തുടക്കത്തിലേ കല്ലുകടി... ബിജെപിയുടെ പിന്തുണ തേടാതെ ഷോണ് ജോര്ജിനെ പാലായില് സ്ഥാനാര്ത്ഥിയായി പ്രഖ്യാപിച്ചത് അംഗീകരിക്കാനാകില്ലെന്ന് ബിജെപി; ജോര്ജിന്റെ ശൈലി ബി.ജെ.പിക്കു ചേര്ന്നതല്ലെന്ന് വിമര്ശനം
ലോക്സഭാ തെരഞ്ഞെടുപ്പിന്റെ അവസാന നാളുകളില് ജനപക്ഷം നേതാവ് പി.സി. ജോര്ജ് ബിജെപിയ്ക്കുണ്ടാക്കി കൊടുത്ത ഇമേജ് ചെറുതല്ല. എന്ഡിഎയുടെ ഭാഗമാകുകയും ക്രിസ്ത്യന് നൂനപക്ഷത്തിന്റെ കുറച്ച് വോട്ടുകള് നേടിക്കൊടുക്കാനും പിസി ജോര്ജിനായി. എന്നാല് പി.സി. ബിജെപിയെ കൂട്ടുപിടിച്ചത് സ്വന്തം മകന് ഷോണിന് പാലായിയില് സീറ്റ് തരപ്പെടുത്താനായിരുന്നു എന്നത് പിന്നീട് പുറത്തായി. ഇതാണ് ഇപ്പോള് ചര്ച്ചയിലാകുന്നത്.
എന്.ഡി.എ. ബന്ധത്തില് പി.സി. ജോര്ജിനു തുടക്കത്തിലേ കല്ലുകടിയാണ് ഉണ്ടായിരിക്കുന്നത്. ഇന്നലെ കോട്ടയത്തു ബി.ജെ.പി. കോട്ടയം പാര്ലമെന്റ് നേതൃ യോഗവും തെരഞ്ഞെടുപ്പ് വിശകലനവും നടക്കുന്നതിനിടെയാണ് ജോര്ജിനെതിരേ രൂക്ഷ വിമര്ശനമുയര്ന്നത്.
പാലായില്നിന്നുള്ള നേതാക്കളാണ് ജോര്ജിനെതിരേ യോഗത്തില് തുറന്നടിച്ചത്. പി.സി. ജോര്ജിന്റെ ശൈലി ബി.ജെ.പിക്കു ചേര്ന്നതല്ലെന്നായിരുന്നു യോഗത്തിലുണ്ടായ വിമര്ശനം.
ബി.ജെ.പി. ദേശീയ നിര്വാഹകസമിതിയംഗം പി.കെ. കൃഷ്ണദാസ്, സംസ്ഥാന സംഘടനാ സെക്രട്ടറി എം. ഗണേഷ് എന്നിവരുടെ സാന്നിധ്യത്തിലായിരുന്നു വിമര്ശനം. മക്കള് രാഷ്ട്രീയത്തെ തള്ളിപ്പറയുന്നതാണ് ബി.ജെ.പിയുടെ നിലപാടെന്നും അതിനു വിരുദ്ധമായി പി.സി. ജോര്ജ് മകന് ഷോണ് ജോര്ജിനെ പാലായില് സ്വയം സ്ഥാനാര്ത്ഥിയായി പ്രഖ്യാപിച്ചത് അംഗീകരിക്കാനാകില്ലെന്നും നേതാക്കള് ചൂണ്ടിക്കാട്ടി.
