കോട്ടയത്തിന്റെ പേരിൽ ഇടത്ത് നിൽക്കുന്ന പിജെ ജോസഫിന് കോൺഗ്രസ് ഇടുക്കി സീറ്റ് നൽകിയേക്കും. അങ്ങനെ കോട്ടയത്തിന്റെ പേരിൽ കോൺഗ്രസുണ്ടാക്കിയ വിവാദം അവർ തന്നെ അവസാനിപ്പിക്കും. അധികം വൈകാതെ പി.ജെ ജോസഫ് കോൺഗ്രസിൽ ചേരുമെന്നാണ് ധാരണ.

തത്കാലം ജോസഫ് കേരള കോൺഗ്രസിൽ തുടരും. എന്നാൽ അടുത്ത നിയമസഭാ തെരഞ്ഞടുപ്പിനു മുമ്പ് ജോസഫും മോൻസും കോൺഗ്രസിലായിരിക്കും. ജോസഫ് പാർലെമെന്റിലേക്ക് ജയിച്ചാൽ തൊടുപുഴ ഉപതെരഞ്ഞടുപ്പിൽ മകൻ അപ്പു ജോസഫിനെ മത്സരിപ്പിക്കും.

ഇങ്ങനെയൊരു നീക്കത്തിന് കെ. എം മാണിക്കും തടസമില്ല. ജോസഫ് കോൺഗ്രസിലേക്ക് പോയാലും കെ. എം മാണി കൂറുമാറ്റത്തിന്റെ വാൾ ഉയർത്തില്ല. അക്കാര്യത്തിൽ കോൺഗ്രസ് മാണിയിൽ നിന്ന് ഉറപ്പുവാങ്ങുമെന്നാണ് വിവരം. പകരം ചാഴികാടന് പിന്നിൽ കോൺഗ്രസ് ശക്തമായി അണിനിരക്കും.

ഉമ്മൻ ചാണ്ടിയാണ് വിഷയത്തിലെ സൂത്രധാരകൻ. ഇടതുമുന്നണിയിൽ പോകാതെ കെ. എം. മാണിയെ വലതു മുന്നണിയിൽ നിലനിർത്തിയതിനുള്ള പ്രത്യുപകാരമായിട്ടാണ് സീറ്റ് നൽകേണ്ടതെന്ന് ഉമ്മൻ ചാണ്ടി രാഹുൽ ഗാന്ധിയെ അറിയിച്ചു. ഉമ്മൻചാണ്ടിയെ ഇടുക്കിയിൽ മത്സരിപ്പിക്കാൻ തക്കം പാർത്തിരുന്ന ചെന്നിത്തലക്ക് നീക്കത്തിൽ വിയോജിപ്പുണ്ടെങ്കിലും ഒന്നും ചെയ്യാനാവാത്ത സാഹചര്യമാണുള്ളത്.

ബുധനാഴ്ച തിരുവനന്തുരത്ത് ജോസഫുമായി കോൺഗ്രസ് നേതാക്കൾ നടത്തിയ മാർത്തോൺ ചർച്ചയിലാണ് അതീവ രഹസ്യമായി ഇത്തരമൊരു തീരുമാനം എ ഗ്രൂപ്പ് എടുത്തത്. ജോസഫിന് സീറ്റ് നൽകുക വഴി തന്നെ ഡൽഹിയിലേക്ക് കെട്ടുകെട്ടിക്കാനുള്ള ചെന്നിത്തലയുടെ നീക്കത്തെയും ഉമ്മൻ ചാണ്ടി പ്രതിരോധിച്ചു.

രാഹുൽ ഗാന്ധിയുടെ പൂർണ സമ്മതത്തോടെയാണ് നീക്കം നടക്കുന്നത്. ഇടുക്കിയിൽ കോൺഗ്രസിന് ജയിപ്പിക്കാൻ പറ്റിയ സ്ഥാനാർത്ഥിയില്ല. ഉമ്മൻ ചാണ്ടി മതസരിച്ചാൽ വിജയം സുനിശ്ചിതമാണ്. അത് കഴിഞ്ഞാൽ പിജെ ജോസഫിനാണ് സാധ്യത.

ജോസഫിന് ഇടുക്കി സീറ്റ് നൽകണമെന്ന ധാരണ നേരത്തെ കോൺഗ്രസിലുണ്ടായിരുന്നു. ജോസഫ് പിണങ്ങിയാൽ ഇടുക്കി മണഡല കോൺഗ്രസിന്റെ വിജയത്തെ ബാധിക്കുമെന്ന ചിന്ത ഉയർന്നു വന്നു. മാണിയെ പിണക്കിയാലും ഇതു തന്നെയാണ് അവസ്ഥ. അങ്ങനെയാണ് ഒരു സമവായം രൂപീകരിക്കാൻ കോൺഗ്രസിനുള്ളിൽ നിന്നു തന്നെ ശ്രമം നടന്നത്.

ജോസഫിന് സീറ്റ് നൽകിയാൽ കോൺഗ്രസിൽ വലിയ ആശയകുഴപ്പത്തിന് സാധ്യതയുണ്ട്. ഡീൻ കുര്യാക്കോസിന് സീറ്റിൽ പ്രതീക്ഷയുണ്ട്. ജോസഫ് കോൺഗ്രസിലെത്തുമെന്ന കാര്യം തത്കാലം പരസ്യമാക്കില്ല.അങ്ങനെ സംഭവിച്ചാൽ കെ.എം മാണി ഉടക്കും എന്നിരുന്നാലും പ്രശ്നങ്ങൾ പറഞ്ഞു തീർക്കാം എന്ന ധാരണയിലാണ് കോൺഗ്രസ്. കോൺഗ്രസ്സുകാരാകുമ്പോൾ കലാപം ഉണ്ടാക്കാൻ സാധ്യതയില്ലെന്ന് നേതാക്കൾ കരുതുന്നു.