കൊല്ലത്ത് വോട്ടുമറിക്കലില് ഞെട്ടുന്നത് ആര് ; വോട്ടെടുപ്പിന് ഇനി രണ്ടുനാള് മാത്രം ശേഷിക്കെ കൊല്ലത്ത് ബി.ജെ.പിക്കുള്ളില് വോട്ട് മറിക്കല് വിവാദം
വോട്ടെടുപ്പിന് ഇനി രണ്ടുനാള് മാത്രം ശേഷിക്കെ കൊല്ലത്ത് ബി.ജെ.പിക്കുള്ളില് വോട്ട് മറിക്കല് വിവാദം. ഇക്കാര്യമുന്നയിച്ച് പാര്ട്ടിയിലെ ഒരു വിഭാഗം രംഗത്തെത്തിയത് ബി.ജെ.പിയെ പ്രതിരോധത്തിലാക്കി. കേന്ദ്ര നേതൃത്വത്തിന് ഇവര് പരാതി നല്കിയതായാണ് സൂചന. പാര്ട്ടിയിലെ വിഭാഗീയതയാണ് ആരോപണങ്ങള്ക്ക് പിന്നിലെന്നാണ് പറയപ്പെടുന്നത്. യുവമോര്ച്ച മുന് സംസ്ഥാന വൈസ് പ്രസിഡന്റ് ആര്.എസ് പ്രശാന്ത് വോട്ട് മറിക്കല് അരോപിച്ച് വ്യാഴാഴ്ച രംഗത്ത് വന്നതിന് തൊട്ടുപിന്നാലെ മറ്ര് ചില മുന് ഭാരവാഹികളും ആരോപണങ്ങളുമായി രംഗത്തെത്തി.
ബി.ജെ.പി ജില്ലാ ലീഗല് സെല് മുന് കണ്വീനര് അഡ്വ. കലൂര് കൈലാസ് നാഥാണ് പരസ്യമായി രംഗത്തുവന്ന മറ്റൊരാള്. കുമ്മനം രാജശേഖരന് സംസ്ഥാന അദ്ധ്യക്ഷനായി ചുമതല എടുത്തപ്പോഴുണ്ടായ പുനഃസംഘടനയില് സംസ്ഥാന ഭാരവാഹിയായ അഡ്വ.പ്രശാന്തിന് പി.എസ്.ശ്രീധരന് പിള്ള പ്രസിഡന്റായപ്പോഴാണ് സ്ഥാനഭ്രംശമുണ്ടായത്. കഴിഞ്ഞ ജനുവരിയില് പ്രധാനമന്ത്രി നരേന്ദ്ര മോദി ദേശീയ തലത്തില് തിരഞ്ഞെടുപ്പ് പ്രചാരണം ആരംഭിച്ചത് കൊല്ലത്ത് നിന്നായിരുന്നു. കൊല്ലം ബൈപ്പാസ് ഉദ്ഘാടന വേളയിലായിരുന്നു തിരഞ്ഞെടുപ്പ് റാലി ഉദ്ഘാടനം നടന്നത്.
എന്നാല് പ്രധാനമന്ത്രി എത്തി ചലനം സൃഷ്ടിച്ച കൊല്ലത്ത് മൂന്ന് മാസത്തിന് ശേഷം തിരഞ്ഞെടുപ്പ് പ്രഖ്യാപിച്ചപ്പോള് കേന്ദ്ര ആഭ്യന്തര മന്ത്രി രാജ് നാഥ് സിംഗ് മാത്രമാണ് ആകെ എത്തിയ ദേശീയ നേതാവ്. പി.എസ്.ശ്രീധരന് പിള്ള ആകട്ടെ പൊതുയോഗങ്ങളില് പങ്കെടുക്കാതെ സ്ഥാനാര്ത്ഥിയുടെ ഒരു സ്വീകരണ പര്യടനം ഉദ്ഘാടനം ചെയ്യാന് മാത്രമാണ് കൊല്ലത്ത് എത്തിയത്.
വോട്ട് മറിക്കല് വിവാദം കത്തിയതോടെ കൊല്ലം ജില്ലാ സമിതിയുടെ അടിയന്തര യോഗം വ്യാഴാഴ്ച വിളിക്കാന് സംസ്ഥാന നേതൃത്വം തീരുമാനിച്ചിരുന്നു. സംസ്ഥാന സെക്രട്ടറി സി. ശിവന് കുട്ടി പങ്കെടുത്ത് യോഗം വിളിക്കുമെന്ന് അറിയിപ്പ് ഉണ്ടായിരുന്നെങ്കിലും അവസാന നിമിഷം യോഗം മാറ്റി. മൂന്നുവര്ഷം മുമ്പ് നടന്ന നിയമസഭാ തിരഞ്ഞെടുപ്പില് കൊല്ലം ലോക്സഭാ മണ്ഡലത്തിന്റെ പരിധിയില് ഉള്പ്പെടുന്ന ഏഴ് നിയമസഭാ മണ്ഡലങ്ങളില് ഒന്നര ലക്ഷം വോട്ട് ബി.ജെ.പിക്ക് കിട്ടിയിരുന്നു. അത് ഇക്കുറി കുറയാതിരിക്കാന് നോക്കണമെന്നാണ് ജില്ലയിലെ ഔദ്യോഗിക നേതൃത്വവുമായി ഇടഞ്ഞു നില്ക്കുന്നവര് ആവശ്യപ്പെടുന്നത്.
ലോക്സഭാ തിരഞ്ഞെടുപ്പില് വോട്ട് കുറഞ്ഞാല് അടുത്ത വര്ഷം നടക്കുന്ന ത്രിതല - കോര്പ്പറേഷന് -മുനിസിപ്പല് തിരഞ്ഞെടുപ്പിലും 2021 ല് നടക്കുന്ന അസംബ്ളി തിരഞ്ഞെടുപ്പിലും ബി.ജെ.പിക്ക് നേട്ടം കൊയ്യേണ്ട സുവര്ണാവസരം നഷ്ടപ്പെടുമെന്ന് ഇവര് മുന്നറിയിപ്പ് നല്കുന്നു. വോട്ടെടുപ്പിലേക്ക് നീളുന്നതിന്റെ അവസാന മണിക്കൂറില് ഇത്തരമൊരു വിവാദം ഉണ്ടായത് കൊല്ലത്ത് പാര്ട്ടിയില് കലാപത്തിന് തിരി കൊളുത്തിയിട്ടുണ്ട്.
https://www.facebook.com/Malayalivartha
