സിറാജ് ദിനപത്രം ബ്യൂറോ ചീഫ് കെ.എം. ബഷീര്‍ വാഹനാപകടത്തില്‍ മരിച്ച സംഭവത്തെ തുടര്‍ന്ന് സര്‍വേ വകുപ്പ് ഡയറക്ടര്‍ ശ്രീറാം വെങ്കിട്ടരാമനെതിരെ മ്യൂസിയം പൊലീസ് കേസെടുത്തു. മനപൂര്‍വമല്ലാത്ത നരഹത്യക്കും അലക്ഷ്യമായി വാഹനമോടിച്ചതിനുമാണ് കേസ്. ശ്രീറാം വെങ്കിട്ടരാമനാണ് അപകടസമയത്ത് കാര്‍ ഓടിച്ചതെന്ന് കൂടെയുണ്ടായിരുന്ന യുവതി മൊഴി നല്‍കിയതായാണ് വിവരം. ഇയാള്‍ മദ്യപിച്ചെന്ന് തെളിഞ്ഞാല്‍ നരഹത്യക്ക് കേസെടുക്കും. താന്‍ അല്ല, കൂടെയുള്ള യുവതിയാണ് കാര്‍ ഓടിച്ചതെന്നായിരുന്നു ശ്രീറാം വെങ്കിട്ടരാമന്‍ പൊലീസിനോട് പറഞ്ഞിരുന്നത്. തിരുവനന്തപുരം മരപ്പാലം സ്വദേശി വഫ ഫിറോസാണ് ശ്രീറാം വെങ്കിട്ടരാമനോടൊപ്പം കാറിലുണ്ടായിരുന്നത്.

എന്നാല്‍ , സംഭവത്തില്‍ ഇടപെടുന്നതില്‍ പൊലീസ് വീഴ്ച വരുത്തിയതായി വ്യാപക ആരോപണമുയരുകയാണ്. മദ്യപിച്ചതായി വൈദ്യപരിശോധനയില്‍ ഡോക്ടര്‍ സ്ഥിരീകരിച്ചിട്ടും ശ്രീറാം വെങ്കിട്ടരാമനെ രക്തപരിശോധനക്ക് വിധേയനാക്കാന്‍ പൊലീസ് തയാറായിരുന്നില്ല. ശ്രീരാം വെങ്കിട്ടരാമനാണ് കാര്‍ ഓടിച്ചിരുന്നതെന്നും വാഹനം അമിതവേഗതയിലായിരുന്നെന്നും ദൃക്‌സാക്ഷിയായ തിരുവനന്തപുരം സ്വദേശി ജോബി മാധ്യമപ്രവര്‍ത്തകരോട് പറഞ്ഞു. ഇടിച്ചയുടന്‍ കാറിന്റെ എയര്‍ബാഗുകള്‍ പുറത്തുവന്നതിനാല്‍ കാറിലുണ്ടായിരുന്നവര്‍ക്ക് കാര്യമായ പരിക്കേറ്റില്ല.