രാഹുൽ പോയാൽ വയനാട്ടിൽ പ്രിയങ്ക; അമേഠിയിലും വയനാട്ടിലും നിന്ന് രാഹുൽ ഗാന്ധി ജയിച്ചാൽ രാഹുൽ ഗാന്ധി അമേഠി കൈവിടില്ല
രാഹുൽ ഗാന്ധി വയനാട് ഉപേക്ഷിച്ചാൽ പകരം മത്സരിക്കാൻ പ്രിയങ്ക. ശനിയാഴ്ച പ്രിയങ്ക വയനാട്ടിൽ പ്രചരണത്തിനെത്തിയത് ഇതു കൂട്ടി ലക്ഷ്യമിട്ടാണ്. അമേഠിയിലും വയനാട്ടിലും നിന്ന് രാഹുൽ ഗാന്ധി ജയിച്ചാൽ രാഹുൽ ഗാന്ധി അമേഠി കൈവിടില്ല. ഗാന്ധി കുടുംബത്തിനും കോൺഗ്രസിനും യു പി വിട്ടൊരു കളിയില്ല. യുപി കൈയിൽ നിന്നും പോയാൽ ഇന്ത്യ കൈയിൽ നിന്നും പോയെന്നാണ് കരുതുന്നത്. കോൺഗ്രസ് എക്കാലവും യുപിയിൽ കളം നിറഞ്ഞ പാർട്ടിയാണ്. രാഹുൽ ഗാന്ധിയാണ് അതിനെ കേരളത്തിലേക്ക് കൂടി പറിച്ചു നട്ടത്.
വയനാട് മത്സരിക്കാൻ ഒരുങ്ങുമ്പോൾ കെ സി. വേണുഗോപാലിനെ പോലുള്ള നേതാക്കൾ ഒരിക്കലും കേരളത്തെ കൈവിടരുതെന്ന് രാഹുൽ ഗാന്ധിയോട് അഭ്യർത്ഥിച്ചിരുന്നു. അമേഠി ഉപേക്ഷിക്കാനാവില്ലെന്ന് രാഹുൽ പറഞ്ഞപ്പോൾ വേണുഗോപാലാണ് പ്രിയങ്കയുടെ കാര്യം നിർദ്ദേശിച്ചത്. പ്രിയങ്ക വാരണാസിയിൽ മത്സരിക്കണമെന്ന് ഉറച്ചു നിന്നപ്പോൾ രാഹുൽ അതിനു അനുമതി നൽകാതിരുന്നതും വയനാട് മുന്നിൽ കണ്ടാണ്. എന്നാൽ പ്രിയങ്കയുമായി ഇക്കാര്യം അദ്ദേഹം ചർച്ച ചെയ്തിട്ടില്ലെന്നാണ് വിവരം. തനിക്ക് ഉപേക്ഷിക്കേണ്ടി വരുന്ന സീറ്റിൽ പ്രിയങ്കയോട് മത്സരിക്കണമെന്ന് പറഞ്ഞാൽ തന്റെ സഹോദരി അതിനു തയ്യാറാകുമെന്ന കാര്യത്തിൽ രാഹുലിന് ഉറപ്പുണ്ട്.
ശനിയാഴ്ച രാഹുലിനെ കുറിച്ച് പ്രിയങ്ക വയനാട്ടിൽ നടത്തിയ പ്രസംഗം തീർത്തും ഹൃദയസ്പർശിയായിരുന്നു. തന്റെ സഹോദരനെ കുറിച്ച് ലോകത്താർക്കും അറിയാത്ത കഥകളാണ് പ്രിയങ്ക പറഞ്ഞത്. രാഹുലിന്റെ കൈയിൽ വയനാട് സുരക്ഷിതമായിരിക്കുമെന്ന് പ്രിയങ്ക പറഞ്ഞു. അഛനും അമ്മൂമ്മയും അകാലത്തിൽ നഷ്ടപ്പെട്ട കുടുംബത്തിന്റെ സങ്കടം പ്രിയങ്ക പങ്കുവച്ചപ്പോൾ കേരളം കരഞ്ഞില്ലെന്നേയുള്ളു.രാഹുൽ ആരുമറിയാതെ കാനഡയിൽ ജോലി ചെയ്ത സംഭവവും പ്രിയങ്ക പങ്കിട്ടു. ഓരോ വാചകവും വയനാട് ഹൃദയത്തിലേക്കാണ് ഏറ്റുവാങ്ങിയത്. രാഷ്ട്രീയം അധികം പറയാതെ പ്രിയങ്ക നടത്തിയ പ്രസംഗം പതിനായിങ്ങളെയാണ് ആകർഷിച്ചത്.
പ്രിയങ്കയുടെ പ്രസംഗത്തിൽ നിന്നും രാഹുൽ വയനാട് നിലനിർത്തും എന്നും തന്നെയാണ് മനസിലാക്കേണ്ടതെങ്കിലും സർക്കാർ രൂപീകരണ ഘട്ടം വരുമ്പോൾ അമേഠി നിലനിർത്തേണ്ടി വരുമെന്ന് എല്ലാവർക്കുമറിയാം. എന്നാൽ ഒരു ഇന്ത്യൻ പ്രധാനമന്ത്രി ഭക്ഷണേന്ത്യയിൽ സ്ഥാനം ഉറപ്പിക്കുന്ന അപൂർവ കാഴ്ച നിങ്ങൾക്കു കാണേണ്ടി വരുമെന്നും ചില രാഹുൽ ആരാധകർ പറയുന്നു.
വയനാട്ടിൽ നിന്നും രാഹുൽ രാജിവച്ചാൽ മറ്റൊരു കോൺഗ്രസ് നേതാവിനെ അവിടെ നിന്നും ജയിപ്പിച്ചെടുക്കാൻ ബുദ്ധിമുട്ടാണ്. സിദ്ധിഖ് അവിടെ സ്ഥാനാർത്ഥിയാകുമെന്നാണ് കരുതുന്നത്. ഇടതു മുന്നണി അവിടെ സുനീറിനെ വീണ്ടും മത്സരിപ്പിക്കും . സുനീർ തന്നെ ജയിക്കാനാണ് സാധ്യത. സുനീറിനെ ഇല്ലാതാക്കണമെങ്കിൽ പ്രിയങ്ക തന്നെ വരണമെന്നാണ് കോൺഗ്രസ് നേതാക്കളുടെ ആവശ്യം. എന്നാൽ തെരഞ്ഞടുപ്പ് ഫലം വരുന്നതു വരെ ഇതുസംബന്ധിച്ച് യാതൊരു കൂടിയാലോചനകളും നടക്കുകയില്ല. കേന്ദ്രത്തിൽ യു പി എ അധികാരത്തിൽ വരുമെന്നാണ് കരുതുന്നത്. അങ്ങനെ സംഭവിക്കുകയാണെങ്കിൽ രാഹുൽ ഗാന്ധി ഇന്ത്യൻ പ്രധാനമന്ത്രിയാകും. അതോടെ വയനാടിന്റെ ശുക്രദശ ആരംഭിക്കും എന്നാണ് കരുതുന്നത്.
https://www.facebook.com/Malayalivartha