ദക്ഷിണേന്ത്യയില്‍ അങ്കത്തിനെത്തിയ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ ഭൂരിപക്ഷം രണ്ടര ലക്ഷം കവിയുമെന്ന് പ്രവചനം. ഗണിതശാസ്ത്ര അധ്യാപകനായ ഗോപാലകൃഷ്ണനാണ് ഇക്കാര്യം പ്രവചിച്ചത്. രാഹുല്‍ഗാന്ധി വയനാട്ടില്‍ മത്സരിക്കുന്നത് മലബാറിലെ മറ്റു മണ്ഡലങ്ങളിലും യു.ഡി.എഫിന് ഏറെ ഗുണം ചെയ്യുമെന്നും ഗോപാലകൃഷ്ണന്‍ പറയുന്നു. വിവിധ മണ്ഡലങ്ങള്‍ സന്ദര്‍ശിച്ചും സുഹൃത്തുക്കളില്‍ നിന്നും കിട്ടിയ വിവരങ്ങളുടെ അടിസ്ഥാനത്തിലാണ് ഗോപാലകൃഷ്ണന്‍ പ്രവചനം നടത്തുന്നത്. മുമ്പും തെരഞ്ഞെടുപ്പ് പ്രചരണങ്ങള്‍ നടത്തി ഇദ്ദേഹം ശ്രദ്ധേയനായിട്ടുണ്ട്. കേരളത്തില്‍ യു.ഡി.എഫ് മേല്‍ക്കൈ നേടുമെന്ന കാര്യത്തില്‍ സംശയമില്ല. 12 സീറ്റുകളില്‍ യു.ഡി.എഫിന് വിജയസാധ്യതയുണ്ട്. ഇടതുജനാധിപത്യ മുന്നണി എട്ട് സീറ്റില്‍ ഒതുങ്ങും. ബി.ജെ.പി അക്കൗണ്ട് തുറക്കാന്‍ സാധ്യത തള്ളിക്കളയാനാവില്ലെന്നും ഗോപാലകൃഷ്ണന്‍ പ്രവചിക്കുന്നു. 

സംസ്ഥാനത്തെ കക്ഷിനില ഇങ്ങിനെയായിരിക്കുമെന്നും ഗോപാലകൃഷ്ണന്‍ പറയുന്നു. കോണ്‍ഗ്രസ് (ഐ) - 8-9, മുസ്‌ലിംലീഗ്്് -2, കേരളാ കോണ്‍ഗ്രസ്് (എം)-0-1, ആര്‍.എസ്.പി -0-1, സി.പി.എം-7-8, സി.പി.ഐ-1, ബി.ജെ.പി-0-1. യു.ഡി.എഫിന് 42 ശതമാനവും, എല്‍.ഡി.എഫിന് 38 ശതമാനവും എന്‍.ഡി.എക്ക് 18 ശതമാനവും വോട്ടുകിട്ടും. എന്‍.ഡി.എ.ക്ക് എല്ലാ മണ്ഡലങ്ങളിലും 12 ശതമാനം മുതല്‍ 36 ശതമാനം വരെ വോട്ടുകിട്ടും. എന്‍.ഡി.എയുടെ വോട്ട് മൂന്ന് ശതമാനം കുറഞ്ഞാല്‍ യു.ഡി.എഫിന് 14 സീറ്റ് കിട്ടുമെന്നും അദ്ദേഹം പ്രവചിക്കുന്നു. 

കേരളത്തില്‍ ഭരണവിരുദ്ധ വികാരം വളരെ കൂടുതലാണ്. ശബരിമലയില്‍ 10 വയസ്സിനും 50 വയസ്സിനും ഇടയില്‍ പ്രായമുള്ള വനിതകളെ പ്രവേശിപ്പിക്കണമെന്ന സുപ്രീംകോടതി വിധിയും അതു നടപ്പാക്കാനുളള കേരള സര്‍ക്കാറിന്റെ നിര്‍ബന്ധ ബുദ്ധിയും ഇടതു മുന്നണിക്ക് ദോഷം ചെയ്യും. അത് ബി.ജെ.പി.യുടെ വോട്ട് വര്‍ദ്ധിക്കുന്നതിന് ഇടയാക്കും. 2014 ലെ ലോക്‌സഭാ തെരഞ്ഞെടുപ്പില്‍ കേരളത്തില്‍ ബി.ജെ.പിക്ക് 10 ശതമാനം വോട്ട് ആണ് കിട്ടിയത്. അഞ്ചു വര്‍ഷം കൊണ്ട് ബി.ജെ.പിയുടെ വോട്ട് 8 ശതമാനം വര്‍ദ്ധിച്ചിട്ടുണ്ട്. സര്‍വേയില്‍ പറയുന്നു. ബി.ജെ.പിയുടെ വോട്ട് വിഹിതം കൂടിയില്ലായിരുന്നെങ്കില്‍ യു.ഡി.എഫിന് 17 സീറ്റ് കിട്ടിയേനെ എന്നും അദ്ദേഹം പറയുന്നു. ഗണിതശാസ്ത്ര അധ്യാപകനായ ഗോപാലകൃഷ്ണന്‍ മുന്‍കാലങ്ങളിലും തെരഞ്ഞെടുപ്പ് ഫലം പ്രവചിച്ചിട്ടുണ്ട്.

നോട്ട്‌നിരോധനവും ജി.എസ്.ടിയും ബി.ജെ.പിക്ക് ദോഷമാകും. ബാലക്കോട്ടെ വ്യോമാക്രമണം ഉത്തരേന്ത്യയില്‍ ഗുണമാകുമെന്നും സര്‍വ്വേ പറയുന്നു. അത് കൊണ്ടാണ് കോണ്‍ഗ്രസ് ദക്ഷിണേന്ത്യ കേന്ദ്രീകരിച്ച് കൂടുതല്‍ തെരഞ്ഞെടുപ്പ് പ്രവര്‍ത്തനങ്ങള്‍ നടത്തുന്നത്. കോണ്‍ഗ്രസിനുള്ള 45 എംപിമാരില്‍ ഭൂരിപക്ഷവും ദക്ഷിണേന്ത്യയില്‍ നിന്നാണ്. അത് കൂടി കണക്കിലെടുത്താണ് രാഹുല്‍ വയനാട്ടില്‍ മത്സരിക്കാന്‍ തീരുമാനിച്ചത്. കോണ്‍ഗ്രസിന്റെ ഏറ്റവും സുരക്ഷിതമായ മണ്ഡലമാണ് വയനാട്. എം.ഐ ഷാനവാസ് രണ്ട് തവണ ജയിച്ച മണ്ഡലമാണ്. രാഹുലെത്തിയതോടെ തങ്ങളുടെ മണ്ഡലത്തില്‍ നിന്നൊരു പ്രധാനമന്ത്രി എന്നൊരു വികാരം വയനാട്ടിലെ ജനതയ്ക്കുണ്ട്. അത് ഭൂരിപക്ഷം കൂട്ടുമെന്നാണ് തോട്ടയ്ക്കാടിന്റെ പ്രവചനം.