നരബലി തിരികെ കൊണ്ടുവന്നു എന്നതാണ് ആയിരം ദിവസങ്ങള്‍ പൂര്‍ത്തിയാക്കുന്ന പിണറായി സര്‍ക്കാരിന്റെ ഏറ്റവും വലിയനേട്ടം നരബലി തിരികെ കൊണ്ടുവന്നു എന്നതാണെന്ന് കെ.പി.സി.സി പ്രസിഡന്റ്് മുല്ലപ്പള്ളി രാമചന്ദ്രന്‍ ആരോപിച്ചു. പതിനേഴാം നൂറ്റാണ്ടിലെ നരബലി തിരികെ കൊണ്ടുവന്നാണ് പിണറായി നവോത്ഥാനം നടത്തുന്നത്. ഇടുക്കി കുമിളിയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം. സാംസ്‌കാരിക നായകന്‍മാര്‍ ഉറക്കം വെടിഞ്ഞ് സര്‍ക്കാരിന്റെ ദുഷ്‌ചെയ്തികളെ വിമര്‍ശിക്കാന്‍ തയ്യാറാകണം . കുറ്റവാളിയുടെ മനസില്‍ നിന്ന് വരുന്ന ദുര്‍ബല പ്രതിരോധം പോലെയാണ് കാസര്‍ഗോഡ് കൊലപാതകത്തിന്റെ പശ്ചാത്തലത്തില്‍ മുഖ്യമന്ത്രിയുടെ പ്രതികരണം. എന്തിനാണ് പാര്‍ട്ടി സെക്രട്ടറി കോടിയേരി, കുഞ്ഞനന്ദനെ ന്യായീകരിക്കുന്നത്. സി.പി.എം കൊലയാളി സംഘത്തിന്റെ പാര്‍ട്ടിയാണ്. പിണറായിയും കോടിയേരിയും നടക്കുമ്പോള്‍ രക്തത്തിന്റെ മണം പരക്കുന്നു. പൊലീസിനെ സി.പി.എം സമ്മര്‍ദ്ദത്തിലാക്കുന്നെന്നും അദ്ദേഹം ആരോപിച്ചു.

പൊലീസ് സ്‌റ്റേഷനില്‍ നിന്ന് പ്രതികളെ മോചിപ്പിച്ച സി.പി.എം നേതാക്കളെ അറസ്റ്റ് ചെയ്യാന്‍ മുഖ്യമന്ത്രി തയ്യാറാകുമോ എന്നും മുല്ലപ്പള്ളി ചോദിച്ചു. കാസര്‍ഗോഡ് പെരിയയിലെ ഇരട്ട കൊലപാതക കേസിലെ അന്വേഷണത്തില്‍ തൃപ്തിയില്ല. പൊലീസിനെ നിര്‍ഭയമായി പ്രവര്‍ത്തിക്കാന്‍ സി.പി.എമ്മും സര്‍ക്കാരും അനുവദിക്കുന്നില്ല. സംസ്ഥാന സര്‍ക്കാരിന്റെ പ്രോഗ്രസ് റിപ്പോര്‍ട്ട് വട്ടപൂജ്യം. കോണ്‍ഗ്രസ് തെരഞ്ഞെടുപ്പിന് സജ്ജം. ആത്മഹത്യ ചെയ്ത കര്‍ഷക കുടുംബങ്ങളുടെ കടം എഴുതിതള്ളുകയും അവര്‍ക്ക് അര്‍ഹമായ ധനസഹായം നല്‍കുകയും വേണമെന്നും മുല്ലപ്പള്ളി ആവശ്യപ്പെട്ടു. മുഖ്യമന്ത്രിയും പാര്‍ട്ടി സെക്രട്ടറിയും മോദി- അമിത്ഷാ ടീമിനെ പോലെയാണ്. രണ്ട് പേര്‍ക്കും ക്രിമിനല്‍ മനസാണ്. ഇരുവര്‍ക്കും പാവങ്ങളുടെ വേദന അറിയില്ല. സിപിഎം ഭീകര രാഷ്ട്രീയ പ്രസ്ഥാനമായി. ടി.പി. ചന്ദ്രശേഖരന്‍, ഷുഹൈബ് എന്നിവരുടെ കൊലപാതകങ്ങളിലും പെരിയ ഇരട്ടക്കൊലയിലും സമാനതകള്‍ ഏറെയാണ്. കൊന്നവരെ മാത്രമല്ല, കൊല്ലിച്ചവരെയും പിടികൂടണമെന്നും മുല്ലപ്പള്ളി ആവശ്യപ്പെട്ടു.

