ഓരോ ബൂത്തിലും ബി.ജെ.പി.ക്ക് എത്രവോട്ടുകിട്ടുമെന്ന് ആര്‍.എസ്.എസ്. കണക്കെടുക്കുന്നു. ഞായറാഴ്ചയും 20നുമാണ് കണക്കെടുപ്പ്. പെരുപ്പിച്ച കണക്ക് വേണ്ടെന്നും നൂറുശതമാനം ഉറപ്പായ വോട്ടുകള്‍ എത്രയെന്ന് പറഞ്ഞാല്‍ മതിയെന്നുമാണ് നിര്‍ദേശം.

മൂന്നുമുന്നണികള്‍ക്കും ലഭിക്കുന്ന ഉറച്ച വോട്ടുകള്‍, അനുഭാവി വോട്ടുകള്‍, ആടിനില്‍ക്കുന്ന വോട്ടുകള്‍, നിഷ്പക്ഷര്‍ എന്നിങ്ങനെ പ്രത്യേകം അറിയിക്കണം. ഏപ്രില്‍ എട്ടിന് ആര്‍.എസ്.എസ്. ബൂത്തുതലത്തില്‍ ആദ്യഘട്ട കണക്കെടുപ്പ് നടത്തിയിരുന്നു. തുടര്‍പ്രവര്‍ത്തനങ്ങള്‍കൊണ്ട് എത്രത്തോളം വോട്ട് വര്‍ധിപ്പിക്കാനായി എന്നറിയാനാണ് രണ്ടും മൂന്നും ഘട്ടം.

ഇനിയുള്ള ഒമ്പതുദിവസങ്ങളില്‍ ആര്‍.എസ്.എസ്. മാസ്റ്റര്‍പ്ലാന്‍ അനുസരിച്ച് പ്രവര്‍ത്തിക്കണമെന്ന് ബി.ജെ.പി. പ്രവര്‍ത്തകര്‍ക്ക് നിര്‍ദേശം കൊടുത്തിട്ടുണ്ട്. 13 മുതല്‍ 21 വരെ മൂന്നുഘട്ടങ്ങളിലായി വീടുകയറി വോട്ടുതേടും. വൈകുന്നേരങ്ങളില്‍ കുടുംബസംഗമങ്ങള്‍ സംഘടിപ്പിക്കണമെന്നും രാത്രിതന്നെ പ്രവര്‍ത്തനങ്ങള്‍ അവലോകനം ചെയ്യണമെന്നും കീഴ്ഘടകങ്ങളോട് നിര്‍ദേശിച്ചിട്ടുണ്ട്. സമാന്തരമായി ശബരിമലകര്‍മസമിതിയുടെ നേതൃത്വത്തില്‍ സ്ത്രീകളുടെ സംഘം വീടുകളില്‍ക്കയറി ശബരിമല സംഭവം വിശദീകരിക്കാനും ആവശ്യപ്പെട്ടിട്ടുണ്ട്.
താഴെത്തട്ടിലെ പ്രവര്‍ത്തനങ്ങള്‍ ഏകോപിപ്പിക്കാനായി ആര്‍.എസ്.എസ്. വിഭാഗ്തല ചുമതലക്കാര്‍ കഴിഞ്ഞ ദിവസങ്ങളില്‍ പഞ്ചായത്ത് തലത്തില്‍ യോഗങ്ങള്‍ വിളിച്ചിരുന്നു. ബൂത്തുകളില്‍നിന്നെടുക്കുന്ന കണക്ക് അന്നുതന്നെ നിയമസഭാമണ്ഡല സംയോജകന്മാര്‍ പാര്‍ലമെന്റ് മണ്ഡലം സംയോജകന്മാര്‍ക്ക് കൈമാറണം. തിരുവനന്തപുരം, പത്തനംതിട്ട, തൃശ്ശൂര്‍, പാലക്കാട് മണ്ഡലങ്ങളില്‍ ബി.ജെ.പി.ക്ക് വിജയസാധ്യതയുണ്ടെന്നാണ് ആര്‍.എസ്.എസ്. വിലയിരുത്തല്‍.

ആര്‍.എസ്.എസ്. തിരഞ്ഞെടുപ്പ് അട്ടിമറിക്കയാണെന്ന് സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണന്‍. വടക്കഞ്ചേരി ലോക്കല്‍ കമ്മിറ്റിയുടെ നേതൃത്വത്തില്‍ നടന്ന എല്‍.ഡി.എഫ്. തിരഞ്ഞെടുപ്പ് റാലി ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞദിവസം ത്രിപുരയില്‍നടന്ന തിരഞ്ഞെടുപ്പില്‍ 60 ശതമാനം പേര്‍ വോട്ടു ചെയ്ത് കഴിഞ്ഞപ്പോള്‍ പിന്നീട് വോട്ടുചെയ്യാന്‍ ആര്‍.എസ്.എസ്. പ്രവര്‍ത്തകര്‍ അനുവദിച്ചില്ല. ഇനി മോദി അധികാരത്തില്‍വന്നാല്‍ തിരഞ്ഞെടുപ്പ് ഉണ്ടാകില്ലെന്ന് സാക്ഷി മഹാരാജ് നേരത്തേ പറഞ്ഞിരുന്നു. ഇതിന്റെ തുടക്കമാണ് ത്രിപുരയില്‍ കണ്ടത്. ജനാധിപത്യവും മതേതരത്വവും അപകടത്തിലാക്കുന്ന തരത്തിലുളള പ്രവര്‍ത്തനങ്ങളാണ് കഴിഞ്ഞ അഞ്ചുവര്‍ഷം രാജ്യംഭരിച്ച ബി.ജെ.പി.യില്‍ നിന്നുണ്ടായിട്ടുള്ളതെന്നും അദ്ദേഹം പറഞ്ഞു.