ട്രാന്സ്ജെന്ഡേഴ്സിനു കരുതലൊരുക്കി 'കെയര് ആന്ഡ് ഷോര്ട്ട് സ്റ്റേ ഹോം'
തിരുവനന്തപുരത്ത് ട്രാന്സ്ജെന്ഡര് സമൂഹത്തിന് ആശ്രയമായി കെയര് ആന്ഡ് ഷോര്ട്ട് സ്റ്റേ ഹോം ആരംഭിച്ചു. തിരുവനന്തപുരം കുന്നുകുഴിയില് തുടങ്ങിയ ഷോര്ട്ട് സ്റ്റേ ഹോമിൻറെ ഉദ്ഘാടനം ആരോഗ്യമന്ത്രി കെ കെ ശൈലജയാണ് നിർവഹിച്ചത്. സംസ്ഥാനത്തെ ആദ്യത്തെ പദ്ധതിയുടെ നടത്തിപ്പ് ചുമതല ക്വീയറിഥം സി ബി ഒയ്ക്കാണ്. ആഹാരം, കൗണ്സിലിംഗ്, വൈദ്യസഹായം, നിയമ സഹായം തുടങ്ങി ട്രാന്സ്ജെന്ഡര് വിഭാഗത്തിലുള്ള വ്യക്തികള്ക്ക് ആവശ്യമുള്ള സൗകര്യങ്ങളെല്ലാം ഹോമില് ലഭിക്കുമെന്ന് ആരോഗ്യമന്ത്രി പറഞ്ഞു. അടിയന്തിര സാഹചര്യങ്ങളില് പെട്ടുപോകുന്ന ട്രാന്സ് ജെന്ഡര് വ്യക്തികള്ക്കു വളരെയധികം ഉപകാരപ്പെടുന്ന സംരംഭമാണിത്. ട്രാന്സ്ജെന്ഡര് വ്യക്തികള് തന്നെയാണ് ഹോമിലെ ജീവനക്കാര് എന്നതിനാൽ തന്നെ അവര്ക്ക് ജോലി ലഭ്യമാക്കാനും കെയര് ഹോം പദ്ധതിയിലൂടെ കഴിഞ്ഞു. തന്റെ ഫേസ്ബുക് കുറിപ്പിലൂടെയാണ് ആരോഗ്യ മന്ത്രി ഇക്കാര്യം അറിയിച്ചത്.
ആരോഗ്യമന്ത്രിയുടെ കുറിപ്പ്
ലിംഗമാറ്റ ശസ്ത്രക്രിയ നടത്തിയ ട്രാന്സ് ജെന്ഡര് വ്യക്തികള്ക്കും അടിയന്തിര സാഹചര്യങ്ങളില് പെട്ടുപോകുന്ന ട്രാന്സ് ജെന്ഡര് വ്യക്തികള്ക്കായി ഹ്രസ്വകാല താമസ സൗകര്യം ഒരുക്കുന്ന ട്രാന്സ്ജെന്ഡര് കെയര് ആന്റ് ഷോര്ട്ട് സ്റ്റേ ഹോമിന്റെ ഉദ്ഘാടനം നിര്വഹിച്ചു.
തിരുവനന്തപുരത്ത് കുന്നുകുഴി വാര്ഡിലാണ് സംസ്ഥാനത്തെ ആദ്യത്തെ ഷോര്ട്ട് സ്റ്റേ ഹോം (തണല് ട്രാന്സ്മെന് കെയര് ആന്റ് ഷോര്ട്ട് സ്റ്റേ ഹോം) സ്ഥാപിച്ചത്. ക്വീയറിഥം സി.ബി.ഒ.യ്ക്കാണ് ഈ ഹോമിന്റെ നടത്തിപ്പ് ചുമതല. ഭക്ഷണം, കൗണ്സിലിംഗ്, വൈദ്യസഹായം, നിയമ സഹായം തുടങ്ങി ട്രാന്സ്മെന് വ്യക്തികള്ക്ക് വേണ്ട എല്ലാവിധ സൗകര്യങ്ങളും ഹോമില് ലഭ്യമാണ്. ഹോമിന്റെ സുഗമമായ പ്രവര്ത്തനത്തിന് വേണ്ട ജീവനക്കാരേയും നിയമിച്ചിട്ടുണ്ട്. ട്രാന്സ്ജെന്ഡര് വ്യക്തികള് തന്നെയാണ് ഹോമിലെ ജീവനക്കാര് എന്നുള്ളതുകൊണ്ട് തന്നെ അവര്ക്ക് ജോലി ലഭ്യമാക്കാനും കെയര് ഹോം പദ്ധതിയിലൂടെ സാധിച്ചിട്ടുണ്ട്.
https://www.facebook.com/Malayalivartha
