോഗിച്ചതെന്നും ബാക്കിയുള്ളവ മറ്റ് പ്രതികള്‍ ഉപയോഗിച്ചതാണെന്ന് മൊഴി നല്‍കിയതായി അറിയുന്നു. ഇത് പൊലീസിനെ കുഴയ്ക്കുന്നു. കേസിന്റെ തുടക്കം മുതല്‍ ഒരു എം.എല്‍.എയും മുന്‍ എം.എല്‍.എയും ഉള്‍പ്പെട്ടിട്ടുണ്ടെന്ന് ചില ഉന്നത പൊലീസ് ഉദ്യോഗസ്ഥര്‍ തന്നെ പറഞ്ഞിരുന്നു. എന്നാല്‍ പീതാംബരനെ സഹായിച്ചവരിലേക്ക് അന്വേഷണം നടക്കുന്നില്ല. മുഖ്യമന്ത്രിയും മന്ത്രി ഇ.പി ജയരാജനും കൊലപാതകത്തിനെതിരെ രംഗത്ത് വന്നെങ്കിലും പൊലീസിന് സ്വതന്ത്ര അന്വേഷണം നടത്താനാവില്ലെന്ന് കോണ്‍ഗ്രസ് ആരോപിക്കുന്നു.

പ്രതികള്‍ ഉപയോഗിച്ച വാഹനത്തെ കുറിച്ചുള്ള അന്വേഷണത്തിന്റെ വിശദാംശങ്ങളും അറിവായിട്ടില്ല. പീതാംബരന്‍ ഉള്‍പ്പെടെയുള്ളവര്‍ക്ക് വിവരങ്ങള്‍ കൈമാറിയവരും രക്ഷപ്പെടാന്‍ സഹായിച്ചവരുമാണ് പൊലീസിന്റെ കസ്റ്റഡിയിലുള്ളത്. പീതാംബരനൊപ്പം കൊലപാതകത്തില്‍ നേരിട്ട് പങ്കെടുത്തവരെ കുറിച്ചോ ഗൂഢാലോചന നടത്തിയവരെ കുറിച്ചോ ഒരു വിവരവും പൊലീസിന് ലഭിച്ചുമില്ല അതേക്കുറിച്ച് പൊലീസ് ആകെ ആശയക്കുഴപ്പത്തിലാണ് താനും. മലബാറിലെ രാഷ്ട്രീയ കൊലപാതകങ്ങളുടെ പതിവ് രീതിയാണ് കാസര്‍കോട്ടും ആവര്‍ത്തിച്ചത്. ടി.പി ചന്ദ്രശേഖരനെ വധിച്ചതും ഇതേ രീതിയിലായിരുന്നു. സി.പി.എം ലോക്കല്‍ കമ്മിറ്റിയംഗത്തിന് ഒറ്റയ്ക്ക് ഒരു സംഘത്തെയും കൊണ്ട് കൊലപാതകം ആസൂത്രണം ചെയ്യാനാവില്ല. ഇവര്‍ക്ക് പിന്നിലാരൊക്കെയോ ഉണ്ട്. അവരിലേക്ക് എത്തുന്നതിനുള്ള യാതൊരു സൂചനയും അന്വേഷണസംഘത്തിന് ലഭിച്ചിട്ടില്ല.

പീതാംബരനും സംഘവും ഒളിവില്‍ കഴിഞ്ഞതിന്റെ അടുത്ത് നിന്ന് ഇവര്‍ സഞ്ചരിച്ച വാഹനം കസ്റ്റഡിയിലെടുക്കാന്‍ പൊലീസ് ചെന്നെങ്കിലും ഒരു എം.എല്‍.എയും മുന്‍ എം.എല്‍.എയും അതിന് അനുവദിച്ചില്ലെന്നും റിപ്പോര്‍ട്ടുണ്ട്. വാഹനങ്ങളും ഉടമകളേയും കസ്റ്റഡിയിലെടുത്താലേ കൊലപാതകത്തിന്റെ ചുരുള്‍ അഴിയുകയുള്ളൂ. അതിലേക്ക് എത്താവുന്ന ലിങ്കുകള്‍ പൊലീസിന് അറിയാമെങ്കിലും ബാഹ്യസമ്മര്‍ദ്ദം കാരണം ഒന്നും ചെയ്യാനാവില്ലെന്നാണ് വിവരം. അതുകൊണ്ട് പീതാംബരനില്‍ തുടങ്ങി പീതാംബരനില്‍ തന്നെ അന്വേഷണം അവസാനിപ്പിക്കാനാണ് സാധ്യത. അന്വേഷണത്തില്‍ തൃപ്തിയില്ലാത്ത കോണ്‍ഗ്രസ് സി.ബി.ഐ അന്വേഷണം ആവശ്യപ്പെട്ട് കോടതി സമീപിക്കുമെന്നാണ് അറിയുന്നത്. അങ്ങനെയെങ്കില്‍ തെരഞ്ഞെടുപ്പ് അടുത്തിരിക്കുന്ന സാഹചര്യത്തില്‍ സി.പി.എമ്മിന് വലിയ തിരിച്ചടിയാകും.