അനിശ്ചിതത്വങ്ങള്ക്കൊടുവില് ബി.ജെ.പി സംസ്ഥാന ജനറല് സെക്രട്ടറി കെ.സുരേന്ദ്രന് പത്തനംതിട്ട ലോക്സഭാ മണ്ഡലം എന്.ഡി.എ സ്ഥാനാര്ത്ഥിയാകും
അനിശ്ചിതത്വങ്ങള്ക്കൊടുവില് ബി.ജെ.പി സംസ്ഥാന ജനറല് സെക്രട്ടറി കെ.സുരേന്ദ്രന് പത്തനംതിട്ട ലോക്സഭാ മണ്ഡലം എന്.ഡി.എ സ്ഥാനാര്ത്ഥിയാകും. ദേശീയ തെരഞ്ഞെടുപ്പ് സമിതി ഇക്കാര്യം ഔദ്യോഗികമായി പ്രഖ്യാപിച്ചു. ശ്രീധരന്പിള്ളയോ സുരേന്ദ്രനോ എന്ന് ആശങ്കയുണ്ടായിരുന്നു. സുരേന്ദ്രന് സ്ഥാനാര്ത്ഥിയാക്കണമെന്ന് പ്രവര്ത്തകര് ആദ്യം മുതലേ ആവശ്യപ്പെട്ടിരുന്നു. സുരേന്ദ്രന് അഭിവാദ്യം അര്പ്പിച്ച് മണ്ഡലത്തില് പോസ്റ്ററുകളും പ്രത്യക്ഷപ്പെട്ടിരുന്നു. എന്.എസ്.എസിന്റെ പിന്തുണയുള്ള ശ്രീധരന്പിള്ള സീറ്റിനായി ഏറെ ചരടുവലി നടത്തിയിരുന്നു. അതിന് പുറമേ പി.ജെ കുര്യനേയോ, പ്രയാര് ഗോപാലകൃഷ്ണനെയോ മത്സരിപ്പിക്കാനും ആലോചിച്ചിരുന്നു. എന്നാല് ഇരുവരും മത്സരിക്കാനില്ലെന്ന് ഇന്ന് പ്രഖ്യാപിച്ചിരുന്നു.
ബി.ജെ.പിയുടെ എ ക്ലാസ് മണ്ഡലങ്ങളിലൊന്നാണ് പത്തനംതിട്ട. ഇവിടുത്തെ സ്ഥാനാര്ത്ഥിത്വം വൈകിയതില് ആശങ്കയുണ്ടായിരുന്നു. ആദ്യ സ്ഥാനാര്ത്ഥി പട്ടിക പ്രഖ്യാപിച്ചിട്ടും പത്തനംതിട്ട ഒഴിച്ചിടുകയായിരുന്നു. സുരേന്ദ്രനെ തിരുവനന്തപുരത്ത് മത്സരിപ്പിക്കണമെന്ന് വി.മുരളീധരന് ആവശ്യപ്പെട്ടെങ്കിലും ആര്.എസ്.എസ് ഇടപെട്ട് കുമ്മനത്തെ നിര്ത്തുകയായിരുന്നു. ഒടുവില് എല്ലാ ആശങ്കകള്ക്കും വിരാമമിട്ട് സുരേന്ദ്രന് തന്നെ സീറ്റ് നല്കുകയായിരുന്നു. കഴിഞ്ഞ തവണ എം.ടി രമേശ് പത്തനംതിട്ട മത്സരിച്ചപ്പോള് നല്ല വോട്ട് നേടാനായിരുന്നു. ശബരിമല സമരത്തിലൂടെ പത്തനംതിട്ട മണ്ഡലത്തില് നല്ല പ്രതിച്ഛായ നേടിയ സുരേന്ദ്രന്റെ സ്ഥാനാര്ത്ഥിത്വം പാര്ട്ടിക്ക് കൂടുതല് വോട്ടുകള് നേടാന് സഹായിക്കുമെന്ന് നേതാക്കള് വിലയിരുത്തുന്നു.
സ്ഥാനാര്ത്ഥി പ്രഖ്യാപനം വൈകുന്തോറും മറ്റ് മണ്ഡലങ്ങളിലെ ജയസാധ്യതയെ ബാധിക്കുമെന്ന് നേതൃത്വവും വിലയിരുത്തിയിരുന്നു. തുടര്ന്ന് കേന്ദ്ര തെരഞ്ഞെടുപ്പ് സമിതി ആര്.എസ്.എസിന്റെയും പ്രവര്ത്തകരുടെയും വികാരം കണക്കിലെടുത്ത് സുരേന്ദ്രനെ കളത്തിലിറക്കാന് തീരുമാനിച്ചത്. അതേസമയം തുടക്കം മുതല് പത്തനംതിട്ടയില് സുരേന്ദ്രനെ മാത്രമാണ് പരിഗണിച്ചിരുന്നതെന്ന് ബി.ജെ.പി നേതാക്കള് പറയുന്നു. കഴിഞ്ഞതവണ സംസ്ഥാന പ്രസിഡന്റാകാന് സുരേന്ദ്രന് ഭാഗ്യം ലഭിച്ചതാണ്. അമിത്ഷാ അക്കാര്യം തീരുമാനിക്കുകയും ചെയ്തു. എന്നാല് ആര്.എസ്.എസിന്റെ എതിര്പ്പും എന്.എസ്.എസിന് ശ്രീധരന് പിള്ളയോടുള്ള ബന്ധവും അത് തട്ടിത്തെറിപ്പിക്കുകയായിരുന്നു. അതേ ശ്രീധരന് പിള്ളയെ തട്ടിത്തെറിപ്പിച്ചാണ് സുരേന്ദ്രന് സ്ഥാനാര്ത്ഥിയാകുന്നത്.
എന്.എസ്.എസിനും കെ.പി.എം.എസിനും വോട്ടുള്ള പത്തനംതിട്ടയില് സുരേന്ദ്രന് മത്സരിപ്പിക്കുന്നത് അഭികാമ്യമല്ലെന്ന് ചില നേതാക്കള് അഭിപ്രായപ്പെട്ടിരുന്നു. എസ്.എന്.ഡി.പി ജനറല് സെക്രട്ടറി വെള്ളാപ്പള്ളി നടേശന്റെ നിര്ദ്ദേശപ്രകാരമാണ് സുരേന്ദ്രനെ സ്ഥാനാര്ത്ഥിയാക്കുന്നതെന്നും ആരോപണം ഉയര്ന്നു. അതോടെ ഇടഞ്ഞ എന്.എസ്.എസ് നേതൃത്വത്തെ അനുനയിപ്പിക്കാന് മുതിര്ന്ന ബി.ജെ.പി നേതാവ് രാധാകൃഷ്ണമേനോനെ ചുമതലപ്പെടുത്തിയിരുന്നു. എന്നാല് കേന്ദ്രനേതൃത്വം സുരേന്ദ്രനെ തന്നെ മത്സരിപ്പിക്കണമെന്ന് ഉറച്ച തീരുമാനം എടുക്കുകയായിരുന്നു. അതിന് മു്ന്നില് സംസ്ഥാന അധ്യക്ഷന് ശ്രീധരന്പിള്ളയും സംഘവും പത്തിമടക്കി.
https://www.facebook.com/Malayalivartha