ഓണ്‍ലൈന്‍ തട്ടിപ്പ്, ഹവാല എന്നിവയിലൂടെ പിടിയിലായ കാമറൂണ്‍ സ്വദേശിയടക്കമുള്ള പ്രതികള്‍ നേടിയത് 500 കോടിയോളം രൂപ. ഈ പണമുപയോഗിച്ച് അവരുടെ നാട്ടില്‍ വന്‍ ഷോപ്പിങ് മാളുകളും ബിസിനസ് സ്ഥാപനങ്ങളും നടത്തുകയാണ് പ്രതികളെന്ന് പൊലീസ് കണ്ടെത്തി.

മിക്ക പ്രതികളും കോടിക്കണക്കിന് രൂപയാണ് വിവിധ മേഖലകളിലായി നിക്ഷേപിച്ചത്. കമ്പ്യൂട്ടര്‍, നെറ്റ്വര്‍ക്ക് എന്‍ജിനീയര്‍മാരായ കാമറൂണ്‍ സ്വദേശികളാണ് തട്ടിപ്പിന് നേതൃത്വം നല്‍കുന്നത്. നേരത്തേ അറസ്റ്റിലായ രാജസ്ഥാന്‍ സ്വദേശികള്‍ പണം കൈമാറാനുള്ള ഇടനിലക്കാരാണ്.

വിദേശ കറന്‍സി സമ്മാനമടിച്ചെന്ന് തെറ്റിദ്ധരിപ്പിച്ച് എസ്.എം.എസ് അയക്കുകയും പണം ലഭിക്കാനുള്ള സെക്യൂരിറ്റി, ഇന്‍ഷുറന്‍സ് തുടങ്ങിയവയിലേക്കെന്ന് വിശ്വസിപ്പിച്ച് പല അക്കൗണ്ടുകളിലേക്ക് പണം നിക്ഷേപിപ്പിച്ചുമായിരുന്നു തട്ടിപ്പ് രീതി. വ്യാജരേഖകള്‍ ഉപയോഗിച്ച് ബാങ്കുകളില്‍ തുടങ്ങിയ അക്കൗണ്ട് വഴിയാണ് ഇടപാട് നടത്തിയിരുന്നത്.

ഇത്തരത്തില്‍ പ്രതികള്‍ ഉപയോഗിച്ച 81 അക്കൗണ്ട് വിവരങ്ങള്‍ നേരത്തേ മലപ്പുറം പൊലീസിന്റെ ഫേസ്ബുക് പേജ് വഴി പുറത്തുവിട്ടിരുന്നു. തുടര്‍ന്ന് തൃശൂര്‍, ലുധിയാന, ആഗ്ര എന്നിവിടങ്ങളില്‍നിന്നായി തട്ടിപ്പിനിരയായ മൂന്നുപേര്‍ പൊലീസുമായി ബന്ധപ്പെടുകയും ചെയ്തു.