പാലായും പൂഞ്ഞാറും അതിര്ത്തി പങ്കിടുന്ന മണ്ഡലങ്ങളാണ്. ഇവിടെ പിതാവും മകനും മത്സരിക്കുന്നത് അംഗീകരിക്കാനാകില്ല. കഴിഞ്ഞ തവണ പാലായില് മത്സരിച്ച ബി.ജെ.പി. സ്ഥാനാര്ത്ഥി എന്. ഹരി ഒറ്റയ്ക്ക് ഇരുപത്തയ്യായിരത്തോളം വോട്ടുകള് പിടിച്ചിരുന്നു. ഇത്തവണ വിജയിക്കാനാവശ്യമായ വോട്ട് ബി.ജെ.പിക്ക് ഒറ്റയ്ക്കു സമാഹരിക്കാന് കഴിയും. പാര്ലമെന്റ് തെരഞ്ഞെടുപ്പില് സ്ഥാനാര്ത്ഥിത്വം ഘടകകക്ഷിക്കു നല്കിയതിലൂടെ ബി.ജെ.പി. പ്രവര്ത്തകരില് വലിയ ആവേശം സൃഷ്ടിക്കാന് കഴിഞ്ഞില്ല. പാലാ ഉപതെരഞ്ഞെടുപ്പിലും സീറ്റ് ഘടകകക്ഷിക്ക് നല്കിയാല് ബി.ജെ.പി. പ്രവര്ത്തകര് പിന്തിരിഞ്ഞു നില്ക്കുന്ന സാഹചര്യമുണ്ടാകും നേതാക്കള് ചൂണ്ടിക്കാട്ടി. പാലാ ഉപതെരഞ്ഞെടുപ്പില് ബി.ജെ.പി. സ്ഥാനാര്ത്ഥിതന്നെ മത്സരിക്കണമെന്നു സംസ്ഥാന നേതൃത്വത്തോട് ആവശ്യപ്പെടാനും യോഗം തീരുമാനിച്ചു.
കഴിഞ്ഞ നിയമസഭാ തെരഞ്ഞെടുപ്പില് ബി.ഡി.ജെ.എസ്. നല്കിയ സഹായം ഇത്തവണ ഉണ്ടായില്ലെന്ന് ഏഴു നിയമസഭാ മണ്ഡലങ്ങളില്നിന്നുള്ള നേതാക്കളും പറഞ്ഞു.
എസ്.എന്.ഡി.പിയില്നിന്ന് അനുകൂല സമീപനം ലഭിച്ചില്ല. ഈ കാരണത്താലാണ് ബി.ഡി.ജെ.എസ്. ഉള്വലിഞ്ഞു നിന്നതെന്ന വിമര്ശനവുമുണ്ടായി. കഴിഞ്ഞ പാര്ലമെന്റ് തെരഞ്ഞെടുപ്പിനോടനുബന്ധിച്ചാണ് പി.സി. ജോര്ജിന്റെ നേതൃത്വത്തിലുള്ള ജനപക്ഷം എന്.ഡി.എ. മുന്നണിയുടെ ഭാഗമായത്. കോട്ടയത്തും പത്തനംതിട്ടയിലും ജനപക്ഷം പ്രവര്ത്തകര് എന്.ഡി.എ. സ്ഥാനാര്ത്ഥികള്ക്കുവേണ്ടി സജീവമായി പ്രവര്ത്തിച്ചിരുന്നു. പത്തനംതിട്ടയിലെ ബി.ജെ.പി. സ്ഥാനാര്ത്ഥി കെ. സുരേന്ദ്രനു മുപ്പതിനായിരം വോട്ട് അധികമായി നേടിക്കൊടുക്കന് ജനപക്ഷത്തിന് കഴിഞ്ഞുവെന്നായിരുന്നു അവകാശവാദം.
പത്തനംതിട്ട ജില്ലാ കമ്മറ്റി പി.സി. ജോര്ജിന്റെ നിലപാടിനെ സ്വാഗതം ചെയ്യുകയും ചെയ്തിരുന്നു. ഇതിനിടെയാണ് കോട്ടയം ജില്ലാ കമ്മറ്റി യോഗത്തില് പി.സി. ജോര്ജിനെ തള്ളിപ്പറഞ്ഞ് ചര്ച്ച നടന്നത്.
https://www.facebook.com/Malayalivartha
