വോട്ടെടുപ്പിന് മൂന്നുദിവസം മാത്രം ബാക്കി നില്ക്കെ ശബരിമല വിഷയം വീണ്ടും പ്രധാന പ്രചാരണ വിഷയമാക്കാന് ബി.ജെ.പി
വോട്ടെടുപ്പിന് മൂന്നുദിവസം മാത്രം ബാക്കി നില്ക്കെ ശബരിമല വിഷയം വീണ്ടും പ്രധാന പ്രചാരണ വിഷയമാക്കാന് ബി.ജെ.പി. സംസ്ഥാന ചീഫ് ഇലക്ടറല് ഓഫീസറുടെ കര്ശനമായ നിര്ദ്ദേശങ്ങളുണ്ടെങ്കിലും സാങ്കേതികമായി അതിനെ മറികടന്ന് ശബരിമല വിഷയത്തില് ഊന്നാനാണ് ബി.ജെ.പി നീക്കം. ഇതിന്റെ ഭാഗമായി, കേരളത്തിലെത്തിയ പ്രധാനമന്ത്രി നരേന്ദ്രമോദി ശബരിമല വിഷയത്തില് സംസ്ഥാന സര്ക്കാരിനെതിരെ കടുത്ത ആക്രമണമാണ് നടത്തിയത്. ഈശ്വരന്റെ പേര് പേര് പരാമര്ശിക്കുന്നവരെ കള്ളക്കേസില് കുടുക്കുകയും ലാത്തിച്ചാര്ജ് നടത്തുകയും ചെയ്യുന്ന സര്ക്കാരാണിതെന്ന് അദ്ദേഹം കുറ്രപ്പെടുത്തി. കോണ്ഗ്രസിനെയും മോദി വിമര്ശിച്ചു. ശബരിമലയുടെ പേരെടുത്ത് പറയാതെ, വിഷയത്തില് കേരളത്തില് കോണ്ഗ്രസ് ഒരു നിലപാടെടുക്കുമ്പോള് ഡല്ഹിയില് മറ്റൊരു നിലപാടാണെടുത്തതെന്നും കുറ്റപ്പെടുത്തിയിരുന്നു.
പാര്ലമെന്റിലും കോടതിയിലും വിശ്വാസികള്ക്കനുകൂലമായ നിലപാടാണ് ബി.ജെ.പി സ്വീകരിക്കുകയെന്നും പ്രധാനമന്ത്രി സൂചിപ്പിച്ചിരുന്നു. ശബരിമലയ്ക്കായി നിയമനിര്മ്മാണം നടത്തുമെന്ന സൂചനയും പ്രധാന മന്ത്രി നല്കിയിരുന്നു. ശബരിമല ഏറ്രവും ചര്ച്ച ചെയ്യപ്പെടുന്ന പത്തനംതിട്ട മണ്ഡലത്തില് ബി.ജെ.പി ദേശീയ അദ്ധ്യക്ഷന് അമിത് ഷായും നാളെയെത്തുന്നുണ്ട്. ഉച്ചയ്ക്ക് 3 ന് ആയിരക്കണക്കിന് പ്രവര്ത്തകരുമായി അദ്ദേഹം റോഡ് ഷോ നടത്തും. പിന്നീട് പൊതുയോഗത്തിലും സംസാരിക്കും. ഇതേ വിഷയം തന്നെയായിരിക്കും അമിത് ഷായും ഉന്നയിക്കുക.
ശബരിമല വിഷയം ഉയര്ത്തിയാല് രണ്ടു മുന്നണികളും പ്രതിക്കൂട്ടിലാകും എന്നാണ് ബി.ജെ.പിയുടെ വിലയിരുത്തല്. ബി.ജെ.പി ഏറ്രവും കൂടുതല് വിജയപ്രതീക്ഷ പുലര്ത്തുന്ന തിരുവനന്തപുരത്തും പത്തനംതിട്ടയിലും ന്യൂനപക്ഷ കേന്ദ്രീകരണം ഉണ്ടാവുമെന്ന് ഭയക്കുന്ന ബി.ജെ.പി അതിനെ മറികടക്കാന് പരമാവധി ഭൂരിപക്ഷ വോട്ട് നേടാനുള്ള ശ്രമത്തിലാണ്. ശബരിമലയുടെ പേരില് നേരിട്ട് വോട്ട് ചോദിക്കുന്നതിന് ബി.ജെ.പിക്ക് പാര്ട്ടി എന്ന നിലയില് തിരഞ്ഞെടുപ്പ് ചട്ടങ്ങളുടെ അടിസ്ഥാനത്തില് വിലക്കുള്ളതിനാല് ശബരിമല കര്മ്മ സമിതിയാണ് ക്യാമ്പയിനുകള് നടത്തുന്നത്. കര്മ്മ സമിതിയുടെ നേതൃത്വത്തില് ആര്.എസ്. എസ് പ്രവര്ത്തകര് വീടുവീടാന്തരം കയറിയിറങ്ങി പ്രചാരണങ്ങളും നടത്തുന്നുണ്ട്.
21 ന് വൈകിട്ട് 5ന് ആറന്മുള സത്രക്കടവില് ആയിരക്കണക്കിന് പേര് പങ്കെടുക്കുന്ന പമ്പാ ആരതിയും സംഘടിപ്പിപ്പിച്ചിട്ടുണ്ട്. പ്രാദേശിക തലത്തിലുള്ള സംഘാടക സമിതിയുടെ പേരിലാണ് പരിപാടി സംഘടിപ്പിക്കുന്നത്. ദക്ഷിണ ഗംഗാ ആരതിയെന്ന് വിശേഷിപ്പിക്കുന്ന ഈ ചടങ്ങില് ഉത്തര്പ്രദേശിലെ വാരണാസിയില് നിന്ന് ഗംഗാആരതിക്ക് നേതൃത്വം നല്കുന്ന പരികര്മ്മികളെയും കൊണ്ടുവരുന്നുണ്ട്.
https://www.facebook.com/Malayalivartha