ആയുധം കണ്ടെടുത്ത നാറാത്ത്‌ ഒരു കലാപ ഭൂമിയാകുമോ? നിരോധനാജ്ഞ ലംഘിച്ച്‌ ബിജെപി മാര്‍ച്ച്‌, തടയുമെന്ന്‌ പോപ്പുലര്‍ ഫ്രണ്ട്‌
ഒരിക്കല്‍ കൂടി കേരളം കലപഭൂമിയാകുമോയെന്ന ആശങ്കയിലാണ്‌. കണ്ണൂര്‍ നാറാത്ത്‌, പോപ്പുലര്‍ ഫ്രണ്ടിന്റെ നിയന്ത്രണത്തിലുള്ള തണല്‍ ചാരിറ്റിബിള്‍ ട്രെസ്റ്റില്‍ ആയുധ പരിശീലനം നടത്തിയ 21 പോപ്പുലര്‍ ഫ്രണ്ട്‌ പ്രവര്‍ത്തകരെ പോലീസ്‌ അറസ്റ്റ്‌ ചെയ്‌തിരുന്നു. പോപ്പുലര്‍ ഫ്രണ്ടിന്റെ ആയുധ പരിശീലനം പോലീസ്‌ കണ്ടെത്തിയതോടെയാണ്‌ ഹൈന്ദവ സംഘടനകള്‍ ഇവിടെ രംഗത്തെത്തിയത്‌. എന്നാല്‍ അവര്‍ക്കെതിരെ പോപ്പുലര്‍ ഫ്രണ്ടും മുന്നിട്ടിറങ്ങിയതോടെ നാറാത്തെ ജനങ്ങള്‍ തികച്ചും പേടിച്ചിരിക്കുകയാണ്‌.
അതിനിടെ നാറാത്തെ പോപ്പുലര്‍ ഫ്രണ്ട്‌ ആയുധ പരിശീലന കേന്ദ്രത്തിലേക്ക്‌ ബിജെപി മാര്‍ച്ച്‌ നടത്തുന്നു. നാറാത്ത്‌ നിന്നും പോലീസ്‌ ആയുധങ്ങള്‍ കണ്ടെടുത്തതില്‍ പ്രതിക്കൂട്ടിലായ പോപ്പുലര്‍ ഫ്രണ്ടിനെതിരേയാണ്‌ ബിജെപി മാര്‍ച്ച്‌ പ്രഖ്യാപിച്ചത്‌. ഭീകര കേന്ദ്രം തകര്‍ക്കുക, രാജ്യദ്രോഹികളെ ജയിലിലടയ്‌ക്കുക, നാറാത്ത്‌ കേസ് എന്‍ഐഎയെ ഏല്‍പ്പിക്കുക എന്നീ ആവശ്യങ്ങള്‍ ഉന്നയിച്ചാണ്‌ മാര്‍ച്ച്‌. അതേസമയം മാര്‍ച്ച്‌ നടത്തിയാല്‍ തടയുമെന്ന്‌ പോപ്പുലര്‍ ഫ്രണ്ടും പ്രഖ്യാപിച്ചു കഴിഞ്ഞു. സംഘര്‍ഷ സാധ്യത പരിഗണിച്ച്‌ ഇവിടെ നിരോധനാജ്ഞ പ്രഖ്യാപിച്ചിരുക്കുകയാണ്‌. എന്നാല്‍ നിരോധനാജ്ഞ ലംഘിച്ചുകൊണ്ടാണ്‌ ബിജെപി പ്രവര്‍ത്തകരുടെ ഈ മാര്‍ച്ച്‌. സ്ഥലത്ത്‌ സംഘര്‍ഷാവസ്ഥയുള്ളതിനാല്‍ വന്‍ പോലീസ്‌ സന്നാഹവും നിലയുറപ്പിച്ചിട്ടുണ്ട്‌. ബിജെപി സംസ്ഥാന ജനറല്‍ സെക്രട്ടറി കെ. സുരേന്ദ്രനാണ്‌ മാര്‍ച്ച്‌ ഉദ്‌ഘാടനം ചെയ്യുന്നത്‌.
ഈ മാസം 13 വരെയാണ്‌ നാറാത്ത്‌ നിരോധനാജ്ഞയുള്ളത്‌. പോലീസ്‌ ആക്‌ട്‌ 79 സെക്ഷന്‍ പ്രകാരം ജില്ലാ പോലീസ്‌ സൂപ്രണ്ടാണ്‌ നിരോധനാജ്ഞ പ്രഖ്യാപിച്ചത്‌. ഈ ദിവസങ്ങളില്‍ പൊതുയോഗം, പ്രകടനം എന്നിവയും നിരോധിച്ചിട്ടുണ്ട്‌. ഒന്നില്‍ കൂടുതല്‍ പേര്‍ ബൈക്കില്‍ യാത്ര ചെയ്യല്‍, സംഘം ചേരല്‍, ആയുധം കൈവശം വയ്‌ക്കല്‍ എന്നിവയും നിരേധിച്ചിട്ടുണ്ട്‌. ബിജെപി മാര്‍ച്ച്‌ നിരോധിച്ചതിനാല്‍ കടുത്ത അമര്‍ഷം പാര്‍ട്ടി നേതാക്കള്‍ പ്രകടിപ്പിക്കുന്നുമുണ്ട്‌.
https://www.facebook.com/Malayalivartha
