വമ്പന്‍ സ്രാവുകളെത്തേടി രണ്ട് ആഭ്യന്തരമന്ത്രിമാര്‍, പരല്‍ മീനുകള്‍ക്ക്‌ എതിരേ പോലും സാക്ഷി പറയാനാളില്ല, പിന്നെ ഈ ആഭ്യന്തരമന്ത്രിമാരുടെ അങ്കം എന്തിന്‌!
അങ്ങനെ ഒരിടവേളയ്‌ക്ക്‌ ശേഷം വമ്പന്‍ സ്രാവുകള്‍ കേരള രാഷ്‌ട്രീയത്തില്‍ വീണ്ടും സജീവമാകുകയാണ്‌. ഇതിന്‌ നേതൃത്വം നല്‍കുന്നത്‌ കോണ്‍ഗ്രസിലെ തലമുതിര്‍ന്ന നേതാക്കളായ രണ്ട് ആഭ്യന്തര മന്ത്രിമാരാണ്‌. ഒരാള്‍ നമ്മുടെ സംസ്ഥാന ആഭ്യന്തര വകുപ്പുമന്ത്രി തിരുവഞ്ചൂര്‍ രാധാകൃഷ്‌ണനും മറ്റേയാള്‍ കേന്ദ്ര ആഭ്യന്തര സഹമന്ത്രി മുല്ലപ്പള്ളി രാമചന്ദ്രനുമാണ്‌. വിഷയം ടി.പി. വധവുമായി ബന്ധപ്പെട്ടതാണ്‌. ടി.പി. ചന്ദ്രശേഖരന്‍ കൊല്ലപ്പെട്ടത്‌ സി.പി.എമ്മിന്റെ ഉന്നത നേതാക്കളിടപെട്ടതു കൊണ്ടാണന്നാണ്‌ ചില കുശാഗ്ര ബുദ്ധിക്കാര്‍ ചിന്തിച്ചു. ഇടയ്‌ക്കൊക്കെ ചില ജില്ലാതല നേതാക്കന്മാരെ കുടുങ്ങി തിരുവഞ്ചൂര്‍ ബെസ്റ്റ്‌ മിനിസ്റ്ററായി കൈയ്യടി നേടിയതോടെ ഡല്‍ഹിയില്‍ നിന്നും മുല്ലപ്പള്ളി പാഞ്ഞെത്തി.
ഇതൊക്കെ വെറും പരല്‍ മീനുകളാണ്‌. വമ്പന്‍ സ്രാവുകള്‍ വരാനിരിക്കുന്നേ ഉള്ളൂ. പറയുന്നത്‌ വെറും കോണ്‍ഗ്രസുകാരനല്ല. ഇന്ത്യ ഭരിക്കുന്ന ആഭ്യന്തര സഹ മന്ത്രിയാണ്‌. തിരുവഞ്ചൂരും തലകുലുക്കി. സിപിഎമ്മിനാകെ പേടിയായി. വെറും ഒരാരോപണത്തിന്റെ പേരിലാണെങ്കിലും ഏതെങ്കിലും അറിയപ്പെടുന്ന ഒരു നേതാവിനെ പോലീസ്‌ പിടികൂടിയാല്‍ ടി.പി. വധത്തോടെ ഇമേജ്‌ നഷ്‌ടപ്പെട്ട പാര്‍ട്ടി കാണാക്കയത്തില്‍ വീണത്‌ തന്നെ.
രണ്ട് ഉപതെരഞ്ഞെടുപ്പുകള്‍ പൂര്‍വ്വാധികം ജയത്തോടെ പര്യവസാനിച്ചതോടെ ടി.പി.യെ കോണ്‍ഗ്രസുകാരും കൈയ്യൊഴിഞ്ഞു. പാര്‍ട്ടിയിലും മുന്നണിയിലും തന്നെ പരല്‍ മീനുകള്‍ വമ്പന്‍ സ്രാവുകളായതോടെ പുറത്തു നിന്നുള്ള വമ്പന്‍ സ്രാവുകളെ നോക്കാന്‍ ആര്‍ക്ക്‌ സമയം. ഇടയ്‌ക്കിടയ്‌ക്ക്‌ കേന്ദ്ര ആഭ്യന്തര സഹമന്ത്രി ആ വമ്പന്‍ സ്രാവുകളെ അന്വേഷിക്കുമെന്നുമാത്രം.
