തെരഞ്ഞെടുപ്പ് ഭീതിയില് ബിഷപ്പ് ഫ്രാങ്കോയ്ക്കെതിരായ കുറ്റപത്രം കോടതിയില് സമര്പ്പിക്കാന് ആഭ്യന്തരവകുപ്പ് തീരുമാനിച്ചു
തെരഞ്ഞെടുപ്പ് ഭീതിയില് ബിഷപ്പ് ഫ്രാങ്കോയ്ക്കെതിരായ കുറ്റപത്രം കോടതിയില് സമര്പ്പിക്കാന് ആഭ്യന്തരവകുപ്പ് തീരുമാനിച്ചു. കുറ്റപത്രം സമര്പ്പിച്ചില്ലെങ്കില് സമരത്തിനിറങ്ങുമെന്ന കന്യാസ്ത്രീകളുടെ ഭീഷണി തിരിച്ചടിയാകുമെന്ന് ഭയന്നാണ് പെട്ടെന്ന് തീരുമാനം കൈക്കൊണ്ടതെന്ന് അറിയുന്നു. കോട്ടയം എസ്.പി ഹരിശങ്കറിന്റെ നേതൃത്വത്തില് തയറാക്കിയ കുറ്റപത്രം സമര്പ്പിക്കുവാന് സംസ്ഥാന പൊലീസ് മേധാവിയുടെ അനുമതി ലഭിച്ചെും ചൊവ്വാഴ്ച്ച കോടതിയില് സമര്പ്പിക്കുമെന്നും പൊലീസ് അറിയിച്ചു. ഇതോടെ കുറ്റപത്രം വൈകുന്നുവെന്നാരോപിച്ച് സേവ് അവര് സിസ്റ്റേഴ്സ് ആക്ഷന് കൗണ്സില് എറണാകുളത്ത് സംഘടിപ്പിക്കാനിരുന്ന സമരപ്രഖ്യാപന കണ്വന്ഷന് മാറ്റിവച്ചതായി ഭാരവാഹികള് അറിയിച്ചു.
ശനിയാഴ്ച രാവിലെ എറണാകുളത്ത് ചേര്ന്ന അടിയന്തിര യോഗംത്തിന് ശേഷമാണ് തീരുമാനം.ശനിയാഴ്ച വൈകിട്ട് എറണാകുളം വഞ്ചി സ്ക്വയറില് വിശദീകരണ യോഗം ചേരും. അതിന് ശേഷം പുതിയ നിലപാടുകള് പ്രഖ്യാപിക്കുമെന്നും ആക്ഷന് കൗണ്സില് ഭാരവാഹികള് അറിയിച്ചു. കുറ്റപത്രം ഉടന് സമര്പ്പിക്കാമെന്ന് പൊലീസ് അറിയിച്ച സാഹചര്യത്തില് കുറവിലങ്ങാട് മഠത്തില് നിന്നുള്ള കന്യാസ്ത്രീകള് പരിപാടിയില് നിന്ന് വിട്ടുനില്ക്കും. ചൊവ്വാഴ്ച്ചവരെ കാത്ത് നില്ക്കുമെന്നും വീണ്ടും വൈകുന്ന സാഹചര്യമുണ്ടായാല് കന്യാസ്ത്രീകള് സമരത്തിനിറങ്ങുമെന്നും സേവ് അവര് സിസ്റ്റേഴ്സ് ഭാരവാഹികള് വ്യക്തമാക്കി. കന്യാസ്ത്രീയെ ബലാത്സംഗം ചെയ്തെന്ന പരാതിയില് ഇക്കഴിഞ്ഞ സെപ്റ്റംബര് 21 നാണ് ജലന്തര് രൂപത ബിഷപ്പ് ഫ്രാങ്കോ മുളയ്ക്കലിനെ അറസ്റ്റ് ചെയ്തത്. മൂന്നു മാസം നീണ്ട അന്വേഷണത്തിനൊടുവിലായിരുന്നു അറസ്റ്റ്.
കുറവിലങ്ങാട്ടെ മഠത്തില് വച്ച് ബിഷപ്പ് ഫ്രാങ്കോ മുളക്കല് പീഡിപ്പിച്ചെന്ന പരാതിയുമായി കന്യാസ്ത്രീ 2017 ജൂണ് 27നാണ് പൊലീസിനെ സമീപിച്ചത്. കൃത്യമായ സാക്ഷിമൊഴികളും തെളിവുകളുണ്ടായിട്ടും പ്രതിയെ അറസ്റ്റ് ചെയ്യുന്നതില് കാലതാമസമുണ്ടായി. വിവിധ സഭകളിലെ ഉന്നതര് സര്ക്കാരിലും എല്.ഡി.എഫിലും സ്വാധീനം ചെലുത്തിയാണ് അറസ്റ്റ് വൈകിച്ചതെന്ന് ആരോപണം ഉയര്ന്നിരുന്നു. അറസ്റ്റ് വൈകിയതിനെ തുടര്ന്ന് കന്യാസ്ത്രീകള് ഹൈക്കോടതിക്ക് മുന്നില് സമരം നടത്തിയിരുന്നു. അവിടേക്ക് വി.എസ് ഒഴികെയുള്ള ഒരു നേതാക്കളും തിരിഞ്ഞ് നോക്കിയില്ല. അതും വിമര്ശനത്തിന് വഴിവെച്ചിരുന്നു. രാഷ്ട്രീയ ഭേദമന്യേ പലരും സമരത്തിന് പിന്തുണ അറിയിച്ചിരുന്നു.
കുറവിലങ്ങാട് മഠത്തിലെ അഞ്ചു കന്യാസ്ത്രീകള് എറണാകുളം വഞ്ചി സ്ക്വയറിലാണ് പ്രത്യക്ഷ സമരം നടത്തിയത്. ദേശീയ ശ്രദ്ധയാകര്ഷിച്ച ഈ സമരത്തിനൊടുവിലായിരുന്നു ബിഷപ്പിനെ പൊലീസ് അറസ്റ്റ് ചെയ്തത്. എന്നാല് അറസ്റ്റ് കഴിഞ്ഞ് മാസങ്ങള് പിന്നിട്ടിട്ടും കേസിലെ കുറ്റപത്രം സമര്പ്പിക്കാന് പൊലീസിന് കഴിഞ്ഞില്ല. ഇതിനിടെ ബിഷപ്പ് അനുകൂലികള് നിരന്തരമായി ഭീഷണിപ്പെടുത്തുന്നുവെന്ന പരാതിയുമായി കേസിലെ സാക്ഷികളായ കന്യാസ്ത്രീകള് രംഗത്തു വരികയും ചെയ്തു. കഴിഞ്ഞ മാര്ച്ച് 19ന് കേസിലെ സാക്ഷികളായ കന്യാസ്ത്രീകള് കോട്ടയം എസ്പിയെ നേരിട്ടുകണ്ട് കുറ്റപത്രം വൈകുന്നതില് പ്രതിഷേധം അറിയിച്ചിരുന്നു.
https://www.facebook.com/Malayalivartha
