ആഹാരം കൊടുക്കാമെന്ന് പറഞ്ഞ് 75-കാരിയായ വയോധികയെ വീട്ടിലെത്തിച്ചു പീഡിപ്പിച്ച സംഭവത്തില്‍ 47-കാരനായ പ്രതി റിമാന്‍ഡില്‍. കറ്റാനം വെട്ടിക്കോട് സ്വദേശിയായ രമണന്‍ ആണ് അറസ്റ്റിലായത്.

ഇക്കഴിഞ്ഞ ദിവസം ഉച്ചയ്ക്ക് 1.30 ഓടെയായിരുന്നു സംഭവം. കെപി റോഡ് വഴി നടന്നു പോകുകയായിരുന്ന വയോധികയെ ആളൊഴിഞ്ഞ പ്രതിയുടെ വീട്ടിലെത്തിച്ചായിരുന്നു പീഡനം.

അലമുറയിട്ട് കരഞ്ഞെങ്കിലും പരിസരത്ത് ആരും ഇല്ലാതിരുന്നതിനാല്‍ മണിക്കൂറുകളോളം പീഡനം തുടരുകയായിരുന്നു. പിന്നീട് വയോധികയെ റോഡില്‍ എത്തിച്ച് ഇയാള്‍ സ്ഥലംവിട്ടു.

രക്തം വാര്‍ന്ന് അവശയായി സമീപത്തെ കടയ്ക്കു സമീപമെത്തിയ വയോധികയെ നാട്ടുകാര്‍ കറ്റാനത്തെ സ്വകാര്യ ആശുപത്രിയില്‍ എത്തിക്കുകയായിരുന്നു. ഡോക്ടര്‍ നടത്തിയ പരിശോധനയിലാണ് പീഡനം നടന്നതായി കണ്ടെത്തിയത്. ഇപ്പോള്‍ വയോധിക ആശുപത്രിയില്‍ ചികില്‍സയിലാണ്.

വര്‍ഷങ്ങള്‍ക്കു മുമ്പ് ഒരപകടത്തില്‍ പരിക്കേറ്റ രമണന് കാലിനു ചെറിയ സ്വാധീനക്കുറവുണ്ട്. ഇതേത്തുടര്‍ന്ന് ഇയാള്‍ ലോട്ടറി കച്ചവടം നടത്തിയാണ് ജീവിച്ചിരുന്നത്. കഴിഞ്ഞ പ്രളയത്തില്‍ വീട്ടില്‍ വെള്ളം കയറിയതിനെ തുടര്‍ന്ന് രമണനും കുടുംബവും തഴവ ജംഗ്ഷനു സമീപം വാടക വീട്ടിലായിരുന്നു താമസം.

വെള്ളം കയറിയതിനെത്തുടര്‍ന്ന് താമസമില്ലാതെ കിടന്നിരുന്ന കാറ്റാനം സബ്‌സ്റ്റേഷനു വടക്കുവശത്തുള്ള വീട്ടില്‍ വച്ചാണ് ഇയാള്‍ വയോധികയെ പീഡിപ്പിച്ചത്. വള്ളികുന്നം എസ്‌ഐ ഷൈജു ഇബ്രാഹിമിന്റെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടിയത്. ഫോറന്‍സിക് വിഭാഗം സ്ഥലത്ത് തെളിവെടുപ്പ് നടത്തി. പ്രതിയെ റിമാന്‍ഡ് ചെയ്തു.