ബി.ജെ.പി സംസ്ഥാന ജനറല്‍ സെക്രട്ടറിയും പത്തനംതിട്ട പാര്‍ലമെന്റ് മണ്ഡലം എന്‍.ഡി.എ സ്ഥാനാര്‍ത്ഥിയുമായ കെ. സുരേന്ദ്രനെതിരെ ശബരിമല സമരവുമായി ബന്ധപ്പെട്ട് വിവിധ പൊലീസ് സ്റ്റേഷനുകളിലുള്ളത് 240 കേസുകള്‍. മോഷണം മുതല്‍ വധശ്രമം വരെയുണ്ട് ഇവയില്‍.

പൊതുമുതല്‍ നശിപ്പിക്കല്‍, കലാപമുണ്ടാക്കല്‍, വീട് തകര്‍ക്കല്‍, നിരോധനാജ്ഞ ലംഘിക്കല്‍, തീവയ്പ്, സര്‍ക്കാര്‍ ഉദ്യോഗസ്ഥരുടെ ജോലി തടസപ്പെടുത്തല്‍, ഭീഷണിപ്പെടുത്തല്‍, ആരാധനാലയം തകര്‍ക്കല്‍, പൊതുഗതാഗതം നശിപ്പിക്കല്‍ തുടങ്ങിയവയാണ് മറ്റ് കുറ്റങ്ങള്‍. മിക്ക കേസുകളിലും അന്വേഷണം നടക്കുകയാണെന്ന് പൊലീസ് കോടതിയില്‍ സമര്‍പ്പിച്ച എഫ്.ഐ.ആറില്‍ പറയുന്നു.

തീവയ്പിന് ആലപ്പുഴ ജില്ലയിലെ രാമങ്കരി ജുഡിഷ്യല്‍ ഫസ്റ്റ് ക്‌ളാസ് മജിസ്‌ട്രേട്ട് കോടതിയിലും മോഷണക്കേസില്‍ തിരുവല്ല ജുഡിഷ്യല്‍ ഫസ്റ്റ് ക്‌ളാസ് മജിസ്‌ട്രേട്ട് കോടതിയിലും പൊലീസ് എഫ്.ഐ.ആര്‍ സമര്‍പ്പിച്ചിട്ടുണ്ട്. കെ. സുരേന്ദ്രന്‍ പത്തനംതിട്ട പാര്‍ലമെന്റ് മണ്ഡലത്തില്‍ മത്സരിക്കാന്‍ നാമനിര്‍ദ്ദേശ പത്രിക സമര്‍പ്പിക്കുമ്പോള്‍ അദ്ദേഹത്തിനെതിരെ ഇരുപത് കേസുകളാണുണ്ടായിരുന്നത്. പിന്നീട് 220 കേസുകള്‍ വേറെയുമുണ്ടെന്ന വിവരം ബി.ജെ.പി കേന്ദ്രങ്ങള്‍ക്കു ലഭിച്ചു.

ഇതുംകൂടി ഉള്‍പ്പെടുത്തി സുരേന്ദ്രനു വേണ്ടി രണ്ടു സെറ്റ് നാമനിര്‍ദ്ദേശ പത്രികകള്‍ പുതുക്കി നല്‍കിയിട്ടുണ്ട്. യുവതികളായ ബിന്ദുവും കനകദുര്‍ഗയും ശബരിമലയില്‍ ദര്‍ശനം നടത്തിയ ജനുവരി രണ്ടിനു നടന്ന ഹര്‍ത്താലിലെ അക്രമങ്ങളുടെ പേരിലാണ് സുരേന്ദ്രനെതിരെ 220 കേസുകള്‍ കൂടി രജിസ്റ്റര്‍ ചെയ്തത്. ശബരിമല സമരത്തിന്റെ പേരില്‍ സുരേന്ദ്രനെതിരെ ഏറ്റവും കൂടുതല്‍ കേസുകള്‍ രജിസ്റ്റര്‍ ചെയ്തത് കൊല്ലം ജില്ലയിലാണ്, 68. ആലപ്പുഴയില്‍ 55ഉം പത്തനംതിട്ടയില്‍ 31ഉം കേസുകള്‍.