എന്‍.ഡി.എ സ്ഥാനാര്‍ത്ഥികള്‍ക്കായി ശബരിമല വിഷയം ഉന്നയിച്ച് ശബരിമല കര്‍മ്മസമിതി സ്ഥാപിച്ച ഫ്ലെക്സ് ബോര്‍ഡുകള്‍ തെരഞ്ഞെടുപ്പ് കമ്മീഷന്‍ നീക്കം ചെയ്തു. 'മണ്ഡലമേതായാലും മണ്ഡലകാലം മറക്കരുത്' എന്ന മുദ്രാവാക്യവുമായി പലമണ്ഡലങ്ങളിലും സ്ഥാപിച്ച ബോര്‍ഡുകളാണ് നീക്കിയത്. ബോര്‍ഡുകള്‍ നീക്കം ചെയ്യുന്നതിനെ ബി.ജെ.പി പ്രവര്‍ത്തകര്‍ തടയാന്‍ ശ്രമിച്ചത് പലയിടത്തും നേരിയ സംഘര്‍ഷത്തിനിടയാക്കി. എല്ലാ രാഷ്ട്രീയ പാര്‍ട്ടികളുടെയും അനുമതിയില്ലാതെ സ്ഥാപിച്ച ഫ്‌ലക്‌സുകളും ചുവരെഴുത്തകളും ഉള്‍പ്പടെ നീക്കം ചെയ്യുന്നതിന്റെ ഭാഗമായാണ് നടപടിയെന്നാണ് തെരഞ്ഞെടുപ്പ് ഉദ്യോഗസ്ഥരുടെ വിശദീകരണം.

എന്നാല്‍ ഇടത് സര്‍ക്കാരിന്റെ താല്‍പര്യത്തിന് അനുസരിച്ചാണ് ഉദ്യോഗസ്ഥര്‍ പ്രവര്‍ത്തിക്കുന്നതെന്നും ഇതിനെ നിയമപരമായി നേരിടുമെന്നും കര്‍മ്മ സമിതി നേതാവ് കെ.പി ശശികല പറഞ്ഞു. തെരഞ്ഞെടുപ്പ് കമ്മീഷന്റെ എല്ലാ മാനദണ്ഡങ്ങളും പാലിച്ചാണ് ബോര്‍ഡുകള്‍ സ്ഥാപിച്ചതെന്നും അവര്‍ അവകാശപ്പെട്ടു. തെരഞ്ഞെടുപ്പ് ചട്ടംലംഘിക്കുന്നവര്‍ക്കെതിരെ ശക്തമായ നിലപാട് എടുക്കുമെന്ന നിലപാടിലാണ് തെരഞ്ഞെടുപ്പ് കമ്മീഷന്‍. മുസ്്‌ലിംവിരുദ്ധപരാമര്‍ശം നടത്തിയ ബി.ജെ.പി സംസ്ഥാന അധ്യക്ഷന്‍ ശ്രീധരന്‍ പിള്ളയ്‌ക്കെതിരെ തെരഞ്ഞെടുപ്പ് കമ്മീഷന്‍ നടപടി എടുക്കണമെന്ന് കേന്ദ്രതെരഞ്ഞെടുപ്പ് കമ്മീഷനോട് ആവശ്യപ്പെട്ടിട്ടുണ്ട്.

വര്‍ഗീയ വിദ്വേഷം ജനിപ്പിക്കുന്ന ഹിന്ദുഐക്യവേദിയുടെ ഒരു ലക്ഷത്തോളം ലഘുലേഖകള്‍ തെരഞ്ഞെടുപ്പ് കമ്മീഷന്റെ പ്രത്യേക സ്‌ക്വാഡ് കഴിഞ്ഞയാഴ്ച പിടിച്ചെടുത്തിരുന്നു. ആറ്റിങ്ങല്‍ അവനവന്‍ചേരിയില്‍ നിന്നാണ്് നോട്ടീസുകള്‍ പിടിച്ചെടുത്തത്. ഇന്നോവ കാറില്‍ നിന്നാണ് നോട്ടീസുകള്‍ പിടിച്ചെടുത്തത്. ശബരിമല: കമ്മ്യുണിസ്റ്റ്‘ഭീകരതയും കോണ്‍ഗ്രസിന്റെ വഞ്ചനയും എന്ന പേരില്‍ അച്ചടിച്ച ലഘുലേഖകളാണ് പിടികൂടിയത്. കലൂര്‍ പാവക്കുളത്ത് ശബരിമല കര്‍മ്മ സമിതി സംസ്ഥാന കാര്യാലയത്തിന്റെ പേരിലാണ് ലഘുഘേകള്‍ അച്ചടിച്ചിരിക്കുന്നത്.

ഹിന്ദുഐക്യവേദി നേതാവ് കിളിമാനൂര്‍ സുരേഷ് ഉള്‍പ്പെടെയുള്ളവരാണ്് നോട്ടീസ് വിതരണത്തിനായി കൊണ്ടുപോയത്. മതത്തിന്റെ പേരില്‍ വോട്ട് പിടിക്കരുതെന്ന തെരഞ്ഞെടുപ്പ് കമീഷന്റെ കര്‍ശന നിര്‍ദ്ദേശം നിലനില്‍ക്കെയാണ് വര്‍ഗീയത പ്രചരിപ്പിക്കുന്ന ലഘുലേഖകള്‍ വ്യാപകമായി പ്രചരിപ്പിക്കുന്നത്. ലഘുലേഖകള്‍ കൊണ്ടു വന്ന വാഹനം പൊലീസ് പിടിച്ചെടുത്തു. ലഘുലേഖകളുടെയും വാഹനത്തിന്റെയും മറ്റും ദൃശ്യങ്ങള്‍ ഉദ്യോഗസ്ഥര്‍ തെളിവിനായി വീഡിയോയില്‍ ചിത്രീകരിച്ചിരുന്നു.