സൗമ്യ ദുരന്തത്തെ മുന്‍കൂട്ടിക്കണ്ടിരുന്നു. തനിക്കെന്തെങ്കിലും സംഭവിച്ചാല്‍ സാക്ഷി പറയാനായി മകനെ ചുമതലപ്പെടുത്തി.അജാസില്‍നിന്നുള്ള ആക്രമണം സൗമ്യ മുന്‍കൂട്ടിക്കണ്ടിരുന്നെന്ന് അന്വേഷണ ഉദ്യോഗസ്ഥര്‍. ഫോണ്‍ എടുക്കാത്തതിനെത്തുടര്‍ന്ന്, അജാസ് മുമ്പൊരിക്കല്‍ പെട്രോളുമായി വീട്ടിലെത്തിയതോടെയാണ് ഏതു നിമിഷവും ആക്രമണമുണ്ടാകുമെന്ന് സൗമ്യ ഉറപ്പിച്ചത്.

12വയസ്സുള്ള മൂത്തമകന്‍ ഋഷികേശിനോട്, അജാസ് ശല്യം ചെയ്യുന്നതിനെപ്പറ്റി സൗമ്യ പറഞ്ഞിരുന്നു. തനിക്കെന്തെങ്കിലും സംഭവിച്ചാല്‍ അജാസാണ് ഉത്തരവാദിയെന്ന് പോലീസ് മാമന്മരാരെ അറിയിക്കണമെന്ന് മകനോട് ആവശ്യപ്പെട്ടിരുന്നു.അമ്മയുടെ മരണമറിഞ്ഞ് കുടുംബവീട്ടില്‍നിന്ന് ശനിയാഴ്ച രാത്രി വള്ളികുന്നത്തെ വീട്ടിലെത്തിയപ്പോള്‍ ഋഷികേശ് ഇക്കാര്യം ഉദ്യോഗസ്ഥരെ അറിയിച്ചു.

ഫോണില്‍ നിരന്തരം വിളിച്ചുശല്യപ്പെടുത്തിയിരുന്നതും വിളിക്കരുതെന്ന് അമ്മ താക്കീത് ചെയ്തതുമെല്ലാം കുട്ടിയുടെ മൊഴിയിലുണ്ട്. കേസന്വേഷണത്തില്‍ ഇക്കാര്യങ്ങള്‍ നിര്‍ണായകമായിരിക്കുകയാണ്. അമ്മ ഇന്ദിരയോടും സൗമ്യ ഇക്കാര്യങ്ങള്‍ പങ്കുവെച്ചിരുന്നു. ശനിയാഴ്ച വൈകുന്നേരം വീട്ടില്‍നിന്ന് പുറത്തേക്ക് സ്‌കൂട്ടറില്‍ ഇറങ്ങുന്നതിനിടെയാണ് അക്രമി സൗമ്യയുടെ മുന്നിലെത്തിയത്. കാര്‍ സ്‌കൂട്ടറിലേക്ക് ഇടിച്ചുകയറ്റി. അപ്പോള്‍ത്തന്നെ സൗമ്യ ഓടിരക്ഷപ്പെടാന്‍ ശ്രമിച്ചു. പരിചയമില്ലാത്ത കാര്‍ വീടിനുസമീപം കണ്ടപ്പോഴേ അപകടം മണത്തതിനാലാകാം കാര്‍ തട്ടിയപ്പോള്‍ത്തന്നെ രക്ഷപ്പെടാന്‍ ശ്രമിച്ചതെന്നാണ് പോലീസ് കരുതുന്നത്.