അങ്ങനെ ഒരു വര്‍ഷം കടന്നു പോയി. ടി.പി. വധത്തില്‍ പരല്‍ മീനുകള്‍ക്ക്‌ എതിരെ സാക്ഷി പറയാന്‍ പോലും ആരെയും കിട്ടിയില്ല. അപ്പോള്‍ ഇനി വമ്പന്‍ സ്രാവുകള്‍ക്ക്‌ ആര്‌ സാക്ഷി പറയുമോ എന്തോ.
ഇതിനിടയിലാണ്‌ ടി.പി. വധക്കേസ്‌ അട്ടിമറിക്കാന്‍ സിപിഎമ്മും കോണ്‍ഗ്രസും ധാരണയിലെത്തിയെന്ന ആരോപണം വന്നത്‌. അങ്ങനെയാണ്‌ മുല്ലപ്പള്ളിക്കും ഒരവസരം വന്നത്‌. വമ്പന്‍ സ്രാവുകള്‍ക്ക്‌ വേണ്ടി മുല്ലപ്പള്ളി ഒരിക്കല്‍ക്കൂടി വലയെറിയുകയാണ്‌.
ടി.പി. ചന്ദ്രശേഖരന്‍ വധക്കേസിന്റെ അന്വേഷണം അട്ടിമറിക്കാന്‍ സിപിഎം കോണ്‍ഗ്രസ് ധാരണയുണ്ടെങ്കില്‍ അതിനെക്കുറിച്ച് അന്വേഷണം നടത്തണമെന്ന് കേന്ദ്ര ആഭ്യന്തര സഹമന്ത്രി മുല്ലപ്പള്ളി രാമചന്ദ്രന്‍ പറഞ്ഞത്‌. കേസില്‍ ദുര്‍ബല സാക്ഷികള്‍ കടന്നുകൂടുന്നത് എങ്ങിനെയെന്ന് കണ്ടെത്തണം. കൂറുമാറിയ സാക്ഷികള്‍ രാജ്യത്തെ നീതിന്യായ വ്യവസ്ഥതെ പരിഹസിക്കുകയാണ്. ടിപി വധം സിപിഎം നേതൃത്വത്തിന്റെ അറിവില്ലാതെ നടക്കില്ലെന്നും അദ്ദേഹം ആരോപിച്ചു. കേസില്‍ സിബിഐ അന്വേഷണം വേണമെന്ന രമയുടെയും ആര്‍എംപിക്കാരുടെയും ആവശ്യം ന്യായമാണ്. തനിക്കും അതേ അഭിപ്രായമാണുള്ളത്. ഗൂഢാലോചന നടത്തിയവരെക്കുറിച്ചും കൂടുതല്‍ അന്വേഷണം നടത്തണമെന്നും അദ്ദേഹം ആവശ്യപ്പെട്ടു.
മുള്ളപ്പള്ളി രാമചന്ദ്രന്‍ ആരെയാണ്‌ ലക്ഷ്യം വയ്‌ക്കുന്നതെന്ന്‌ തിരുവഞ്ചൂരിന്‌ നന്നായി ബോധ്യമായി. അട്ടിമറിയുണ്ടങ്കില്‍ അന്വേഷിക്കണമെന്നാണ്‌ തിരുവഞ്ചൂരും പറയുന്നത്‌. ടി.പി വധക്കേസിന്റെഅന്വേഷണം അട്ടിമറിക്കാന്‍ സിപിഎം കോണ്‍ഗ്രസ് ധാരണയില്ലെന്നും വമ്പന്‍ സ്രാവുകള്‍ കേസിലുണ്ടെന്ന് പറയുന്നവര്‍ തെളിവുനല്‍കണമായിരുന്നുവെന്നും തിരുവഞ്ചൂര്‍ പ്രതികരിച്ചു.
രണ്ടും ആഭ്യന്തരമന്ത്രിമാര്‍. ഒരാളുടെ കൈയ്യില്‍ സിബിഐയും മറ്റെയാളുടെ കൈയ്യില്‍ കേരള പോലീസും ഉള്ളപ്പോഴാണ്‌ വമ്പന്‍ സ്രാവുകളുമായി വീണ്ടും ഇറങ്ങിയിരിക്കുന്നത്‌.
https://www.facebook.com/Malayalivartha
