നെടുങ്കണ്ടം കസ്റ്റഡി മരണക്കേസില്‍ എ.എസ്.ഐ ഉള്‍പ്പെടെ മൂന്ന് പോലീസുകാര്‍ കൂടി അറസ്റ്റില്‍. നെടുങ്കണ്ടം സ്‌റ്റേഷനിലെ എ.എസ്.ഐ ആയിരുന്ന റോയ് പി.വര്‍ഗീസ്, സി.പി.ഒ ജിതിന്‍ കെ. ജോര്‍ജ്, ഹോം ഗാര്‍ഡ് കെ.എം. ജെയിംസ് എന്നിവരെയാണ് ക്രൈം ബ്രാഞ്ച് അറസ്റ്റ് ചെയ്തത്. നെടുങ്കണ്ടം സ്‌റ്റേഷനിലെ മുന്‍ എസ്.ഐ അടക്കമുള്ള ഉദ്യോഗസ്ഥരെ നേരത്തെ തന്നെ അറസ്റ്റ് ചെയ്തിരുന്നു. ഇതോടെ കസ്റ്റഡി മരണക്കേസില്‍ അറസ്റ്റിലായ പോലീസുകാരുടെ എണ്ണം ഏഴായി.

കഴിഞ്ഞമാസം 21നാണ് സാമ്പത്തിക തട്ടിപ്പ് കേസില്‍ അറസ്റ്റിലായ വാഗമണ്‍ സ്വദേശി രാജ്കുമാര്‍ പീരുമേട് സബ് ജയിലില്‍ മരിച്ചത്. അന്വേഷണത്തില്‍ നെടുങ്കണ്ടം സ്‌റ്റേഷനില്‍ വച്ച് രാജ്കുമാറിന് ക്രൂരമര്‍ദ്ദനമേറ്റെന്ന് കണ്ടെത്തി. ഈര്‍ക്കില്‍ പ്രയോഗവും, മുളക് പ്രയോഗവും അടക്കമുള്ള മൂന്നാംമുറകളാണ് പൊലീസുകാര്‍ രാജ്കുമാറിന് മേല്‍ പ്രയോഗിച്ചത്. ഇതോടെ നെടുങ്കണ്ടം എസ്.ഐ സാബു അടക്കം നാല് പൊലീസുകാരെ െ്രെകംബ്രാഞ്ച് അറസ്റ്റ് ചെയ്തു.