കോട്ടയത്ത് കേരള കോണ്‍ഗ്രസ് എം സ്ഥാനാര്‍ത്ഥിക്കെതിരെ കോണ്‍ഗ്രസ് രംഗത്തെത്തിയതോടെ മധ്യതിരുവിതാംകൂറിലെ പത്തനംതിട്ട, ഇടുക്കി, എറണാകുളം, തൃശൂര്‍, കൊല്ലം, ആലപ്പുഴ സീററുകളില്‍ ഇടതു മുന്നണി സ്ഥാനാര്‍ത്ഥികള്‍ ജയിക്കാന്‍ സാധ്യത തെളിയുന്നു.

കേരള കോണ്‍ഗ്രസ് എമ്മിന്റെ സ്റ്റിയറിംഗ് കമ്മിറ്റിക്ക് തലേന്ന് കോട്ടയം നാട്ടകം ഗസ്റ്റ് ഹൗസില്‍ ഉമ്മന്‍ ചാണ്ടിയും പി ജെ ജോസഫും കൂടികാഴ്ച നടത്തിയിരുന്നു. കോട്ടയത്തിനു വേണ്ടിയുള്ള തന്ത്രങ്ങള്‍ ജോസഫിന് അഭ്യസിച്ച് നല്‍കുകയായിരുന്നു ചാണ്ടി.

അതിനിടെ മാണി കോട്ടയം സീറ്റ് നിരസിച്ചാല്‍ ഇടുക്കി സീറ്റ് തങ്ങള്‍ തരാമെന്നു പറഞ്ഞ് ജോസഫിനെ പ്രലോഭിപ്പിച്ചിരുന്ന കോണ്‍ഗ്രസിന് നിവൃത്തിയില്ലാതായി . തിങ്കളാഴ്ച രാത്രി മാണി സീറ്റ് നിഷേധിച്ച വിവരം ജോസഫ് ഉമ്മന്‍ ചാണ്ടിയെ അറിയിച്ചു. കോണ്‍ഗ്രസിന്റെ ഇടുക്കി സീറ്റ് തനിക്ക് നല്‍കണമെന്നും ജോസഫ് ആവശ്യപ്പെട്ടു. താനാണ് മാണിയെ ഇടത്തേക്ക് ചായാല്‍ അനുവദിക്കാത്തതെന്നും അതിനാല്‍ ഇടുക്കി സീറ്റ് തനിക്ക് നല്‍കണമെന്നും അദ്ദേഹം പറഞ്ഞു. അപ്പോള്‍ അത്തരമൊരു ആലോചന പോലും കോണ്‍ഗ്രസില്‍ കലാപമുണ്ടാക്കുമെന്ന് പറഞ്ഞ് ഉമ്മന്‍ ചാണ്ടി കൈമലര്‍ത്തി.

ഉമ്മന്‍ചാണ്ടിയുമായി അടുപ്പം പുലര്‍ത്തുന്ന പ്രമുഖപത്രം ജോസഫിന് വേണ്ടി രംഗത്തെത്തിയതും ശ്രദ്ധേയമായി ജോസഫിന്റെ ഇന്റര്‍വ്യൂ നല്‍കിയും കോണ്‍ഗ്രസ് നേതാക്കളുടെ അമര്‍ഷത്തിന്റെ വാര്‍ത്ത നല്‍കിയും മാണിഗ്രൂപ്പിനോടുള്ള കലിപ്പ് പത്രം പരസ്യമാക്കി. കോട്ടയത്ത് ജോസ് കെ. മാണിയുടെ ഭാര്യ സ്ഥാനാര്‍ത്ഥിമാകുമെന്ന വ്യാജ വാര്‍ത്ത ആദ്യം പ്രസിദ്ധീകരിച്ചതും ഇതേ പത്രമാണ്. അതും ഉമ്മന്‍ ചാണ്ടിയുടെ കളിയായിരുന്നു.

ജോസ് കെ മാണിയെയും കേരള കോണ്‍ഗ്രസിനെയും അവസാനിപ്പിക്കുകയാണ് ഉമ്മന്‍ ചാണ്ടിയുടെ ലക്ഷ്യം. ഇത് ലക്ഷ്യമിട്ട് ചെന്നിത്തല മാണിയുടെ പക്ഷത്തേക്ക് തിരിഞ്ഞിട്ടുണ്ട്. വി ഡി സതീശന്‍ ചാഴികാടന് അനുകൂലമായി രംഗത്തെത്തിയത് ഈ സാഹചര്യത്തിലാണ്.