സംസ്ഥാനത്തെ നിയമ വാഴ്ച തകര്‍ന്നു. ശരത് ലാല്‍, കൃപേഷ് എന്നിവരുടെ കൊലപാതകത്തിന് പിന്നില്‍ ടി.പി.ചന്ദ്രശേഖരന്‍ വധക്കേസില്‍ പരോളില്‍ പുറത്തിറങ്ങിയിയവരുടെ പങ്ക് അന്വേഷിക്കണം. ഇന്ത്യയില്‍ രാഷ്ടീയ കൊലപാതകങ്ങള്‍ കൂടുതല്‍ നടക്കുന്ന മൂന്നാമത്തെ സംസ്ഥാനമാണ് കേരളം. കേന്ദ്ര രഹസ്യ അന്വേഷണ വിഭാഗം ഇക്കാര്യം റിപ്പോര്‍ട്ട് ചെയ്തിട്ടുണ്ട്. സ്ത്രീകള്‍ക്ക് സുരക്ഷയില്ലാത്ത മൂന്നാമത്തെ സംസ്ഥാനവും കേരളമാണ്. പിണറായി ആഭ്യന്തര മന്ത്രിയായ ശേഷം 20 രാഷ്ട്രീയ കൊലപാതകങ്ങള്‍ നടന്നു. പതിനാറിലും സി.പി.എമ്മുകാരാണ് പ്രതികളെന്നും മുല്ലപ്പള്ളി ആരോപിച്ചു. കഴിഞ്ഞ 50 വര്‍ഷത്തിനിടെ മലബാറില്‍ നടന്ന രാഷ്ട്രീയ കൊലപാതകങ്ങള്‍ പിണറായി വിജയന്റെ അറിവോടെയും സമ്മതത്തോടെയുമാണെന്നും അദ്ദേഹം ആരോപിച്ചു.

പാര്‍ട്ടിയോട് കൂറുള്ളവര്‍ തെരഞ്ഞെടുപ്പു സമയത്ത് കൊലപാതകങ്ങള്‍ ചെയ്യില്ലെന്നാണ് കോടിയേരി പറഞ്ഞത്, അതിനര്‍ത്ഥം തെരഞ്ഞെടുപ്പ് സമയമല്ലെങ്കില്‍ കൊല്ലാമെന്നല്ലേ എന്നും മുല്ലപ്പള്ളി ചോദിച്ചു. കാസര്‍കോട് വധിക്കപ്പെട്ട കൃപേഷും ശരതും വധഭീഷണിയുണ്ടെന്ന് പൊലീസിന് പരാതി നല്‍കിയിരുന്നു. അവരത് അവഗണിച്ചു. ഗുരുതരമായ വീഴ്ചയാണത്. മുഖ്യമന്ത്രി കൊലപാതകത്തെ അപലപിക്കുക മാത്രം ചെയ്ത് ലഘൂകരിക്കുകയാണുണ്ടായത്. അക്രമങ്ങളും കൊലപാതകങ്ങളും ആവര്‍ത്തിക്കില്ലെന്ന് പറയാനുള്ള ധൈര്യം മുഖ്യമന്ത്രി കാണിക്കണം. പ്രതികള്‍ കര്‍ണാടകയിലുണ്ടെന്നാണ് പൊലീസ് പറഞ്ഞത്. ഇത്തരം കേസുകളില്‍ വ്യാജ പ്രതികളെ ഹാജരാക്കിയ ചരിത്രം സിപിഎമ്മിനുണ്ട്. അതുകൊണ്ട് സ്വതന്ത്രമായ അന്വേഷണം വേണമെന്നും മുല്ലപ്പള്ളി ആവശ്യപ്പെട്ടു.