എടത്വാ: എടത്വാ പഞ്ചായത്തിലെ നാലാം വാർഡിലെ മുപ്പത്തിമൂന്നിൽചിറ കോളനിയിൽ ലിവിംങ്ങ് വാട്ടർ വിഷന്റെ ആഭിമുഖ്യത്തിൽ നടത്തിവരുന്ന കുടിവെള്ള വിതരണം അഞ്ച് മാസം പിന്നിട്ടു. മുപ്പത്തിനാല് കുടുംബങ്ങളും ഒരു അംഗൻവാടിക്കുമാണ് കുടിവെളളം കഴിഞ്ഞ അഞ്ച് മാസമായി സൗജന്യമായി വിതരണം ചെയ്യുന്നത്. കോളനിയിലെ ശുദ്ധജല ക്ഷാമത്തെ പറ്റി മാധ്യമങ്ങൾ റിപ്പോർട്ട്  ചെയ്തിരുന്നു.

ദീർഘ വർഷങ്ങളായി കുടിവെള്ള ക്ഷാമം അനുഭവിച്ചിരുന്ന ഈ കോളനിയിൽ 5,30,000 ( അഞ്ച് ലക്ഷത്തി മുപ്പതിനായിരം) രൂപ ചെലവഴിച്ച് എടത്വാ ഗ്രാമ പഞ്ചായത്ത്  പൈപ്പ് ലൈൻ വലിച്ചെങ്കിലും അതിലൂടെ തുള്ളി വെള്ളം പോലും എത്തിയിട്ടില്ല. പ്രധാന പൈപ്പിൽ നിന്നും ഒരിടയിലേറെ ഉയരത്തിൽ ആണ് കോളനിയിലേക്ക് പൈപ്പ് ഇട്ടിരിക്കുന്നതിനാൽ വെള്ളം കയറി വരില്ല. കുടിവെള്ളത്തിനായി അവർ മഴയെ ആണ് ആശ്രയിച്ചിരുന്നത്.

വെള്ളപൊക്കത്തിന് ശേഷം ലോറികളിൽ  സമാന്തര കുടിവെള്ള വിതരണം ചെയ്യുന്നുണ്ടെങ്കിലും കോളനിയിലേക്കുള്ള റോഡിന് വീതി കുറവായതിനാൽ വാഹനങ്ങൾ എത്താറില്ല. ഇവിടെ ആകെ ഉണ്ടായിരുന്ന 2 കിണറുകൾ പ്രളയം മൂലം  ഉപയോഗ ശൂന്യമായി. കുടിവെള്ളം  ഇല്ലാത്തതിനാൽ ഒന്നര കിലോമീറ്റർ ദൂരത്തിൽ പോയി കന്നാസിൽ വെള്ളം ശേഖരിക്കുകയായിരുന്നു  പതിവ്. സമീപത്തെ തോട്ടിൽ നിന്നും ആണ്  പ്രാഥമിക ആവശ്യങ്ങൾക്ക് വെള്ളം  ഉപയോഗിച്ചിരുന്നത്. അത് മലിനമാകുകയും കറുകൽ വളർന്ന് മൂടിയതോടെ അതും ഉപയോഗിക്കാൻ പറ്റാത്ത സാഹചര്യം ആണ്.

ലിവിംങ്ങ് വാട്ടർ വിഷന്റെ മുഖ്യ സാരഥികളായ വനജ അനന്ത, ഡയറക്ടർ ഡോ.ജോൺസൺ വി. ഇടിക്കുള എന്നിവരുടെ നേതൃത്വത്തിൽ കോളനിയിൽ എത്തി സർവ്വേ നടത്തിയതിന് ശേഷമാണ് ഇവിടെ കുടിവെള്ളം വിതരണം 2018 ഒക്ടോബർ 15ന് ആരംഭിച്ചത് .മറ്റൊരു സംവിധാനം ഉണ്ടാകുന്നത് വരെ കോളനിയിൽ കുടിവെള്ളം സൗജന്യമായി  വിതരണം ചെയ്യുമെന്ന് ഡയറക്ടർ ഡോ.ജോൺസൺ വി. ഇടിക്കുള അറിയിച്ചു.

കോളനിയിലെ കുടിവെള്ള ക്ഷാമം ശാശ്വതമായി പരിഹരിക്കുന്നതിന് നടപടി സ്വീകരിക്കുന്നതിന് കുട്ടനാട് തഹസിൽദാർ, എടത്വാ ഗ്രാമ പഞ്ചായത്ത് സെക്രട്ടറി, എടത്വാ വാട്ടർ അതോറിറ്റി എക്സിക്യൂട്ടീവ് എഞ്ചിനിയർ എന്നിവർ റിപ്പോർട്ട് സമർപ്പിക്കാൻ സംസ്ഥാന മനുഷ്യാവകാശ കമ്മീഷൻ നോട്ടീസ് അയച്ചു.