കൊട്ടാരക്കര വയക്കലില്‍ ലോറിയും കെഎസ്‌ആര്‍ടിസി ബസും കൂട്ടിയിടിച്ചുണ്ടായ അപകടത്തില്‍ ഗതാഗത വകുപ്പ് അന്വേഷണം ആരംഭിച്ചു . അപകടത്തിന് കാരണം ഡ്രൈവര്‍മാരുടെ അശ്രദ്ധയാണെന്നാണ് പ്രാഥമിക നിഗമനം. റിപ്പോ‍ര്‍ട്ട് നാളെ ഗതാഗത കമ്മീഷണര്‍ക്ക് കൈമാറും.

വാഹനങ്ങളുടെ വേഗത, ദൂരെ നിന്നുള്ള കാഴ്ചകുറവ്, വാഹനങ്ങള്‍ ഓടിച്ചിരുന്നവരുടെ ശ്രദ്ധകുറവ് എന്നിവ പരിശോധിച്ചുകൊണ്ടാണ് റിപ്പോര്‍ട്ട് നല്‍കുന്നത് . ഗതാഗത വകുപ്പിന്‍റെ പ്രത്യേക സംഘം അപകടസ്ഥലത്ത് എത്തി പരിശോധന തുടങ്ങി. അപകടത്തില്‍പ്പെട്ട രണ്ട് വാഹനങ്ങളും പരിശോധിച്ചു. സമീപവാസികളില്‍ നിന്നും മൊഴി ശേഖരിച്ചു.

വാഹനങ്ങള്‍ ഓടിച്ചവരുടെ ഭാഗത്ത് അശ്രദ്ധ ഉണ്ടായിരുന്നുവെന്ന് നാട്ടുകാരും പറഞ്ഞു . എം സി റോഡില്‍ വയക്കല്‍ ഭാഗത്ത് അമിതവേഗത കാരണം അപകടങ്ങള്‍ ഉണ്ടാകുന്നത് പതിവ്കാഴ്ചയാണെന്നും നാട്ടുകാര്‍ പറയുന്നു. അപകടത്തില്‍ പരിക്കേറ്റ് വിവിധ ആശുപത്രികളില്‍ കഴിയുന്നവര്‍ സുഖം പ്രാപിച്ച്‌ വരികയാണ്. ഇന്നലെ വൈകിട്ട് മൂന്നുമണിയോടുകൂടിയാണ് അപകടം നടന്നത്. വാഹനങ്ങള്‍ കൂട്ടിയിടിച്ചപ്പോള്‍ തന്നെ തീ പടരുകയായിരുന്നു. അപകടത്തില്‍ ഡ്രൈവറും കണ്ടക്റ്ററും ഉള്‍പ്പെടെ 13 പേര്‍ക്ക് പരുക്കേറ്റിരുന്നു . വാഹനങ്ങള്‍ പൂര്‍ണമായും കത്തിനശിച്ചു.