സിപിഎമ്മിന്റേയും മുസ്ലീം ലീഗിന്റേയും നേതൃത്വത്തില്‍ കള്ളവോട്ട് നടത്തിയതിന് സര്‍ക്കാരിനും ജനങ്ങള്‍ക്കും ഭീമമായ നഷ്ടമാണ് ഉണ്ടായിരിക്കുന്നത്. റീ പോളിംഗിന് കാരണക്കാരായ കള്ളവോട്ടുകാര്‍ക്കെതിരെ ഒരു നടപടിയും ഇതുവരെ എടുത്തിട്ടില്ല. മാത്രമല്ല പാര്‍ട്ടിക്കാര്‍ അവരെ സംരക്ഷിക്കുകയും ചെയ്യുന്നുണ്ട്. 

കാസര്‍കോട്, കണ്ണൂര്‍ മണ്ഡലങ്ങളിലെ നാല് ബൂത്തുകളിലാണ് റീ പോളിംഗ് നടക്കുന്നത്. ആ ബുത്തുകളിലെ പരസ്യ പ്രചാരണം ഇന്ന് വൈകീട്ട് ആറ് മണിയോടെ അവസാനിക്കും. ലോക്‌സഭാ തിരഞ്ഞെടുപ്പിന്റെ അവസാനഘട്ട തിരഞ്ഞെടുപ്പ് നടക്കുന്ന ഞായറാഴ്ചയാണ് നാല് ബൂത്തുകളില്‍ റീപോളങ് നടക്കുക. 

കല്യാശ്ശേരി നിയമസഭാ മണ്ഡലത്തിലെ പിലാത്തറ എ.യു.പി. സ്‌കൂളിലെ 19ാം ബൂത്ത്, പുതിയങ്ങാടി ജുമാഅത്ത് ഹയര്‍സെക്കന്‍ഡറി സ്‌കൂളിലെ 69, 70 ബൂത്തുകള്‍, തളിപ്പറമ്പ് നിയമസഭാ മണ്ഡലത്തില്‍പ്പെട്ട പാമ്പുരുത്തി മാപ്പിള എ.യു.പി.എസിലെ 166ാം ബൂത്ത് എന്നിവിടങ്ങളിലാണ് റീപോളിങ്. ഇതില്‍ കല്യാശ്ശേരിയിലെ മൂന്നുബൂത്തുകള്‍ കാസര്‍കോട് ലോക്‌സഭാ മണ്ഡലത്തിലാണ്. തളിപ്പറമ്പിലെ പാമ്പുരുത്തി സ്‌കൂള്‍ കണ്ണൂര്‍ മണ്ഡലത്തിലും.

പിലാത്തറയില്‍ സി.പി.എം. പ്രവര്‍ത്തകരും മറ്റ് മൂന്ന് ബൂത്തുകളില്‍ മുസ്ലിംലീഗ് പ്രവര്‍ത്തകരും കള്ളവോട്ടുചെയ്‌തെന്നാണ് കണ്ടെത്തിയത്. നാലു ബൂത്തുകളിലും ഏപ്രില്‍ 23ന് നടന്ന വോട്ടെടുപ്പ് തിരഞ്ഞെടുപ്പ് കമ്മീഷന്‍ റദ്ദാക്കിയിരുന്നു. ഞായറാഴ്ച രാവിലെ ഏഴുമുതല്‍ വൈകിട്ട് ആറുവരെയാണ് റീപോളിങ്. റീപോളിങ്ങില്‍ വോട്ടര്‍മാരുടെ ഇടത്തെ കൈയിലെ നടുവിരലിലാണ് മഷി പുരട്ടുക.

സംസ്ഥാനത്ത് പല തിരഞ്ഞെടുപ്പുകളിലും കള്ളവോട്ട് ആരോപണങ്ങളുണ്ടായിട്ടുണ്ടെങ്കിലും അതിന്റെപേരില്‍ റീപോളിങ് നടക്കുന്നത് ആദ്യമാണ്. ഇതോടെ ഇത്തവണത്തെ ലോക്‌സഭാ തിരഞ്ഞെടുപ്പില്‍ റീപോളിങ് നടക്കുന്ന ബൂത്തുകളുടെ എണ്ണം അഞ്ചാകും. മോക് പോളിങ് നടത്തിയ വോട്ടുകള്‍ ഒഴിവാക്കാതെ വോട്ടെടുപ്പ് നടത്തിയതിനാല്‍, എറണാകുളം കിഴക്കേ കടുങ്ങല്ലൂര്‍ സര്‍വീസ് സഹകരണ ബാങ്ക് ഓഡിറ്റോറിയത്തില്‍ വീണ്ടും തിരഞ്ഞെടുപ്പ് നടത്തിയിരുന്നു.

കള്ളവോട്ട് നടന്നെന്ന് കണ്ടെത്തിയ കേരളത്തിലെ നാല് ബൂത്തുകളില്‍ റീപോളിംഗ് നടത്താന്‍ കേന്ദ്ര തെരഞ്ഞെടുപ്പ് കമ്മീഷന്‍ ഉത്തരവിട്ടതിനെ സ്ഥാനാര്‍ത്ഥികളും സ്വാഗതം ചെയ്തിട്ടുണ്ട്.

