എന്‍ഡിഎ സ്ഥാനാര്‍ഥി കെ.സുരേന്ദ്രന്‍ ഒരു കാര്യം കൂടി വോട്ടഭ്യര്‍ഥനയോടൊപ്പം ചേര്‍ത്തു. താന്‍ ജയിക്കുമെന്നായപ്പോള്‍ സിപിഎമ്മും കോണ്‍ഗ്രസും ഗൂഢാലോചന നടത്തി വോട്ട് യുഡിഎഫിന് മറിച്ചു നല്‍കാന്‍ തീരുമാനിച്ചെന്നും അതില്‍ ജാഗ്രത പാലിക്കണെമന്നുമാണ് അഭ്യര്‍ഥന. ഏഴ് നിയോജക മണ്ഡലങ്ങളില്‍ എവിടെയൊക്കെ എത്തിപ്പെടാനുണ്ട് എന്ന് പട്ടിക തയാറാക്കിയാണ് സുരേന്ദ്രന്റെ അവസാന റൗണ്ട് പര്യടനം പുരോഗമിക്കുന്നത്.

ഇരവിപേരൂര്‍ പഞ്ചായത്തിലെ നെല്ലാടും കോയിപ്രം പഞ്ചായത്തിലെ പുല്ലാടും തമ്മില്‍ പേരിലെ സമാനതയ്ക്കപ്പുറം സവിശേഷതകളൊന്നുമില്ല. എന്നാല്‍, ചുറ്റുവട്ട പ്രദേശങ്ങള്‍ വളക്കൂറുള്ള മണ്ണാണെന്ന് എന്‍ഡിഎയ്ക്ക് അറിയാം. റോഡ് ഷോയ്ക്ക് പുറമെ, ഈ മേഖലയ്ക്ക് രണ്ടാം വട്ടവും പര്യടന ഷെഡ്യൂളില്‍ ഇടംകൊടുത്തത് അങ്ങനെയാണ്.

അനൗണ്‍സ്‌മെന്റ് വാഹനത്തില്‍ നിന്ന് ഇമ്പമാര്‍ന്ന പ്രചാരണ ഗാനം മുഴങ്ങുമ്പോള്‍ സമയം 1.15. വരയന്നൂരിലെ പ്രവാസിയായ ഉദ്യാനം വീട്ടില്‍ പരമേശ്വരന്‍നായരുടെ വീടിന്റെ പൂമുഖത്ത് ഒരുക്കിയ സമ്മേളന വേദിയില്‍ കൂടുതലും വനിതകള്‍. നട്ടുച്ചവെയിലില്‍ വീടിന്റെ മുറ്റത്തും റോഡിലുമൊക്കെയായി കാത്തു നിന്നത് വലിയൊരു ജനക്കൂട്ടം. തുറന്ന വാഹനത്തിലെത്തിയ സ്ഥാനാര്‍ഥി എല്ലാവരെയും കൈവീശി പൂമുഖത്തെ വേദിയിലെത്തി.

സമയക്കുറവ് കാരണം സമ്മേളനത്തിന്റേതായ ഔപചാരികതകള്‍ ഒഴിവാക്കിയിരുന്നു. സ്വീകരണത്തിന് ശേഷം ഉദ്ഘാടനം നിര്‍വഹിച്ച സുരേന്ദ്രന്‍ നേരെ നന്ദി പ്രസംഗത്തിലേക്ക് കടന്നു. മഞ്ചേശ്വരത്തെ തന്റെ പരാജയം ഉദാഹരണമായി ചൂണ്ടിക്കാട്ടി, ഇത്തവണ തനിക്ക് വോട്ടു അഭ്യര്‍ഥിച്ച് അടുത്ത സ്വീകരണ കേന്ദ്രത്തിലേക്ക്. നുകത്തല കോളനിയിലെ സ്വീകരണത്തിന് ഹാരാര്‍പ്പണം നടത്തിയതും മുദ്രാവാക്യം വിളിച്ചതുമെല്ലാം വനിതകള്‍. കരീലമുക്ക് ജംക്ഷനിലെ സ്വീകരണ സ്ഥലത്തെത്തിയപ്പോള്‍ നാലാള്‍ പൊക്കത്തില്‍ സ്ഥാനാര്‍ഥിയുടെ കൂറ്റന്‍ കട്ടൗട്ട്. ഇതിന്റെ ചുവട്ടിലായിരുന്നു സ്വീകരണം. ആലാന്തറ, കാഞ്ഞിരംപാറ കോളനികളിലും ഇന്നലെ പര്യടനം പൂര്‍ത്തിയാക്കി.

ഉച്ചയ്ക്ക് 12ന് പുല്ലാട് ജംക്ഷനിലെത്തേണ്ട പര്യടനം വേദിയിലെത്തിയപ്പോള്‍ ഉച്ചകഴിഞ്ഞ് 3.15. കൊച്ചുകുട്ടികളും സ്തീകളും അടങ്ങുന്ന പ്രവര്‍ത്തകര്‍ പൊരിവെയിലത്ത് ഇത്രയും നേരം കാത്തു നില്‍ക്കേണ്ടി വന്നതിലെ ഖേദം അറിയിച്ച അദ്ദേഹം, വരുംതലമുറയ്ക്ക് ആത്മാഭിമാനത്തോടെ ജീവിക്കാന്‍ ഒരു മാറ്റം അനിവാര്യമാണെന്നും തന്നെ ജയിപ്പിക്കണമെന്നും പറഞ്ഞു. നെല്ലിമല എസ്എന്‍ഡിപി ശാഖാ ഗുരുമന്ദിരവും സ്ഥാനാര്‍ഥി സന്ദര്‍ശിച്ചു. വൈകുന്നേരം 4ഓടെ തുടങ്ങിയ കനത്ത മഴ കാരണം അല്‍പ നേരം പര്യടനം നിര്‍ത്തി വച്ചു. തോണിപ്പുഴ, കുറിയന്നൂര്‍, കീഴുകര, കടമ്മനിട്ട, ആലുങ്കല്‍, മുക്കൂട്, നെടുവേലി, ഇലന്തൂര്‍ എന്നിവിടങ്ങളില്‍ ഇന്നലെ പര്യടനം പൂര്‍ത്തിയാക്കി.

ബിജെപി സംസ്ഥാന സമിതി അംഗം വി.എസ്.ഹരിശ്ചന്ദ്രന്‍, ഒബിസി മോര്‍ച്ച സംസ്ഥാന പ്രസിഡന്റ് മധു പരുമല, ബിജെപി ജില്ലാ സെക്രട്ടറി എം.ജി.കൃഷ്ണകുമാര്‍, ആറന്മുള മണ്ഡലം പ്രസിഡന്റ് കെ.അശോക് കുമാര്‍, കോയിപ്രം ബ്ലോക്ക് പഞ്ചായത്ത് അംഗം അജയകുമാര്‍, യുവമോര്‍ച്ച മണ്ഡലം പ്രസിഡന്റ് ഹരികൃഷ്ണന്‍ തുടങ്ങിയവര്‍ പര്യടനത്തിന് നേതൃത്വം നല്‍കി.