പ്രേമാഭ്യര്‍ത്ഥന നിരസിച്ച വിദ്യാര്‍ഥിനിയുടെ ചെകിടത്തടിച്ച യുവാവ് അറസ്റ്റില്‍. തോന്നയ്ക്കല്‍ പോങ്ങോട് ടി എച്ച് സി ബ്ലോക്ക് നമ്പര്‍ 101 ല്‍ അനന്തു(23) വിനെ ആര്യനാട് പോലീസാണ് അറസ്റ്റ് ചെയ്തത്. ഇക്കഴിഞ്ഞ 12ന് ആര്യനാട് കാഞ്ഞിരംമൂട് കവലക്ക് സമീപത്ത് വച്ചായിരുന്നു സംഭവം. ക്ലാസിലേക്ക് പോകുന്നതിനിടെയാണ് പെണ്‍കുട്ടിയെ തടഞ്ഞുനിര്‍ത്തി ആക്രമിച്ചതെന്ന് ആര്യനാട് ഇന്‍സ്‌പെക്ടര്‍ അജയനാഥ് പറഞ്ഞു.

മറ്റ് വിദ്യാര്‍ഥികള്‍ ഓടി എത്തിയതോടെ അനന്തു ബൈക്കില്‍ കയറി സ്ഥലം വിട്ടു.അടി കൊണ്ട് നിലത്ത് വീണ കുട്ടിയെ സമീപത്തെ ഓട്ടോഡ്രൈവര്‍മാര്‍ ഐടിഐയില്‍ എത്തിച്ചു. തുടര്‍ന്ന് രക്ഷിതാക്കള്‍ എത്തി വിദ്യാര്‍ഥിനിയെ ആദ്യം ആര്യനാട്ടും തുടര്‍ന്ന് മെഡിക്കല്‍ കോളജിലും ചികിത്സ തേടി.