കെഎസ്ആര്‍ടിസി കായംകുളം ഡിപ്പോയില്‍ നിന്നും സര്‍വീസ് നടത്തുന്ന ദീര്‍ഘദൂര ഫാസ്റ്റ് പാസഞ്ചര്‍ ബസുകള്‍ നിര്‍ത്തലാക്കാനുള്ള നീക്കത്തിനെതിരെ പ്രതിഷേധം ശക്തമാകുന്നു. ആലപ്പുഴ-കൊല്ലം ചെയിന്‍ സര്‍വീസിന്റെ ഭാഗമായിട്ടാണ് വര്‍ഷങ്ങളുടെ പഴക്കമുള്ള ബസ് സര്‍വീസുകള്‍ വരെ നിര്‍ത്തലാക്കുന്നത്.

രാവിലെ 6.15-ന് മുതുകുളം വഴി സര്‍വീസ് നടത്തുന്ന ഗുരുവായൂര്‍ ഫാസ്റ്റ് പാസഞ്ചര്‍, 6.10-ന് സര്‍വീസ് നടത്തുന്ന അമൃത മെഡിക്കല്‍ കോളേജ് വരെയുള്ള ഫാസ്റ്റ് പാസഞ്ചര്‍, രാവിലെ അഞ്ചിനുള്ള എറണാകുളം ഫാസ്റ്റ് , ആറിനുള്ള തിരുവനന്തപുരം ഫാസ്റ്റ്, 8.45-ന് എറണാകുളം എന്നിവിടങ്ങളിലേക്കുള്ള സര്‍വീസുകളാണ് നിര്‍ത്തലാക്കുന്നത്.

യാത്രക്കാര്‍ ഏറെ ആശ്രയിക്കുന്ന നിലവിലുള്ള സര്‍വീസുകള്‍ നിര്‍ത്തലാക്കുന്നത് 15 മിനിറ്റ് ഇടവിട്ട് കൊല്ലം-ആലപ്പുഴ ചെയിന്‍ സര്‍വീസ് തുടങ്ങുന്നതിന്റെ ഭാഗമായാണ് എന്നാണ് അറിയുന്നത്. ഇത് യാത്രക്കാരെ കൂടുതല്‍ ദുരിതത്തിലാക്കും. ഗുരുവായൂര്‍ ഫാസ്റ്റ് ഉള്‍പ്പെടെ നിര്‍ത്താനുള്ള നീക്കത്തിനെതിരെ സമൂഹ മാധ്യമങ്ങളിലും പ്രതിഷേധം ശക്തമായിട്ടുണ്ട്.

തുണ്ടത്തില്‍ കുഞ്ഞുകൃഷ്ണപിള്ള എംഎല്‍എയായിരിക്കവേയാണ് മുതുകുളം വഴി ഗുരുവായൂര്‍ സര്‍വീസ് തുടങ്ങുന്നത്. 45 വര്‍ഷത്തോളം പഴക്കമുള്ള ബസ് നിര്‍ത്തലാക്കുന്നതിനെതിരെ വ്യാപക പ്രതിഷേധമാണ് ഉയരുന്നത്. ഗുരുവായൂര്‍, അമൃത സര്‍വീസ് അടക്കമുള്ള ബസുകള്‍ കെഎസ്ആര്‍ടിസി ഡിപ്പോയ്ക്ക് മികച്ച വരുമാനമാണ് നല്‍കുന്നത്. അമൃതയിലേക്കുള്ള ബസ് നിര്‍ത്തുന്നത് ആശുപത്രിയിലേക്ക് പോകുന്ന സാധാരണക്കാരായ രോഗികളെയാണ് ദുരിതത്തിലാക്കുന്നത്.