കാസര്‍കോട്ടെ ഇരട്ടക്കൊലപാതകത്തിലെ പ്രതിയായ ലോക്കല്‍ കമ്മിറ്റി അംഗം പീതാംബരനെ രക്ഷിക്കാന്‍ സി.പി.എം കണ്ണൂര്‍ മോഡല്‍ തന്ത്രം നടപ്പാക്കുന്നു. കൊലപാതകിയെ പാര്‍ട്ടിയില്‍ നിന്ന് പുറത്താക്കുകയും പരസ്യമായി പരസ്യമായി തള്ളിപ്പറയുകയും ചെയ്ത ശേഷം കേസ് നടത്തുന്നതിന് നിയമസഹായം നല്‍കുകയും കുടുംബത്തിന്റെ കാര്യങ്ങള്‍ നോക്കുന്നതിന് പണവും മറ്റ് കാര്യങ്ങളും നല്‍കുകയും ചെയ്യുകയാണ് വര്‍ഷങ്ങളായി സി.പി.എം കണ്ണൂരില്‍ തുടര്‍ന്ന് പോകുന്നത്. ആ രീതി തന്നെയാണ് കാസര്‍കോട്ടും നടപ്പാക്കുന്നത്. അതിനിടെ പീതാംബരെ ഒറ്റപ്പെടുത്താന്‍ നീക്കംനടക്കുന്നതിനിടെ പാര്‍ട്ടിക്കെതിരെ പീതാംബരന്റെ ഭാര്യയും മകളും രംഗത്തെത്തിയും നേതൃത്വത്തെ വെട്ടിലാക്കി.

കണ്ണൂരില്‍ ഷുഹൈബ് എന്ന യൂത്ത്‌കോണ്‍ഗ്രസ് നേതാവിനെ കൊന്ന ആകാശ് തില്ലങ്കേരി പാര്‍ട്ടിക്കാരനല്ലെന്ന് ആദ്യം പറയുകയും പിന്നീട് ജില്ലാ സെക്രട്ടറി പി.ജയരാജനുമായി അടുത്തബന്ധം ഉണ്ടെന്ന തെളിവുകള്‍ പുറത്ത് വരുകയും ചെയ്തു. അതോടെ പാര്‍ട്ടിയില്‍ നിന്ന് ആകാശിനെ പുറത്താക്കി. ശേഷം ആകാശിന്റെ പിതാവിനെ സി.പി.എം ജില്ലാ കമ്മിറ്റി ഓഫീസില്‍ വിളിച്ചുവരുത്തി മുഖ്യമന്ത്രി പിണറായി വിജയനും ജില്ലാ സെക്രട്ടറി പി. ജയരാജനും സംസാരിച്ചു. കുടുംബത്തിന് വേണ്ട എല്ലാ സംരക്ഷണവും നിയമസഹായവും നല്‍കുമെന്ന് ഉറപ്പും കൊടുത്തെന്നാണ് അറിവ്. ജയിലില്‍ കാമുകിയുമായി സംസാരിക്കുന്നതിന് വരെ ആകാശിന് പാര്‍ട്ടി അവസരം ഒരുക്കി.

കൊലപാതകത്തിന് നേതൃത്വം നല്‍കിയ 11 പേരില്‍ നാല് പ്രവര്‍ത്തകരെയും ഗൂഢാലോചനയില്‍ പങ്കെടുത്ത മുന്‍ ലോക്കല്‍ സെക്രട്ടറിയെയുമാണു പുറത്താക്കിയത്. ബാക്കിയുള്ളവരൊന്നും പാര്‍ട്ടി അംഗങ്ങളല്ലെന്നണ് കണ്ണൂര്‍ ജില്ലാ കമ്മിറ്റി അറിയിച്ചത്. കേസിലെ അഞ്ച് പ്രതികളുടെ കേസ് നടത്തിപ്പിനായി ഡിവൈഎഫ്‌ഐ നടത്തുന്ന ക്ലബിന്റെ നേതൃത്വത്തില്‍ ലക്കിടിപ്പ് നടത്തി പണം കണ്ടെത്തി. ജാമ്യത്തിലിറങ്ങിയ പ്രധാന പ്രതികളില്‍ ഒരാള്‍ക്കു വീട്ടില്‍ നിന്നു പുറത്തു പോകാനും വരാനും ഇപ്പോഴും പാര്‍ട്ടി പ്രവര്‍ത്തകരുടെ സംരക്ഷണമുണ്ട്. മക്കളുടെ പഠിപ്പ്, വിവാഹം, ആശുപത്രി ചെലവുകള്‍ എല്ലാം അതത് പ്രദേശത്തെ പാര്‍ട്ടി കമ്മിറ്റികളാണ് വഹിക്കുന്നത്. അതിനായി ജില്ലാ കമ്മിറ്റിയില്‍ പ്രത്യേക ഫണ്ട് തന്നെ ഉണ്ട്.

ടി.പി ചന്ദ്രശേഖരന്‍ വിധക്കേസിലെ മുഖ്യസൂത്രധാരന്‍ കുഞ്ഞനന്തന് വഴിവിട്ട് സര്‍ക്കാര്‍ പരോള്‍ നല്‍കുന്നത് എന്തിനാണെന്ന് കോടതി തന്നെ ചോദിച്ചു. ജയിലില്‍ കിടന്നപ്പോഴും അദ്ദേഹം ഏര്യാകമ്മിറ്റി അംഗമായി തെരഞ്ഞെടുക്കപ്പെട്ടു. കുഞ്ഞനന്തനെ പാര്‍ട്ടി സംരക്ഷിക്കുന്നതിനെ കുറിച്ച് മാധ്യമങ്ങള്‍ ചോദിച്ചപ്പോള്‍ കുഞ്ഞനന്തന്‍ തെറ്റുകാരനാണോ അല്ലയോ എന്ന് നിങ്ങളേക്കാള്‍ നന്നായി എനിക്കറിയാമെന്ന് വ്യവസായ മന്ത്രിയും സി.പി.എം കേന്ദ്രകമ്മിറ്റി അംഗവുമായ ഇ.പി ജയരാജന്‍ വ്യക്തമാക്കി. അതേസമയം കാസര്‍കോട്ടെ കൊലപാതകത്തിലെ പ്രതികളെ പിടികൂടാനായെന്നും അവരെ പാര്‍ട്ടിയില്‍ നിന്ന് പുറത്താക്കിയത് തന്നെ ഇത്തരക്കാര സംരക്ഷിക്കില്ല എന്നതിന്റെ വ്യക്തമായ സൂചനയാണെന്നും അദ്ദേഹം പറഞ്ഞു.