മലേഷ്യയില് ഹെലികോപ്റ്റര് അപകടത്തില്പ്പെട്ട് അഞ്ച് പേരെ കാണാതായി
മലേഷ്യയില് മെഡിക്കല് ജീവനക്കാരുള്പ്പെടെ അഞ്ച് പേരുമായി പറന്ന ഹെലികോപ്ടര് അപകടത്തില്പ്പെട്ടു. ബോര്ണിയോ ദ്വീപിലെ സറാവാക് വിമാനത്താവളത്തിന് സമീപമാണ് ഹെലികോപ്റ്റര് തകര്ന്ന് വീണത്. അപകടത്തില് ആരെങ്കിലും മരിച്ചിട്ടുണ്ടോയെന്ന് സംബന്ധിച്ച ഇതുവരെ സ്ഥിരീകരണം വന്നിട്ടില്ല. ഫ്ളയിംഗ് ഡോക്ടര് സര്വീസ് വിഭാഗത്തില്പ്പെട്ടവരാണ് അപകടത്തില്പ്പെട്ടത്.
സറാവാക്കിലെ ലോങ് ലെല്ലാങ്ങ് ഷോര്ട്ട് ടേക്ക്ഓഫ് ആന്ഡ് ലാന്ഡിങ് വിമാനത്താവളത്തിന് സമീപം അപകടമുണ്ടായതായി വൈകുന്നേരത്തോടെ വിവരം ലഭിച്ചെന്ന് മലേഷ്യന് സിവില് ഏവിയേഷന് അതോറിറ്റി അറിയിച്ചു. അപകടത്തിന്റെ കാരണം കണ്ടെത്തുന്നതിനായി മലേഷ്യന് ഗതാഗത മന്ത്രാലയത്തിന് കീഴിലുള്ള എയര് ആക്സിഡന്റ് ഇന്വെസ്റ്റിഗേഷന് ബ്യൂറോ അന്വേഷണം ആരംഭിച്ചിട്ടുണ്ട്.
പൈലറ്റും ആരോഗ്യവകുപ്പിലെ നാല് ജീവനക്കാരുമാണ് ഹെലികോപ്റ്ററില് ഉണ്ടായിരുന്നതെന്ന് മലേഷ്യന് ആരോഗ്യമന്ത്രി ദുല്കിഫ്ളി അഹമ്മദ് അറിയിച്ചു. ഒരു മെഡിക്കല് ഓഫീസര്, ഒരു അസിസ്റ്റന്റ് മെഡിക്കല് ഓഫീസര്, രണ്ട് നഴ്സുമാര് എന്നിവരാണ് ആരോഗ്യവകുപ്പ് ജീവനക്കാരില് ഉള്പ്പെട്ടിരുന്നത്.
ഉള്ഗ്രാമങ്ങളില് മെഡിക്കല് സേവനം, അടിയന്തര ചികിത്സ, രോഗികളുടെ ഗതാഗതം തുടങ്ങിയവ ലഭ്യമാക്കുന്നതിനായി വിമാനങ്ങളോ ഹെലികോപ്റ്ററുകളോ ഉപയോഗിക്കുന്ന സംവിധാനമാണ് 'ഫ്ളയിംഗ് ഡോക്ടര് സര്വീസ്'. അപകടത്തില്പ്പെട്ടവരുടെ നിലവിലെ സ്ഥിതിയും അപകടത്തിന്റെ കാരണവും ഇതുവരെ വ്യക്തമായിട്ടില്ല. അഗ്നിരക്ഷാസേനയും മെഡിക്കല് അധികൃതരും ഉള്പ്പെടെയുള്ളസംഘങ്ങളുടെ നേതൃത്വത്തില് രക്ഷാപ്രവര്ത്തനവും തിരച്ചിലുംതുടരുകയാണ്.
https://www.facebook.com/Malayalivartha