സ്ഥാനാര്‍ത്ഥികള്‍ക്ക് നാളെ വൈകീട്ട് വരെ പരസ്യ പ്രചാരണം നടത്താന്‍ അനുമതി നല്‍കിയിട്ടുണ്ട്. യുഡിഎഫ്, എല്‍ഡിഎഫ് പ്രവര്‍ത്തകര്‍ തെരഞ്ഞെടുപ്പ് പ്രചാരണ പ്രവര്‍ത്തനങ്ങള്‍ സജീവമാക്കിയിട്ടുണ്ട്.

സ്ഥാനാര്‍ത്ഥികളും രംഗത്ത് സജീവമാണ്. റീപോളിംഗിനെ സ്വാഗതം ചെയ്യുന്നുവെന്ന് പ്രതിപക്ഷ നേതാവ് രമേശ് ചെന്നിത്തല വിശദമാക്കി. കള്ള വോട്ട് നടന്ന എല്ലായിടത്തും റീ പോളിഗ് വേണമെന്നും ഇക്കാര്യം തെരഞ്ഞെടുപ്പ് കമ്മീഷന്‍ പരിശോധിക്കണമെന്നും രമേശ് ചെന്നിത്തല ആവശ്യപ്പെട്ടു.

കാസര്‍കോട് പാര്‍ലമെന്റ് മണ്ഡലത്തില്‍ തെരെഞ്ഞെടുപ്പ് ദിവസം സി.പി.എം കള്ളവോട്ട് നടത്തിയെന്ന പരാതിയോടെയാണ് കള്ളവോട്ട് വിവാദത്തിന് തുടക്കമായത്. പാര്‍ലമെന്റ് മണ്ഡലത്തിലെ വിവിധ അസംബ്ലി മണ്ഡലങ്ങളില്‍ ഉള്‍പ്പെടുന്ന 110 പോളിംഗ് ബൂത്തുകളില്‍ റീപോളിംഗ് നടത്തണമെന്ന് ആവശ്യപ്പെട്ട് യു.ഡി.എഫ് സ്ഥാനാര്‍ഥി രാജ്‌മോഹന്‍ ഉണ്ണിത്താന്റെ മുഖ്യ പോളിംഗ് ഏജന്റ് അഡ്വ. സി.കെ ശ്രീധരന് പരാതി നല്‍കിയിരുന്നു. 

കല്യാശേരി, പയ്യന്നൂര്‍ മണ്ഡലങ്ങള്‍ക്കു പുറമെ തൃക്കരിപ്പൂര്‍, കാഞ്ഞങ്ങാട്, ഉദുമ മണ്ഡലങ്ങളിലെ വിവിധ ബൂത്തുകളിലാണ് റീപോളിംഗ് നടത്തണമെന്ന ആവശ്യം ഉന്നയിച്ചിട്ടുള്ളത്. 

തൃക്കരിപ്പൂര്‍, കാഞ്ഞങ്ങാട് മണ്ഡലങ്ങളിലെ കിനാനൂര്‍ കരിന്തളം, മടിക്കൈ, കോടോം, ഉദുമ മണ്ഡലത്തിലെ പനയാല്‍, പാക്കം, കൂട്ടക്കനി, ബേഡകം, കുറ്റിക്കോല്‍ തുടങ്ങി പാര്‍ലമെന്റ് മണ്ഡലത്തിലെ 110 ബൂത്തുകളില്‍ റീപോളിംഗ് നടത്തണമെന്നായിരുന്നു ആവശ്യം. സി.പി.എമ്മിനു ആധിപത്യമുള്ള പ്രദേശങ്ങളില്‍ വ്യാപകമായി കള്ളവോട്ട് ചെയ്യാന്‍ തെരെഞ്ഞെടുപ്പ് ഉദ്യോഗസ്ഥര്‍ കൂട്ട് നിന്നതായും യു.ഡി.എഫ് നേതാക്കള്‍ പറയുന്നു.

റീപോളിംഗ് ആവശ്യപ്പെട്ട ബൂത്തുകളില്‍ സി.സി.ടി.വി ക്യാമറകള്‍ സ്ഥാപിക്കണം. കേന്ദ്ര സേനയെ സുരക്ഷക്ക് നിയമിക്കണം, റീപോളിംഗ് നടത്തേണ്ട ബൂത്തുകള്‍ നിരീക്ഷിക്കുന്നതിന് കേന്ദ്ര നിരീക്ഷകരെ ഏര്‍പ്പെടുത്തണം തുടങ്ങിയ ആവശ്യങ്ങളും പരാതിയില്‍ ഉന്നയിച്ചിരുന്നു. ഇതിന് പിന്നാലെയാണ് റീപോളിംഗിന് തെരഞ്ഞെടുപ്പ് കമ്മീഷന്‍ ഉത്തരവിട്ടത്.