അമ്പലപ്പുഴയില്‍ സ്‌കൂളിന് സമീപമുള്ള കൊട്ടിടത്തിലെ അടച്ചിട്ട മുറിയില്‍ നിന്ന് എട്ടുലക്ഷം രൂപയോളം വിലവരുന്ന നിരോധിത പുകയില ഉല്പന്നമായ ഹാന്‍സ് പൊലീസ് പിടികൂടി. അമ്പലപ്പുഴ ഗവണ്‍മെന്റ് മോഡല്‍ ഹയര്‍ സെക്കന്‍ഡറി സ്‌കൂളിന് എതിര്‍വശമുള്ള കൊച്ചീത്തറ ബില്‍ഡിങ്ങില്‍ നിന്നാണ് 16 വലിയ ചാക്കുകളിലായി സൂക്ഷിച്ചിരുന്ന ഹാന്‍സ് കണ്ടെടുത്തത്. കടയുടമ രഞ്ജിത് ലാല്‍ പൊലീസിനെ കണ്ട് ഓടിരക്ഷപ്പെട്ടു. ഇയാളുടെ വീടിനോട് ചേര്‍ന്നുള്ള കടമുറിയിലാണ് ചാക്കുകളിലായി ഹാന്‍സ് സൂക്ഷിച്ചിരുന്നത്. രഹസ്യവിവരം ലഭിച്ചതിനെത്തുടര്‍ന്ന് അമ്പലപ്പുഴ പൊലീസ് സംഘം നടത്തിയ പരിശോധനയിലാണ് വന്‍ ലഹരിശേഖരം കണ്ടെടുത്തത്.

ഒരു ചാക്കില്‍ 50 വലിയ പാക്കറ്റ് ഹാന്‍സാണുള്ളത്. ഇത്തരത്തില്‍ പൊട്ടിക്കാത്ത 16 ചാക്കും പൊട്ടിച്ച നിലയിലുള്ള രണ്ട് ചാക്കുമാണ് ഉണ്ടായിരുന്നത്. ഇയാളുടെ വീട്ടില്‍ നിന്ന് കസ്റ്റഡിയിലെടുത്ത ആഡംബര കാറിലും ചാക്കുകളില്‍ ഹാന്‍സ് സൂക്ഷിച്ചിരുന്നു. നേരത്തെയും നിരോധിത പുകയില ഉല്പന്നം വിറ്റ കേസില്‍ പ്രതിയാണ് രഞ്ജിത് ലാല്‍ എന്ന് പൊലീസ് പറഞ്ഞു. ഹാന്‍സ് കടത്താനുപയോഗിച്ച കാറും പൊലീസ് കസ്റ്റഡിയിലെടുത്തിട്ടുണ്ട്. ഒളിവില്‍ പോയ പ്രതിക്കായി അന്വേഷണം ഊര്‍ജ്ജിതമാക്കി.