കഴിഞ്ഞ യു.ഡി.എഫ് സര്‍ക്കാര്‍ ഉന്നത പദവികളില്‍ പ്രതിഷ്ഠിച്ചവര്‍ ഒന്നൊന്നായി ബി.ജെ.പി പാളയത്തില്‍ ചേക്കേറുന്നത് വിശദീകരിക്കാനാകാതെ കോണ്‍ഗ്രസ് നേതൃത്വം
കഴിഞ്ഞ യു.ഡി.എഫ് സര്‍ക്കാര്‍ ഉന്നത പദവികളില്‍ പ്രതിഷ്ഠിച്ചവര്‍ ഒന്നൊന്നായി ബി.ജെ.പി പാളയത്തില്‍ ചേക്കേറുന്നത് വിശദീകരിക്കാനാകാതെ കോണ്‍ഗ്രസ് നേതൃത്വം. മുന്‍ പി.എസ്.സി ചെയര്‍മാന്‍ കെ.എസ്. രാധാകൃഷ്ണന് പിന്നാലെ റിട്ട. അംബാസഡറും ഉന്നത വിദ്യാഭ്യാസ കൗണ്‍സില്‍ വൈസ്‌ചെയര്‍മാനുമായിരുന്ന ടി.പി. ശ്രീനിവാസന്‍ കൂടി ബി.ജെ.പി വേദിയില്‍ പ്രത്യക്ഷപ്പെട്ടതാണ് കോണ്‍ഗ്രസിനെ വിഷമവൃത്തത്തിലാക്കുന്നത്.
ഉമ്മന്‍ ചാണ്ടി പൊലീസ് മേധാവി പദവിയില്‍ വാഴിച്ച ടി.പി. സെന്‍കുമാര്‍ ഇവര്‍ക്ക് മുന്നേ ബി.ജെ.പി പാളയത്തിലെത്തി.കോളജ്, സര്‍വകലാശാല തലങ്ങളില്‍ ഒട്ടേറെ പ്രമുഖരെ വെട്ടിയാണ് ടി.പി. ശ്രീനിവാസനും കെ.എസ്. രാധാകൃഷ്ണനും കഴിഞ്ഞ സര്‍ക്കാര്‍ കാലത്ത് സുപ്രധാന പദവികളില്‍ കയറിപ്പറ്റിയത്. ഇതില്‍ കെ.എസ്. രാധാകൃഷ്ണന് ഇരട്ടപ്പദവിയാണ് യു.ഡി.എഫ് സര്‍ക്കാര്‍ നല്‍കിയത്.
ആദ്യം കാലടി ശ്രീശങ്കരചാര്യ സര്‍വകലാശാല വൈസ് ചാന്‍സലര്‍ പദവിയില്‍നിന്ന് വിരമിച്ചതിന് പിന്നാലെയാണ് പി.എസ്.സി ചെയര്‍മാന്‍ പദവിയില്‍ നിയമിച്ചത്. ബി.ജെ.പിയില്‍ ചേക്കേറിയ രാധാകൃഷ്ണന് ആലപ്പുഴയില്‍ എന്‍.ഡി.എ സ്ഥാനാര്‍ഥിയാവുകയും ചെയ്തു. കോണ്‍ഗ്രസ് ബന്ധമില്ലാതിരുന്ന ടി.പി. ശ്രീനിവാസനെ കഴിഞ്ഞ സര്‍ക്കാര്‍ ഉന്നത വിദ്യാഭ്യാസ കൗണ്‍സിലിന്റെ വൈസ്‌ചെയര്‍മാന്‍ സ്ഥാനത്തിരുത്തിയത് പ്രമുഖ സമുദായ സംഘടനയുടെ സമ്മര്‍ദത്തിലാണ്.
സംസ്ഥാന സര്‍ക്കാറിന്റെ 'റുസ' പദ്ധതി സമര്‍പ്പിച്ചപ്പോള്‍ ശ്രീനിവാസനെ വൈസ്‌ചെയര്‍മാന്‍ പദവിയില്‍നിന്ന് നീക്കാന്‍ നിര്‍ദേശിച്ചു. എന്നാല്‍ കൗണ്‍സില്‍ പുനഃസംഘടിപ്പിക്കുമ്പോള്‍ പുതിയ വൈസ്‌ചെയര്‍മാനെ നിയമിക്കുമെന്ന് സംസ്ഥാന സര്‍ക്കാര്‍ മറുപടി നല്‍കി.എന്നാല്‍ കാലാവധി കഴിഞ്ഞ കൗണ്‍സില്‍ പുനഃസംഘടിപ്പിക്കാന്‍ ഫയല്‍ നീങ്ങിയപ്പോഴും എന്‍.എസ്.എസ് സമ്മര്‍ദത്തില്‍ ശ്രീനിവാസനെ തന്നെ വൈസ്‌ചെയര്‍മാനാക്കാനായിരുന്നു നീക്കം. ഇത് തര്‍ക്കമായതോടെ പുതിയ സര്‍ക്കാര്‍ വന്നശേഷം നിയമനം നടത്തട്ടെയെന്ന നിലയിലാണ് ഫയല്‍ മടക്കിയത്.
ഇതിനിടെ ഫാക്കല്‍റ്റി ട്രെയിനിങ് അക്കാദമിയുടെ ചെയര്‍മാന്‍ പദവിയിലും ടി.പി. ശ്രീനിവാസനെ നിയമിക്കാന്‍ തീരുമാനിച്ചിരുന്നു. എന്നാല്‍ അന്നത്തെ വിദ്യാഭ്യാസ മന്ത്രിയുടെ ഓഫിസില്‍ നിന്നുള്ള എതിര്‍പ്പ് കാരണം ഇത് ലക്ഷ്യംകണ്ടില്ല. ഇതിനിടെ, ഉന്നത പദവികളില്‍ ഇത്തരം ആളുകളെ നിയമിക്കുന്നതില്‍ ഭാവിയില്‍ ജാഗ്രത പുലര്‍ത്തുമെന്ന് പ്രതിപക്ഷനേതാവ് രമേശ് ചെന്നിത്തല പറഞ്ഞു. ഇതുസംബന്ധിച്ച ചോദ്യങ്ങളോട് പ്രതികരിക്കുകയായിരുന്നു ചെന്നിത്തല. ശ്രീനിവാസന്‍ കോണ്‍ഗ്രസ് അംഗത്വമുള്ളയാളല്ല. നയതന്ത്ര വിദഗ്ദനായ അദ്ദേഹത്തിന്റെ സേവനം ഉപയോഗപ്പെടുത്തുക മാത്രമാണ് ചെയ്തതെന്നും ചെന്നിത്തല പറഞ്ഞു.
https://www.facebook.com/Malayalivartha
