ഐപിഎല്‍ ഒന്നാം ക്വാളിഫയര്‍ പോരാട്ടത്തില്‍ ഇന്ന് നിലവിലെ ചാംപ്യന്‍മാരായ ആര്‍സിബി മുന്‍ ചാംപ്യന്‍മാരായ ഗുജറാത്തിനെ നേരിടും. ആരാധകര്‍ക്ക് ഫൈനലിനു മുന്‍പ് ഒരു ബ്ലോക്ക്ബസ്റ്റര്‍ പോര് തന്നെ കാണാം. കിരീട പോരാട്ടത്തിലേക്കുള്ള വഴി നേരിട്ട് തുറന്നു കിട്ടുമെന്ന പ്രതീക്ഷയിലാണ് രണ്ടു ടീമുകളും. ഇന്ന് രാത്രി 7.30 മുതല്‍ ധരംശാലയിലാണ് പോരാട്ടം നടക്കുക.

ഇന്ന് പരാജയപ്പെടുന്ന ടീമിനു ഒരവസരം കൂടി ഫൈനല്‍ ബര്‍ത്ത് ഉറപ്പിക്കാനായി ലഭിക്കും. ജയിക്കുന്ന ടീം നേരിട്ട് ഫൈനലിലേക്ക് മുന്നേറും. തോല്‍ക്കുന്ന ടീമിനു എലിമിനേഷന്‍ പോരാട്ടം ജയിക്കുന്ന ടീമുമായി രണ്ടാം ക്വാളിഫയര്‍ കളിച്ച് ജയിച്ച് ഫൈനലുറപ്പിക്കാവുന്നതാണ്. രാജസ്ഥാന്‍ റോയല്‍സ്- സണ്‍റൈസേഴ്‌സ് ഹൈദരാബാദ് ടീമുകളാണ് എലിമിനേഷന്‍ പോരാട്ടം കളിക്കുന്നത്. ഈ മത്സരം നാളെ അരങ്ങേറും.

ഐപിഎല്ലില്‍ ഇതുവരെ എട്ട് മത്സരങ്ങളിലാണ് ആര്‍സിബിയും ഗുജറാത്തും ഏറ്റുമുട്ടിയത്. ഇരു പക്ഷവും 4 തവണ വീതം ജയിച്ചു. ഇത്തവണ രണ്ട് തവണ നേര്‍ക്കുനേര്‍ വന്നപ്പോള്‍ ആദ്യ കളിയില്‍ ബംഗളൂരു 5 വിക്കറ്റ് ജയം സ്വന്തമാക്കി. രണ്ടാം പോരില്‍ ഗുജറാത്ത് തിരിച്ചടിച്ചു. അവര്‍ 4 വിക്കറ്റ് ജയം പിടിച്ചെടുക്കുകയും ചെയ്തു.