രാജ്യത്ത് മോട്ടോര്‍വാഹനവകുപ്പില്‍ ഏകീകൃത സോഫ്റ്റ്‌വേര്‍ സംവിധാനം വന്നതോടെ സംസ്ഥാനത്ത് െ്രെഡവിങ് ലൈസന്‍സ് വിതരണം സ്തംഭനാവസ്ഥയില്‍.ആര്‍.ടി. ഓഫീസുകളില്‍ത്തന്നെ ലൈസന്‍സ് പ്രിന്റ് ചെയ്തുനല്‍കുന്ന സംവിധാനം മാറിയതോടെയാണ് ലൈസന്‍സ് വിതരണത്തില്‍ തടസ്സമുണ്ടായത്. കേരളത്തിലെ 79 മോട്ടോര്‍വാഹന ഓഫീസുകളിലായി രണ്ടു ലക്ഷത്തോളം ലൈസന്‍സ് അപേക്ഷകളാണ് കെട്ടിക്കിടക്കുന്നത്. 2019 ജനുവരി മുതലാണ് പുതിയ സോഫ്റ്റ്‌വേറായ 'വാഹന്‍ സാരഥി' നടപ്പാക്കിത്തുടങ്ങിയത്.
മാര്‍ച്ച് മാസത്തോടെ എല്ലാ ആര്‍.ടി.ഓഫീസുകളും സബ് ആര്‍.ടി.ഓഫീസുകളും വാഹന്‍ സാരഥിയുടെ കീഴില്‍ കൊണ്ടുവന്നു. ഇതോടെ ആര്‍.ടി. ഓഫീസുകളില്‍ നിന്നുതന്നെ ലൈസന്‍സ് പ്രിന്റ് ചെയ്തു നല്‍കുന്നത് നിര്‍ത്തി. പകരം ക്യു.ആര്‍. കോഡ് ഉള്‍പ്പെടെയുള്ള സംവിധാനങ്ങളുള്ള ലൈസന്‍സുകള്‍ തിരുവനന്തപുരത്തുനിന്ന് പ്രിന്റ് ചെയ്ത് തപാല്‍ മാര്‍ഗം എത്തിക്കാനായിരുന്നു പദ്ധതി.
ടെന്‍ഡര്‍ വിളിച്ച് ഒരു ഏജന്‍സിയെ പ്രിന്റിങ് ഏല്‍പ്പിക്കാനും ധാരണയായിരുന്നു. ഇതിനിടെ മുമ്പ് ലൈസന്‍സ് പ്രിന്റിങ്ങിനായി ടെന്‍ഡറില്‍ പങ്കെടുത്ത് കിട്ടാതെപോയ ഡല്‍ഹി ആസ്ഥാനമായുള്ള കമ്പനി ഇത്തവണ തങ്ങളെ പരിഗണിക്കണമെന്നാവശ്യപ്പെട്ട് ഹൈക്കോടതിയെ സമീപിച്ചതോടെ കോടതി നടപടികള്‍ സ്‌റ്റേ ചെയ്തു. ഇതോടെയാണ് ലൈസന്‍സ് വിതരണം സ്തംഭിച്ചത്.

ഓരോ ആര്‍.ടി. ഓഫീസുകളിലും 3500 മുതല്‍ 5000 വരെ ലൈസന്‍സ് അപേക്ഷകള്‍ കെട്ടിക്കിടക്കുന്നുണ്ടെന്നാണ് അധികൃതര്‍ പറയുന്നത്. നിലവില്‍, പ്രായോഗിക പരീക്ഷ പാസായി എന്ന രേഖ ലൈസന്‍സായി ഉപയോഗിക്കാനാണ് അപേക്ഷകരോട് നിര്‍ദേശിച്ചിട്ടുള്ളത്. പഴയ സംവിധാനത്തില്‍ െ്രെഡവിങ്ങിന്റെ പ്രായോഗിക പരീക്ഷ പാസായ അന്നുതന്നെ ലൈസന്‍സ് വിതരണംചെയ്തിരുന്നു. ഇപ്പോള്‍ ഒരു മാസത്തിലേറെയായിട്ടും കിട്ടാത്ത സ്ഥിതിയാണ്. കെട്ടിക്കിടക്കുന്ന ലൈസന്‍സുകള്‍ വിതരണം ചെയ്യാന്‍ ഹൈക്കോടതിയുടെ നിര്‍ദേശം ലഭിച്ചിട്ടുണ്ട്. ഏകീകൃത പ്രിന്റിങ് സംവിധാനമാകുംവരെ പുതിയ രീതിയില്‍ അതത് ആര്‍.ടി. ഓഫീസുകള്‍ മുഖാന്തരം പ്രിന്റ് ചെയ്യും. അതിന് സിഡിറ്റിന് നിര്‍ദേശം നല്‍കി. അടുത്തയാഴ്ച ലൈസന്‍സ് വിതരണം തുടങ്ങും.