ലൗ ജിഹാദ് ആരോപണത്തിലൂടെ ഏറെ വിവാദമായ ഹാദിയ-ഷെഫിന് ജഹാന് ദമ്പതികളുടെ ജീവിതത്തില് ഏറെ സന്തേഷമുള്ള ദിവസമാണിന്ന്. ഹാദിയ ആശോകന് ഇന്ന് ഡോക്ടറായി
ലൗ ജിഹാദ് ആരോപണത്തിലൂടെ ഏറെ വിവാദമായ ഹാദിയ-ഷെഫിന് ജഹാന് ദമ്പതികളുടെ ജീവിതത്തില് ഏറെ സന്തേഷമുള്ള ദിവസമാണിന്ന്. ഹാദിയ ആശോകന് ഇന്ന് ഡോക്ടറായി. വിവരം ഭര്ത്താവ് ഷെഫിന് ജഹാന് ഫെയിസ്ബുക്കിലൂടെ അറിയിച്ചു. ''ഈ തിളങ്ങുന്ന വിജയം ഒരു അസുലഭ നേട്ടമാണ്. എണ്ണമറ്റ പ്രാര്ത്ഥനകളുടെയും വിഭ്രാന്തികളുടെയും തടങ്കലിന്റെയും സ്നേഹത്തിന്റെയും ക്ഷമയുടെയും പ്രതിഫലം കൂടിയാണിത്. അല്ഹംദുലില്ല, അവസാനം എല്ലാ പ്രതിസന്ധികളില് നിന്നും നാം ലക്ഷ്യസ്ഥാനത്ത് എത്തിച്ചേര്ന്നിരിക്കുന്നു. ഡോക്ടര് എന്ന് നിന്നെ വിളിക്കാന് സാധിച്ചതില് ഞാന് അഭിമാനിക്കുന്നു.'' ഹാദിയയുടെ ഫോട്ടോയ്ക്കൊപ്പം ഷഫീന് ജഹാന് തന്റെ വാളില് കുറിച്ചു.
രാജ്യം ഏറെ ചര്ച്ച ചെയ്യുകയും സുപ്രീംകോടതി അന്തിമ തീര്പ്പ് കല്പ്പിക്കുകയും ചെയ്ത പ്രണയവും വിവാഹവുമായിരുന്നു ഷെഫിന് ജഹാന്റെയും മുസ്്ലിംമതം സ്വീകരിച്ച അഖില അശോകന് എന്ന ഹാദിയയുടേതും കോട്ടയത്തെ അശോകന്റെയും പൊന്നമ്മയുടെയും മകളായ അഖില ആയൂര്വേദ ഡോക്ടറാകാന് പഠിച്ചിരുന്ന കാലത്താണ് ഇരുവരും വിവാഹിതരായത്. അതിനിടെ മകളെ കാണാനില്ലെന്ന് കാട്ടി അശോകന് ഹൈക്കോടതിയില് ഹേബിയസ് കോര്പ്പസ് ഹര്ജി നല്കി. വിവാഹിതയായ മകളാണ് കോടതിയിലെത്തിയത്. വിവാഹത്തില് ദുരൂഹത തോന്നിയതോടെ ഹൈക്കോടതി അത് റദ്ദാക്കി. മാതാപിതാക്കള്ക്കൊപ്പം ഹാദിയയെ വിടുകയും ചെയ്തു. തുടര്ന്ന് വൈക്കത്തെ വീട്ടില് പൊലീസ് സംരക്ഷണയില് കഴിയുകയായിരുന്നു ഹാദിയ.
വിവാഹം നിയമപരമാക്കണമെന്നും ഒന്നിച്ചുജീവിക്കാന് അനുവദിക്കണമെന്നും ആവശ്യപ്പെട്ട് ഷെഫിന് ജഹാന് സുപ്രീംകോടതിയെ സമീപിക്കുകയായിരുന്നു. ഹാദിയയെ കേട്ടശേഷം ഒരുമിച്ച് ജീവിക്കാന് കോടതി അനുമതി നല്കുകയായിരുന്നു. അതിന് മുമ്പ് പഠനം പൂര്ത്തിയാക്കാന് അനുവദിക്കണമെന്ന ആവശ്യവും കോടതിയും പരിഗണിച്ചു. തുടര്ന്ന് സേലത്തെ കോളജിലായിരുന്നു ഹാദിയ. ഐ.എസ് ബന്ധമുള്ള വ്യക്തിയാണ് ഷെഫിന് ജഹാനെന്നും അതിനാല് കേസ് എന്.ഐ.എ അന്വേഷിക്കുകയാണെന്നും കേന്ദ്രസര്ക്കാര് കോടതിയെ അറിയിച്ചിരുന്നു. വിവാഹ ശേഷം ഹാദിയയേയും കൊണ്ട് സിറിയയിലേക്ക് പോകാനാണ് ഷെഫിന് ജഹാന് ഉദ്ദേശിക്കുന്നതെന്ന് വ്യാപകമായ ആരോപണവും ഉയര്ന്നിരുന്നു.
കേന്ദ്രവനിതാ കമ്മീഷന് ഉള്പ്പെടെ ഹാദിയയെ വൈക്കത്തെ വീട്ടില് വന്ന് കണ്ടിരുന്നു. തന്നെ തൃപ്പൂണിത്തുറയില് ഹിന്ദുഹെല്പ്് ലൈന് കേന്ദ്രത്തില് കൊണ്ടുപോയി ഉപദ്രവിച്ചെന്നും ഹാദിയ വെളിപ്പെടുത്തിയിരുന്നു. സംസ്ഥാനത്തെ ബി.ജെ.പി - സംഘപരിവാര് നേതാക്കള് ഈ കേസിനെ രാഷ്ട്രീയമായി ഉപയോഗിക്കുകയും ചെയ്തു. എന്നാല് സംസ്ഥാന സര്ക്കാര് ഹാദിയയ്ക്കൊപ്പമാണ് നിന്നത്. അതില് പ്രതിഷേധിച്ച് സി.പി.എമ്മുകാരനായിരുന്ന അശോകന് പാര്ട്ടി വിട്ട് ബി.ജെ.പിയില് ചേര്ന്നിരുന്നു. ഷെഫിന് ജഹാന്റെ ഐ.എസ് ബന്ധത്തെ കുറിച്ചും ഹാദിയയുമായുള്ള വിവാഹം ലൗവ് ജിഹാദ് ആണെന്നുള്ള ആരോപണത്തെ കുറിച്ചും അന്വേഷിച്ച എന്.ഐ.എയ്ക്ക് ഒന്നും കണ്ടെത്താനായില്ല. ഇക്കാര്യം എന്.ഐ.എ സുപ്രീംകോടതിയെ അറിയിക്കുകയും ചെയ്തിരുന്നു.
https://www.facebook.com/Malayalivartha
