ബംഗളൂരുവിലെ ട്രാഫിക് യാത്രാദുരിതത്തെ കുറിച്ച് എടി ജീവനക്കാരന്റെ സോഷ്യല്‍ മീഡിയ പോസ്റ്റാണ് പുതിയ ചര്‍ച്ചകള്‍ക്ക് തുടക്കമിട്ടിരിക്കുന്നത്. വിദ്യാരാണ്യപുരയില്‍ നിന്നും വൈറ്റ്ഫീല്‍ഡിലെ ജോലിസ്ഥലത്തേക്ക് നിത്യേന യാത്ര ചെയ്യുന്ന യുവാവാണ് നഗരത്തിലെ മാറിയ ഗതാഗത സാഹചര്യങ്ങളെക്കുറിച്ച് ആശങ്ക പങ്കുവച്ച രംഗത്തെത്തിയത്.

മുന്‍പ് കാറിലായിരുന്ന യാത്ര ട്രാഫിക് കുരുക്ക് ഒഴിവാക്കാനാണ് ബൈക്കിലേക്ക് മാറ്റിയതെന്നും എന്നാല്‍ വാഹനം മാറ്റിയിട്ടും അവസ്ഥയില്‍ മാറ്റമില്ലെന്നും യുവാവ് സോഷ്യല്‍ മീഡിയയില്‍ കുറിച്ചു. എന്നാല്‍ ബൈക്കിലേയ്ക്ക് മാറിയപ്പോള്‍ കടുത്ത പൊടിയും പുകപടലങ്ങളും ശ്വസിച്ച് മണിക്കൂറുകളോളം ഗതാഗത കുരുക്കില്‍ കിടക്കേണ്ടിവരുന്നത് ജീവനക്കാരുടെ മാനസിക,ശാരീരിക ആരോഗ്യത്തെ ബാധിക്കുമെന്നും അദ്ദേഹം പോസ്റ്റില്‍ ചൂണ്ടികാട്ടുന്നുണ്ട്.

ഒരുകാലത്ത് വെറും 20 മിനിറ്റ് മാത്രം ആവശ്യമായിരുന്ന യാത്രയ്ക്ക് ഇന്ന് 3.5 മണിക്കൂറിലധികം സമയം റോഡില്‍ ചിലവഴിക്കേണ്ടി വരുന്നതായും അദ്ദേഹം പറഞ്ഞു. കഴിഞ്ഞ രണ്ട് പതിറ്റാണ്ടായി തുടരുന്ന മെട്രോ നിര്‍മ്മാണം, ഫ്‌ലൈഓവര്‍, റോഡ് പണി എന്നിവ വിദ്യാരണ്യപുര മുതല്‍ വൈറ്റ്ഫീല്‍ഡ് വരെയുള്ള യാത്ര നരകതുല്യമാക്കിയെന്നും യുവാവ് പോസ്റ്റില്‍ വ്യക്തമാക്കി.

ബംഗളൂരുവിലെ ലക്ഷക്കണക്കിന് ഐടി പ്രൊഫഷണലുകളുടെ നിത്യേനയുള്ള ദുരിത ജീവിതത്തിന്റെ നേര്‍ക്കാഴ്ചയാണ് യുവാവിന്റെ പോസ്റ്റിലൂടെ വീണ്ടും ചര്‍ച്ചയായിരിക്കുന്നത്. റോഡുകള്‍ മാറിമാറി പൊളിച്ചിടുന്നതിന് പകരം കൃത്യമായ ആസൂത്രണത്തോടെ സമയബന്ധിതമായി നിര്‍മ്മാണങ്ങള്‍ പൂര്‍ത്തിയാക്കാന്‍ സര്‍ക്കാര്‍ തയ്യാറാകാത്ത പക്ഷം ബംഗളൂരു നഗരത്തിലെ ഗതാഗതകുരുക്ക് തുടരുമെന്ന ആശങ്കയിലാണ് യാത്രക്കാര്‍.