അട്ടക്കുളങ്ങര വനിതാ ജയിലില്‍നിന്ന് തടവുചാടിയ യുവതികളെ പൊലീസ് പിടികൂടി. വര്‍ക്കല തച്ചോട് സജിവിലാസത്തില്‍ സന്ധ്യ (26), പാങ്ങോട് വെള്ളയം പുത്തന്‍വീട്ടില്‍ ശില്‍പമോള്‍ (23) എന്നിവരെ വ്യാഴാഴ്ച രാത്രി 11.30ഓടെ പാലോട് അടപ്പുപാറ ഭാഗത്തുനിന്നാണ് പിടികൂടിയത്. ഇരുവരെയും പുലര്‍ച്ചയോടെ ഫോര്‍ട്ട് പൊലീസ് സ്‌റ്റേഷനില്‍ എത്തിച്ചു. ഇന്ന് കോടതിയില്‍ ഹാജരാക്കും.

കഴിഞ്ഞ ചൊവ്വാഴ്ചയാണ് വനിതാ ജയിലിലെ മുരിങ്ങമരത്തിലൂടെ പുറത്ത് ചാടി ഇരുവരും രക്ഷപ്പെട്ടത്. തുടര്‍ന്ന് മെഡിക്കല്‍ കോളജ് ഭാഗത്തെത്തിയ ഇരുവരും ഭിക്ഷ യാചിച്ച് കിട്ടിയ പണവുമായി വര്‍ക്കലയിലേക്ക് പോകുകയായിരുന്നു. അവിടെനിന്ന് ബസില്‍ അയിരൂരിലും തുടര്‍ന്ന് പരവൂരിലും എത്തി. പൊലീസ് പിന്തുടരുന്നെന്ന് മനസ്സിലാക്കി പാങ്ങോടുള്ള ശില്‍പയുടെ ബന്ധുവീട്ടിലേക്ക് വരുന്നതിനിടയിലാണ് ഫോര്‍ട്ട് എ.സി പ്രതാപചന്ദ്രന്‍ നായരുടെ നേതൃത്വത്തിലുള്ള പ്രത്യേക സംഘം ഇരുവരെയും പിടികൂടിയത്. കഴിഞ്ഞദിവസം പ്രതികളുടെ ബന്ധുക്കളെ ചോദ്യം ചെയ്തതില്‍ നിന്ന് ഇവര്‍ വീടുകളിലേക്ക് സഹായത്തിനായി എത്തുമെന്ന സൂചന പൊലീസിന് ലഭിച്ചിരുന്നു. പാരിപ്പള്ളിയില്‍ വെച്ച് ശില്‍പ ബന്ധുക്കളുമായി ഫോണില്‍ ബന്ധപ്പെടുകയും ചെയ്‌യു. ഇതാണ് പൊലീസിന് പിടിവള്ളിയായത്.

സന്ധ്യക്കും ശില്‍പ്പക്കുമായി പോലീസ് ഇന്നലെ ലുക്കൗട്ട് നോട്ടീസ് പുറപ്പെടുവിച്ചിരുന്നു. കല്ലറ പാങ്ങോട് സ്വദേശിയായ ശില്പയെ ജോലിചെയ്തിരുന്ന വീട്ടിലെ ഉടമസ്ഥന്റെ മോതിരം മോഷ്ടിച്ച കേസില്‍ ഈ മാസം ഏഴിന് നഗരൂര്‍ പോലീസാണ് അറസ്റ്റ് ചെയ്തത്. വ്യാജ സ്വര്‍ണം പണയംവെച്ചതിന് പള്ളിച്ചല്‍ പോലീസ് ജൂണ്‍ 17നാണ് സന്ധ്യയെ അറസ്റ്റ് ചെയ്തത്. ഷാഡോ പോലീസിന്റെ ഒരു ടീം ഇവര്‍ക്കായി തിരിച്ചില്‍ നടത്തി വരികയായിരുന്നു.
റെയില്‍വേ സ്‌റ്റേഷനുകള്‍, ബസ് സ്റ്റാന്‍ഡുകള്‍ എന്നിവിടങ്ങളില്‍ ഇവരുടെ ചിത്രങ്ങള്‍ നല്‍കുകയും ചെയ്തിരുന്നു.
അതേസമയം, തടവുപുള്ളികള്‍ രക്ഷപ്പെട്ട സംഭവത്തില്‍ ജയില്‍ ജീവനക്കാര്‍ക്കെതിരെയുള്ള നടപടി വരുംദിവസങ്ങളില്‍ തീരുമാനിക്കും. പ്രാഥമികാന്വേഷണത്തില്‍തന്നെ ജീവനക്കാരുടെ അനാസ്ഥ വ്യക്തമായിരുന്നതായി ഉദ്യോഗസ്ഥര്‍ പറയുന്നു. രണ്ടു തടവുപുള്ളികള്‍ ജയില്‍ചാടിയിട്ടും അത് ഉറപ്പിക്കാന്‍ ജീവനക്കാര്‍ക്ക് മണിക്കൂറുകള്‍ വേണ്ടിവന്നതുതന്നെ നിരുത്തരവാദിത്തത്തിന് തെളിവാണെന്ന് ഉന്നത ഉദ്യോഗസ്ഥര്‍ ചൂണ്ടിക്കാട്ടുന്നു.