മലപ്പുറത്ത് മദ്യപിച്ചെത്തിയ ഭർത്താവ് ഭാര്യയെ കുത്തിക്കൊന്നു. ചോറിനു കറിയില്ലാത്തതിന്റെ പേരിലുണ്ടാക്കിയ വഴക്കാണ് കൊലപാതകത്തിൽ അവസാനിച്ചത് .

കാപ്പിൽ പാറശ്ശേരി കുന്നുമ്മൽ പൂങ്കുഴി ഫസീല (38) ആണു മരിച്ചത്. ഭർത്താവ് കുന്നുമ്മൽ റഷീദ് (48) അറസ്റ്റിലായി . വീട്ടിൽ നിന്നും ബഹളം കേട്ടെത്തിയ അയൽക്കാർ ചോരയിൽ കുളിച്ചുകിടന്ന ഫസീലയെ കാണുകയായിരുന്നു ഉടൻ വണ്ടൂരിലെ സ്വകാര്യ ആശുപത്രിയിലെത്തിച്ചു .

പക്ഷേ ജീവൻ രക്ഷിക്കാൻ സാധിച്ചില്ല.കമുകുതോട്ടങ്ങൾ കരാറെടുത്ത് അടയ്ക്ക പറിച്ചു വിൽക്കുന്നയാളാണു റഷീദ്. ജോലി കഴിഞ്ഞ് വീട്ടിലെത്തിയപ്പോൾ ഭക്ഷണത്തിനു കറിയുണ്ടായിരുന്നില്ല.

പിന്നാലെ വഴക്കുണ്ടായി. അപ്പോൾ കത്തിയെടുത്തു ഭാര്യയെ കുത്തിയെന്നും റഷീദ് പറഞ്ഞു. ഫസീലയുടെ നെഞ്ചിലാണു കുത്തേറ്റത്.റഷീദ് പതിവായി മദ്യപിച്ചെത്തി വഴക്കുണ്ടാക്കാറുണ്ടായിരുന്നെന്നും ഇടയ്ക്കിടെ സ്വന്തം വീട്ടിൽ പോയി നിൽക്കുന്ന ഫസീലയെ ബന്ധുക്കൾ ഇടപെട്ടു തിരിച്ചു കൊണ്ടുവരാറായിരുന്നെന്നും അയൽക്കാർ പറഞ്ഞു.