കല്ലമ്പലത്ത് കിണർ വൃത്തിയാക്കുന്നതിനിടെ ഉള്ളിൽ തീപടർന്ന് മൂന്ന് യുവാക്കൾക്ക് ഗുരുതരമായി പൊള്ളലേറ്റു. കല്ലമ്പലം സ്വദേശികളായ സുനു, വിനീത്, ഉണ്ണി (രാജേഷ്) എന്നിവർക്കാണ് അപകടം സംഭവിച്ചത്. തലയ്ക്കും മുഖത്തും നെഞ്ചിലും ആഴത്തിൽ പൊള്ളലേറ്റ വിനീതിനെയും ഉണ്ണിയെയും തിരുവനന്തപുരം മെഡിക്കൽ കോളേജ് ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചു. കൈയ്ക്കും മുതുകിനും പരിക്കേറ്റ സുനു ആറ്റിങ്ങൽ താലൂക്ക് ആശുപത്രിയിൽ ചികിത്സയിലാണ്. ദേശീയപാതയ്ക്ക് സമീപമുള്ള പെട്രോൾ പമ്പിനോട് ചേർന്ന കെട്ടിടത്തിലെ കിണറ്റിലാണ് അപകടമുണ്ടായത്.

പമ്പ് സെറ്റ് ഉപയോഗിച്ച് കിണറ്റിലെ വെള്ളം പൂർണ്ണമായി വറ്റിച്ച ശേഷം, സുനുവും വിനീതിയും ഉള്ളിലിറങ്ങാൻ തയ്യാറെടുക്കുകയായിരുന്നു. കിണറിനുള്ളിൽ ഓക്സിജൻ ഉണ്ടോയെന്ന് പരിശോധിക്കാൻ മെഴുകുതിരി കത്തിച്ച് ബക്കറ്റിലാക്കി താഴേക്ക് ഇറക്കിയപ്പോഴാണ് പെട്ടെന്ന് തീ ആളിപ്പടർന്നത്.കിണറിന്റെ പകുതിയോളം എത്തിയപ്പോൾ വലിയൊരു ശബ്ദത്തോടെ മുകളിലേക്ക് തീ ആളിപ്പടരുകയും തങ്ങളെ അടിച്ചുതെറിപ്പിക്കുകയുമായിരുന്നു എന്ന് പരിക്കേറ്റവർ പറഞ്ഞു. കെട്ടിടത്തിന്റെ ഇടുങ്ങിയ ഭാഗത്തായതിനാൽ യുവാക്കൾക്ക് ഓടിമാറാൻ സാധിച്ചില്ല. തൊട്ടടുത്തുള്ള പെട്രോൾ പമ്പിൽ നിന്നും ഇന്ധനം കിണറ്റിലേക്ക് ചോർന്നിട്ടുണ്ടാകാമെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ പോലീസ് അന്വേഷണവും പരിശോധനകളും ആരംഭിച്ചിട്ടുണ്ട്.