കെ.എം മാണിയുടെ സ്ഥാനാര്‍ത്ഥിയായ തോമസ് ചാഴികാടന്‍ മോശമാണെന്നും ദുര്‍ബലനാണെന്നും തിരുവഞ്ചൂര്‍ രാധാക്യഷ്ണന്റെ സാന്നിധ്യത്തില്‍ കോട്ടയം ജില്ലാ കോണ്‍ഗ്രസ് കമ്മിറ്റിയില്‍ ചര്‍ച്ചയുണ്ടായതോടെയാണ് ചാഴികാടന്‍ ജയിക്കുമോ എന്ന് സംശയം കോട്ടയത്ത് ഉണ്ടായിരിക്കുന്നത്. കെ.എം മാണിയെ തൊട്ടാല്‍ വിവരമറിയും എന്ന് കേരള കോണ്‍ഗ്രസുകാര്‍ പറയുന്നു. അതായത് കേരളത്തില്‍ മിക്കവാറും സീറ്റുകളില്‍ കോണ്‍ഗ്രസ് തോല്‍ക്കുമെന്ന് ഉറപ്പായി കഴിഞ്ഞു.

കേരള കോണ്‍ഗ്രസില്‍ മാണിയും ജോസഫും തമ്മില്‍ അടുക്കാനാവാതെ അകന്നു. കോണ്‍ഗ്രസ് നേതാക്കളുമായി ആശയവിനിമയം നടത്തിയിട്ടാണ് ജോസഫ് തന്റെ സ്ഥാനാര്‍ത്ഥിത്വം പ്രഖ്യാപിച്ചത്. ഇതിന് ഉമ്മന്‍ ചാണ്ടിയുടെയും ചെന്നിത്തലയുടെയും പിന്തുണമുണ്ടായിരുന്നു. ഉമ്മന്‍ ചാണ്ടിയും ചെന്നിത്തലയും കേരള കോണ്‍ഗ്രസില്‍ കലഹം ഉണ്ടാക്കാന്‍ ഏറെനാളായി ശ്രമിക്കുകയാണ്. കെ.എം മാണിയെ ബാര്‍കേസില്‍ കുരുക്കിയത് ആദ്യം ഉമ്മന്‍ ചാണ്ടിയും പിന്നാലെ ചെന്നിത്തലയുമായിരുന്നു. ഇതിന് ശേഷം കേരള കോണ്‍ഗ്രസ് എമ്മിനെ വിളര്‍ത്താന്‍ ശ്രമിച്ചു. അന്ന് അത് നടക്കാതെ വന്നപ്പോഴാണ് പാര്‍ട്ടി പുതിയ തന്ത്രങ്ങളുമായി രംഗത്തെത്തിയിരിക്കുന്നത്.

ജോസ് കെ മാണിയുടെ മണ്ഡലത്തില്‍ ജോസഫിനെ കൊണ്ട് അവകാശവാദം ഉന്നയിച്ചത് കോണ്‍ഗ്രസ് നേതാക്കളാണ്. ജോസഫിനോട് ഇപ്പോഴും ശുഭാപതി വിശ്വാസം പുലര്‍ത്താന്‍ ആവശ്യപ്പെടുന്നതും കോണ്‍ഗ്രസാണ്. ഇതിനിടെ മാണി കോട്ടയം നിരസിച്ചാല്‍ തങ്ങളുടെ ഇടുക്കി സീറ്റ് നല്‍കാമെന്ന് പറഞ്ഞ് ജോസഫിനെ പറ്റിച്ചു. ജോസഫിനെ നന്നാക്കലല്ല മാണിയെ തകര്‍ക്കലാണ് കോണ്‍ഗ്രസിന്റെ ലക്ഷ്യം

ചുരുക്കത്തില്‍ പിണറായി വിജയന്റെ കാലമാണ് വരാന്‍ പോകുന്നത്. ലോകസഭയില്‍ നേടുന്ന തിളക്കമാര്‍ന്ന വിജയം നിയമസഭയിലും പിണറായി ആവര്‍ത്തിക്കുമ്പോള്‍ മാണിയും കുഞ്ഞാലികുട്ടിയും എവിടെയായിരിക്കുമെന്ന് കണ്ടറിയാം.