തെരഞ്ഞെടുപ്പിന് ദിവസങ്ങള്‍ മാത്രം ശേഷിക്കേ പ്രചാരണം മാറിമറിഞ്ഞ് ഒടുവിലെത്തിയത് ശബരിമലയില്‍. ശബരിമല മുഖ്യവിഷയമാക്കി ബി.ജെ.പി പ്രചാരണം തുടരവെയാണ് എല്‍.ഡി.എഫും യു.ഡി.എഫും ഈ വിഷയത്തിലേക്ക് പ്രചാരണം കേന്ദ്രീകരിക്കുന്നത്. പ്രധാനമന്ത്രി നരേന്ദ്ര മോദി വിശ്വാസത്തെ സംബന്ധിച്ച് നടത്തിയ പരാമര്‍ശങ്ങളെ അതേനാണയത്തില്‍ പ്രതിരോധിച്ച് മുഖ്യമന്ത്രി പിണറായി വിജയനും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും പരസ്യമായി തന്നെ രംഗത്തെത്തിക്കഴിഞ്ഞു. കോണ്‍ഗ്രസും ശബരിമല മുഖ്യവിഷയമാക്കാനുള്ള നീക്കത്തിലാണ്.

യു.പി.എ സര്‍ക്കാര്‍ അധികാരത്തില്‍വന്നാല്‍ ശബരിമലയിലെ വിശ്വാസം സംരക്ഷിക്കാന്‍ നിയമനിര്‍മാണം നടത്തുമെന്ന് പ്രതിപക്ഷനേതാവ് രമേശ് ചെന്നിത്തലയും വ്യക്തമാക്കിക്കഴിഞ്ഞു.ദൈവനാമം ഉച്ചരിച്ചതിന്റെ പേരില്‍ ആരെ ജയിലിലടച്ചെന്ന് പറയാന്‍ പ്രധാനമന്ത്രിയെ മുഖ്യമന്ത്രി വെല്ലുവിളിച്ചിരിക്കുകയാണ്. മോദിയുടെ വിശ്വാസസംരക്ഷണം സംബന്ധിച്ച പ്രസ്താവനക്കെതിരെ കോണ്‍ഗ്രസും രംഗത്തെത്തി. അധികാരത്തിലിരുന്നപ്പോള്‍ ചെയ്യാത്ത എന്ത് വിശ്വാസ സംരക്ഷണമാണ് ഇനി ചെയ്യാന്‍ പോകുന്നതെന്ന ചോദ്യമാണ് ചെന്നിത്തല ഉന്നയിച്ചത്.

ശബരിമല പ്രചാരണ വിഷയമാക്കരുതെന്ന തെരഞ്ഞെടുപ്പ് കമീഷന്റെ നിര്‍ദേശം ആദ്യംമുതല്‍ തന്നെ കാറ്റില്‍പറത്തിയായിരുന്നു ബി.ജെ.പി പ്രചാരണം. മതങ്ങളെ അപകീര്‍ത്തിപ്പെടുത്തുന്ന നിലയിലേക്ക് പ്രചാരണം മാറി.അതിനിടെ മുഖ്യ തെരഞ്ഞെടുപ്പ് ഓഫിസറെ പരസ്യമായി വെല്ലുവിളിച്ച് ബി.ജെ.പി പ്രചാരണരംഗത്ത് സജീവമായി. അതിന്റെ ഭാഗമായാണ് വിശ്വാസ സംരക്ഷണം സംബന്ധിച്ച മോദിയുടെ പ്രസ്താവന.അതിനെ പ്രതിരോധിക്കുന്ന നിലയിലേക്ക് എല്‍.ഡി.എഫിന്റെയും യു.ഡി.എഫിന്റെയും പ്രചാരണവും അവസാനഘട്ടത്തില്‍ മാറുകയാണ്.

വിശ്വാസം സംരക്ഷിച്ചുകൊണ്ട് കോടതി ഉത്തരവ് നടപ്പാക്കാന്‍ മാത്രമാണ് സര്‍ക്കാര്‍ ശ്രമിച്ചതെന്നും ബി.ജെ.പിയും കോണ്‍ഗ്രസും രാഷ്ട്രീയമായി ശബരിമലയെ ഉപയോഗിക്കുകയായിരുന്നുമുള്ള പ്രചാരണമാണ് എല്‍.ഡി.എഫ് നടത്തുന്നത്. വിശ്വാസസംരക്ഷണം തന്നെയാകും യു.ഡി.എഫും പറയാതെ പറയുക. എന്നാല്‍ ബി.ജെ.പിയെ സഹായിക്കുകയെന്ന ലക്ഷ്യത്തോടെ ശബരിമല കര്‍മസമിതി ഉള്‍പ്പെടെ രംഗത്തെത്തിയത് പ്രശ്‌നങ്ങള്‍ രൂക്ഷമാക്കിയിട്ടുണ്ട്. ശബരിമല കര്‍മസമിതിയുടെ പ്രാര്‍ഥന ഉള്‍പ്പെടെ ഇന്നും സെക്രട്ടേറിയറ്റിന് മുന്നിലുള്‍പ്പെടെ ഒരുക്കിയിട്ടുണ്ട്.ഇത് തെരഞ്ഞെടുപ്പ് ചട്ടലംഘനമാണെന്ന പരാതിയുമായി എല്‍.ഡി.എഫ് തെരഞ്ഞെടുപ്പ് കമീഷനെയും സമീപിച്ചിട്ടുണ്ട്.